-Bɔyaˈˈ -dɩ ˈdhe -ɛ?

1. Dɩ -ˈghlʋa ˈe Ɲɔnsoa bho ˈdhe -ɛ?

Ɲɔnsoa a ˈbɔn ɲʋn nɩan da ˈbhlʋa- ˈˈkpe ˈye -bɔyaˈˈ ˈjhe. Ɔ -kman ɲʋn anˈ dɩ ɛ -kɔndɩ ɔ nʋn ˈbhlʋa- -e dhɩ aˈ klɛɛ nɩan dɔ ˈˈkpe -e. Nɔnˈˈ -dhɛ ˈˈzaan- -si ˈo ɔ ˈyeɛ nʋn ɲʋn nɩan ˈbhlʋɩ- aˈ klɛɛ ˈdhi i ʋaˈ ˈkmʋn ˈye ˈdhɔɛe ˈmʋn nɩn-. Ɔɔ muɛn dhɩ -ɩan- ˈˈdua ɲʋn ˈkle aˈ klɛɛ iza-.​—Zro Jérémie 29:11.

Ɲʋn -ˈbhlea -aʋ- ɛ, ʋʋ ˈse ˈˈku ˈdhbhaa- -e ˈghwɛ -e ˈmɛan iza- ɲʋn ˈseɛ ˈjhe dhueˈ. ˈKlaa -bɔyaˈˈ -dɩ nɩan ˈo bhla, -ˈmɩn ka: ˈdhe nɔnˈˈ -dhɛ ˈˈzaan- ˈdhi ɛ, Ɲɔnsoa aˈ ɲʋnˈbhleglibha a muɛn -glɔɲiɔn- ɔnˈ ɲʋnˈbhleɛ iza-. Ɲʋn ɔ ˈbhlea, ʋa muɛn kupeɛideɛ- -e kuzɔinflɔɛn- ˈjɛɛn- ɛnˈ trɔnˈ -dhi.​—Zro Gbɔˈwlʋdhɩ- 11:15; 21:3, 4.

2. -Bɔyaˈˈ -dɩ -ˈnɩn ɛn, dhɛɛdɩ- -a yeˈ ˈˈdoo- -a yeˈ ɩanˈ dɩ ikpʋn -ɛn?

-Da Ɲɔnsoa a muan ɲʋnsaɩn- anˈ klɛɛ iza-, ˈbho- ˈklejheɛ- ɛˈ klɛɛ ˈye da ˈbhlʋa- ˈˈkpe igwɛ-. (2 Tesalɔsɩ 1:8) -Bhlaa ɔ ˈye ɛɛˈ dhɛ tu nʋn -ɛn? Dhɩ -ɩan- ˈˈdua ɲʋn ˈkle ˈzɩan, Ɲɔnsoa aˈ Ghlu -za ɩ ɲan ʋn ye ɩanˈ dɩ ˈtmʋn. Dhɩsaɩn- -ɩan- nʋʋan da ˈbhlʋa- ˈˈkpe ɛ, ɩan toɛˈ -ka dhɩ Ɲɔnsoa ˈyea nʋn ɩanˈ nɔnˈˈ ɔn ˈˈkwaan dhi ɛ.​—Zro 2 Timotee 3:1-5.

3. Dhɛ -a yeˈ nʋn bhla -a?

-A yeˈ Ɲɔnsoa aˈ jhibhɛ- ˈcɩan ˈdhe ɔɔˈ Ghlu nɩan Biiblʋ- ˈdhi. Ʋn gwɛ ˈsɛɛ- dɩ -kman -bho ɔɔ jha ɔɔˈ ˈˈɲnuun- ɛn. -Ka -a yeaˈ nʋn -wɛeˈ -aaˈ ˈkmʋn ˈyea ˈdhɔɛe nɩn- ˈzɩan ˈˈdhe -a yeaˈ ˈkmʋn sea ˈˈtian ˈbhle ˈjhe ˈdhe ɲan da ˈbhlʋa- ˈˈkpe ɛ, ɛmɛn- ʋan tɔɔn -abʋ. Ɛ tɔˈdɩ-, -bho ɲɔn ɔn sa -ʋn sʋn bho po -wɛeˈ yeˈ Biiblʋ- iˈŋwɔn, ɛ ˈbhɛɛˈ ɛ se ɲʋn -ˈnʋʋn ˈtʋn -nʋn in. ˈKlaa, ˈkmʋn ˈdhɔɛe Ɲɔnsoa ˈnaan ɔ ˈye -aʋ- ˈˈɲɩn ˈdhe ɲan ˈan dɩ ɛ, -a -ˈbhɔ ɲʋn iˈˈtaiɛ- ʋʋ ˈbhɔ -aʋ- ˈkpɩ i ˈdhbhaa- ˈbho -aaˈ dhɛ ˈcɩaan.​—Zro 2 Timotee 3:12; Gbɔˈwlʋdhɩ- 14:6, 7.