Balaamʋn ɔnˈ -soofaeˈ -ghwluˈ

Israɛkɔʋn nʋɛn zɩn anˈ 40 ˈdhe -bɩɛnˈˈ -bhlʋa ˈˈkpe. Ʋʋ kpa tʋ aˈ ˈˈdhru ˈbho ˈˈkwigwlɛ- -duuˈˈ ˈˈkpe. ˈBho Moabʋ aˈ -da trɩ sea -nɩn ˈdhe zudɛn nɩn ɛnˈ ˈjhrʋ aˈ ˈkwla ˈghwlʋanˈ ʋʋ po ʋaˈ kaman. Nɔnˈˈ ɲninˈ -wɛ, ʋʋ ˈye ˈe ˈbhlʋa- -dhee ˈdhi pa. ˈKlaa -faʋn an nʋn Moabʋ aˈ ˈbheɔ Balakɩ ˈmɛn. Ɔ ˈse ˈbɔn ʋʋ ˈye ɔɔˈ ˈbhlʋa kpʋn. Ɛɛˈ dɩ ɔ ˈdha ˈˈjhu dhueˈ -ɔɔˈ ˈɲnɩn nɩan Balaamʋn ɔ ˈye ˈe Moabʋ jhi -wɛeˈ ɔ ˈye Israɛkɔʋn ˈdhaɩnˈ ˈˈkpe -jha.

Zoova ˈtmʋʋn- Balaamʋn ˈmɛn ɔ ˈnaan: ‘-ˈMan po Israɛkɔʋn ˈdhaɩnˈ ˈˈkpe -dhe.’ ˈSʋ Balaamʋn ˈse mun dɩ ˈŋwɔɔn- -dheeka. ˈBheɔ Balakɩ ˈdhɔ ɔˈ -kenɛnˈ ɔ ˈnaan -bho ɔ jhi ɛˈ, ɔ ˈyeɔ dhɩ aˈ klɛɛ ɔɔ ˈbɔan ˈˈɲɩn. Balaamʋn ˈse ˈo ˈŋwɔɔn-. ˈSʋ, Ɲɔnsoa -ghwluɛ- ˈe ɔ bho ɔ ˈnaan: ‘-Bho mun ˈe ɛˈ, dɩ ˈman muan ʋn ˈtmʋʋn- ɛn, ɩanˈ ˈsʋ -ˈye ˈtmʋn.’

Balaamʋn ˈjha ˈo -soofaeˈ ˈˈkpe ɔ ye Moabʋ -bhlʋa- aˈ jie ˈmʋn ˈˈdhuo-. Ɔɔ muɛn Israɛkɔʋn ˈdhaɩnˈ ˈˈkpe -jha aˈ -dhe, dhɛ Zoova ˈnaan ɔɔˈ nʋn -dhe ɛ. Zoova aˈ dhbhoozuu- -ɲnain ˈbho -jieˈˈ -kpɛ taan. Balaamʋn se ˈbhɛɛ- ɔ ˈyeʋ ˈjhe -dhe, ˈklaa ɔɔˈ -soofaeˈ -ˈmɛn ɛn ˈjhʋʋ. -Soofaeˈ ˈjhea dhbhoozuu- -ˈnʋn -aa -tɛnˈˈ ɛn, ɛ ˈghwlʋɛ ˈo -jieˈˈ ɛ ye ˈkwla pa. Kpɛ ˈsɔɔn -nɛn ɛn, ɛ ˈnɛn ˈe -bhloˈ ˈˈjhri ˈˈdhe ɛ ˈnɛɛn- Balaamʋn ɔnˈ bhʋ. -Kpɛ taan -nɛn ɛn, ɛ ˈpɛin ˈbho -jieˈˈ. -Bho ɛɛ sa -kaˈ nʋn ɛnˈ, -ˈmɛn Balaamʋn ɔn bhlɛɛ tu.

Ɛɛ ˈbhɔɔa ˈbho ɛ, Zoova nʋɛnˈ -soofaeˈ ye -ghwlu. Ɛ deeɛ- Balaamʋn in ɛ ˈnaan: ‘Dhɛɛdɩ- -man bhla ˈʋn -ɛn?’ Ɔ ˈnaan: ‘Ɛɛˈ dɩ ˈɩn gwɛ kpɛɛnˈ ɲɔn-. -Bho ˈɩn ˈbhle -jrɛnˈ -dhe -ˈmɛn ˈɩn ˈdhbhɛ ɛˈ.’ -Soofaeˈ ˈnaan: ‘ˈƖn nɩan -manˈ -soofaeˈ ɛ, ɛɛ nʋɛn -zɩn zɩanˈ. ˈƖn nʋn ʋn ɛɛˈ dhɛ tu ˈˈjhrii ˈmɛn -kpɔ dhueˈ?’

ˈSʋ Zoova nʋɛnˈ Balaamʋn ye dhbhoozuu- ˈjhe. ˈˈDhe dhbhoozuu- ˈnaan: ‘Zoova zela ʋn -glʋˈ ˈmɛn ɔ ˈnaan -ˈ man jha -e Israɛkɔʋn ˈdhaɩnˈ ˈˈkpe -dhe.’ Balaamʋn ˈnaan: ‘Dhɛ ˈɩn nʋɛn, ɛ dhɛsaʋn-. ˈMan muɛn ŋmɛinˈˈ dhe.’ ˈKlaa dhbhoozuu- ˈnaan: ‘ˈBhɛɛˈ -ˈye ˈe Moabʋ mun, ˈklaa dɩ Zoova a muan ʋn ˈtmʋʋn- ɛn, ɩmɩn- -ˈye ˈtmʋn.’

Balaamʋn -za dɩ -ˈnɩn ˈsrɩn ˈdhi ˈmɛn? ˈˈƖɩn-. Kpɛ taan, ɔ ˈdɩɛnˈ Israɛkɔʋn anˈ ˈdhaɩnˈ ˈˈkpe -jhaaˈ. ˈKlaa Zoova nʋɛnˈ ɔ yʋbʋ ˈˈniman po ˈbho ɛˈ gɔ ɔˈˈ. Ɛ ˈyea ˈo ˈbhɔɔ- ɔ, Israɛkɔʋn kpa Moabʋ tʋ bho ˈˈdhe ɲʋn ˈdhbha Balaamʋn. -Bho ɔ po Zoova -dheinˈˈ bho ˈbho -deenanˈ -dhe ɛˈ, ɛ se ˈˈpaa-?