A Gán De Sọgodo Towe

To nudi owhe 3 500 die, Jehovah Jiwheyẹwhe dọ nuhe mẹhe nọ sẹ̀n ẹn lẹ dona wà nado do sọgodo dagbe na yé. Nuhe e dọ die: “Yẹn ko ze ogbẹ̀ po okú po donukọnna we, dona po dẹ̀hodo po; hiẹ sọ dona de ogbẹ̀, na hiẹ nido nọgbẹ̀, yèdọ hiẹ po kúnkan towe lẹ po.”—Deutelonomi 30:19.

E dohia dọ eyin yé jlo na do sọgodo dagbe, yé dona nọ bayi nudide dagbe lẹ. Nudopolọ wẹ mílọsu dona wà to egbehe. Biblu dọ nue mí na wà na e nido pà mí: ‘Gbọn wanyina Jehovah Jiwheyẹwhe towe, todidoai na ogbè etọn dali.’—Deutelonomi 30:20.

LEHE MÍ GÁN YIWANNA JEHOVAH BO DOTOAINA OGBÈ ETỌN DO

PLỌN BIBLU: Whẹpo a nido yiwanna Jehovah, e na biọ dọ a ni plọnnu bo yọ́n nue Biblu dọ gandego. A na wá mọdọ Jiwheyẹwhe owanyinọ he nọ jlo dagbe towe wẹ ewọ yin. E jlo dọ a ni nọ hodẹ̀ hlan emi ‘na e to towe hòpọn wutu.’ (1 Pita 5:7) Biblu dọ dọ eyin a dovivẹnu bo dọnsẹpọ ẹ, ewọ lọsu ‘na dọnsẹpọ we.’—Jakọbu 4:8.

NỌ WANU SỌGBE HẸ NUE A PLỌN LẸ: Mí nọ dohia dọ mí dotoaina Jiwheyẹwhe eyin mí nọ yinuwa sọgbe hẹ ayinamẹ nuyọnẹn tọn he to Biblu mẹ lẹ. Eyin a wàmọ, a “na yin kọdetọn dagbenọ to gbẹzan towe mẹ podọ whenẹnu wẹ hiẹ na nọ yinuwa po nuyọnẹn po.”—Jọṣua 1:8.