Jhriiˈ- -nʋʋan- ˈbho ˈtɔnin -zaan ˈˈkpe

Ɲʋn ˈtmʋʋan Falaɔn -ka Israɛkɔʋn ˈghwlʋaˈ ˈo Ezipʋ ˈsʋ ɛ, ɔ ˈzian- ghwlu ɩˈˈ ɔ ˈse ˈbɔn ʋʋ ˈye mun. Ɔ ˈtmʋɛn- ɔɔˈ ˈsʋlɩˈˈ ɔ ˈnaan: ‘Aʋ po ˈman ˈˈkpenaandhɩ- aˈ klɛɛ ɲʋn an kpa tʋˈ kpɔ ɔˈˈ -wɛeˈ -a ˈye ˈbho ʋbʋ ˈdhe bhla! -A ˈse ʋbʋ i ˈˈtai dhi ʋʋ ˈse mun in -dhe.’ Falaɔn -e ɔɔˈ ˈsʋlɩˈˈ bhla ˈo Israɛkɔʋn ˈdhe.

-Bho zɔn ˈzɩn ɛn, Zoova a jhiiɛ ˈˈnin ɛnˈ ˈplɩ i -wɛeˈ ɔɔ po ɔɔˈ ˈcɛ jie bho ˈˈdhe -bho glu gɔ ɔˈ, ɔɔ jhiiɛ nɛn -ˈŋman in. Ɔ poɛ Israɛkɔʋn jie bho ˈsʋ ʋʋ ye ˈo ˈtɔnin -zaan -gwlɩˈˈ ɲnin ˈˈdhe ɔ ˈtmʋʋn ʋbʋ ʋʋ ˈye ʋaˈ ˈkaman po ˈbho mɔn.

ˈSʋ Israɛkɔʋn ˈjhe Falaɔn -e ɔɔˈ ˈsʋlɩˈˈ ˈmɛn ʋa yea ˈo ʋbʋ ˈdhe bhla. Ʋʋ -nɩɛn ˈo ˈtɔnin -e Ezipʋkɔʋn anˈ ˈsʋlɩˈˈ ˈɲnɩn bhla. Ʋʋ ˈˈghwɔɔˈ ˈdhe Moizɩ bho ʋʋ ˈnaan: ‘-Aa yeɛ ˈmɛanˈ! -Bho ˈˈtai- -abʋ i ˈdhe Ezipʋ -dhe ɛˈ, ɛ ˈˈpaaˈ.’ ˈKlaa Moizɩ -ghwluɛ ˈe ʋbʋ bho ɔ ˈnaan: ‘-Faʋn- anˈ nʋn aʋ -dhe. Aʋ ˈmain -wɛeˈ -ka Zoova ˈyea -aʋ ˈpʋʋ- sʋn nʋn ɛn, aʋ ˈyeɛ ˈjhe.’ Moizɩ deɛ Zoova -gwlɩˈˈ -dhe ˈjɛɛn-!

Zoova ˈnaan Israɛkɔʋn po ʋaˈ ˈˈjɛ kpɔ ɔˈˈ ʋʋ ˈye jie ɲan kpa. ˈDhe ˈˈmaʋn -glʋ -ˈnʋn ˈdhi ɛ, Zoova -zaa ˈˈnin ɛnˈ ˈplɩ -gwliin ˈˈdhe ɔ poɛ ˈo Ezipʋkɔʋn -e Israɛkɔʋn ˈɲnɩn. ˈDhe Ezipʋkɔʋn anˈ ˈfɔ bho ɛ, kwile- -nɩn ˈe. ˈKlaa ˈdhe Israɛkɔʋn anˈ ˈfɔ bho ɛ, zɔn -gbaa dhi.

Zoova ˈtmʋʋn- Moizɩ ˈmɛn ɔ ˈye ɔɔˈ sʋn in sro ˈbho ˈtɔnin ˈˈkpe. -Wɛeˈ Zoova nʋɛn pʋɔˈ -klaaˈˈ dhueˈ ye jhi ˈdhe ˈˈmaʋn -glʋ aˈ klɛɛ ˈdhi. ˈTɔnin ˈghwlʋɛ ˈfɛ ˈsɔɔn ˈˈdhe -jie -jhii ˈbho ɛɛˈ gwɛa. Israɛkɔʋn anˈ ˈˈghwluu -ghwluu -naan- ˈbho ˈbhlʋa aˈ ˈˈkpaan ˈˈkpe, ˈbho ˈˈnin ɛnˈ -zrɩˈ ˈsɔɔn ˈɲnɩn ʋʋ ye ˈe ˈtɔnin ɛnˈ ˈfɔ -ˈnɔɔn bho ɲnin.

Falaɔn ɔnˈ ˈsʋlɩˈˈ bhla ˈo Israɛkɔʋn ˈdhe ˈbho ˈtɔnin ɛnˈ gwɛa-. ˈKlaa Zoova ˈˈbheeɛ- dhɩ ˈˈjhrii ˈdhe ˈsʋlɩˈˈ ˈɲnɩn bho. Ʋaˈ ˈˈkpenaandhɩ aˈ -jiinˈ -dee- i ˈga- ˈmɛn. ˈSʋlɩˈˈ a ˈˈghwɔɔ ʋʋ ˈnaan: ‘-A ˈghwlʋ da! Zoova a vɔɛn ʋaˈ -gbaˈ.’

Zoova -ghwluɛ ˈe Moizɩ bho ɔ ˈnaan: ‘Sro -ˈman sʋn in ˈbho ˈtɔnin ˈˈkpe.’ Ɔ sroa sʋn in ɛn, ˈˈnin ɛnˈ -zrɩˈ ˈcɛiˈ ˈbho Ezipʋkɔʋn anˈ ˈsʋlɩˈˈ ˈˈkpe. Falaɔn -e ɔɔˈ ˈsʋlɩˈˈ ˈmɛɛnˈ. Ɲɔn dhueˈ ka se ˈkmʋn -sie- ˈdhe ʋbʋ ˈˈklu.

ˈSʋ ˈcɛ ɛˈ klɛɛ cɛan ˈtɔnin ɛn, ʋa bhleeɛ Ɲɔnsoa bho ʋʋ ˈnaan: “-A -bhlee Zoova bho, dhɛ nɩan ˈo ɛ, ɔ ˈbhɛɛ- ɔɔˈ ˈɲnɩn ˈɩn. -Srooˈˈ- -e ɲɔn nɩan ˈo ɛ ˈˈkpe ɛ, ɔ ˈˈvile- ʋbʋ ˈmɛn ˈbho ˈtɔnin ŋwɔn.” -Jɛn ʋʋ nɩan bhleaˈ a, -ˈmɛn ˈɲnʋnkpaeˈ a dheeˈ ˈˈdhe ʋa bhla dhɩ. Ʋaˈ klɛɛ ɛ nʋɛn ˈmʋnan ˈjɛɛn- dhɛ ʋʋ -flɔan ˈˈkpei bhla ɛɛˈ dɩ.