Zoova -za ˈo Zozue

Moizɩ poɛ Israɛ -bhlʋa jie bho ˈdhe -zɩn -duuˈˈ ˈdhi. -Kaan bhla, ɔɔˈ ˈmɛn nɔnˈˈ ɲninˈ. Zoova ˈtmʋʋɔn ɔ ˈnaan: ‘Ɛ se -mɔn -ˈye Israɛkɔʋn ˈdhe ˈbhlʋa- ɔɔˈ ghwlu ˈɩn cɛan ˈdhi -paa -nɩn. ˈKlaa ˈman muɛn ʋn i ˈˈtai- -ˈye ˈbhlʋa- -ˈnɔn ˈjhe.’ ˈSʋ Moizɩ deeɛ- Zoova i ɔ ˈye ˈo jiebhopoi- -dhee -za -ɔ ˈye ˈcɛ ɛˈ dɩ ˈˈdu. Zoova -ghwluɛ- ˈe ɔ bho ɔ ˈnaan: ‘Mun ˈe Zozue bho, -ˈmɛn ˈtmʋɔn -ka ɛ nɩan ɔmɔn- ˈyea jiebhopoi- -nɩn ɛn.’

Moizɩ ˈtmʋʋn- Israɛkɔʋn ˈmɛn -ka ɔɔˈ ˈmɛn nɔnˈˈ sea bho -tɛɛn. Ɔ ˈtmʋʋn- ʋbʋ ˈmɛn -ke -ka Zoova -za ˈo Zozue ɔ ˈyʋbʋ ˈdhe ˈbhlʋa- Ɲɔnsoa ˈyʋbʋ ˈˈɲɩn ˈdhi -paa a. ˈˈDhe Moizɩ -ghwlu ˈe Zozue bho ɔ ˈnaan: ‘-Faʋn anˈ nʋn ʋn -dhe. Zoova a muɛn ʋn sʋn bho -po.’ Nɔnˈˈ dhɛzaan zia, Moizɩ ˈjha ˈe Nebo trʋ ˈˈdhru -wɛeˈ Zoova -tɔɔn ˈbhlʋa- ɔ ˈnaan ɔ ˈyea Ablaamʋn -e Izaakɩ -e Zakɔbʋ ˈˈɲin -dhe ɛ. ˈBho ɛ ˈdhe ɛ, Moizɩ ˈmɛɛnˈ, ɔ ˈbhleɛˈ zɩn anˈ 120 -dhe.

Zoova -ghwluɛ- ˈe Zozue bho ɔ ˈnaan: ‘Cɛn Zudɛn nin -ˈmɛn mun ˈe Kanaan. ˈMan muɛn ʋn sʋn bho -po -ka ˈɩn poa Moizɩ sʋn bho ɛ. -ˈYe ˈman ˈtee ˈdhii zro zɔn ooˈˈ zɔn. -Faʋn anˈ nʋn ʋn -dhe ˈˈdhe -kuu -pɛɛ i. -Kaan bhla, dhɛ ˈɩn ˈtmʋan ʋn -ˈyea nʋn ɛn, nʋɛn.’

Zozue dhbhoɛ ɲʋn ˈsɔɔn -ʋʋ ˈye ˈˈkwiglɔ- ɲɔn ɔn ˈdhaa Zeliko jha -ŋmʋn. ˈDhe -bo -ɔɔ jhia ˈdhi ɛ, dhɛ -nʋʋan- ˈdhemɔn -aa muɛn ɛnˈ dɩ ˈtmʋn-. Ɲʋn muan glɔ jha -ŋmʋanˈ jhia dhe ɛ, ʋʋ ˈnaan nɔnˈˈ nɔn -nmɔn ˈo dhi -wɛeˈ ɲɔn ye ˈe Kanaan -bhlʋa- ˈdhi mun. Zɔn -ˈnɔɔn zɩan, Zozue ˈtmʋʋn- ˈcɛ ɛˈ klɛɛ ˈmɛn ʋʋ ˈye ʋaˈ ˈˈjɛ kpɔ ɔˈˈ po ʋʋ ˈye mun. -Wɛeˈ ɔ ˈtmʋʋn- ˈsraazaʋn- -ˈbhlea ˈˈduudɩ aˈ ˈkɛsuˈˈ ʋʋ ˈye ˈo ˈcɛ ˈˈjhibhaˈ -ˈnan ʋʋ ˈye ˈe Zudɛn nin -gwlɩˈˈ mun. ˈˈNin -ˈnɛn ˈˈjhiiˈ ˈjɛɛn-. ˈKlaa ˈsraazaʋn- poa bhɩ ˈbho ˈˈniɔn- ˈsʋ ɛ, ˈˈnin ˈbhɔ zi dɩ ˈmɛn ˈˈdhe ɛ manˈ! ˈSraazaʋn- -ˈnʋn -ˈnan ʋʋ ˈye ˈo ˈˈnin ɛnˈ gwɛa ɲnin ˈˈdhe ʋʋ -ɲnain ˈbhomɔn ˈsʋ ˈcɛ ɛˈ klɛɛ cɛn ˈˈnin. Ɛgwɛ jhriiˈ- -ˈnɩn poɛ ʋbʋ dhɛ Zoova nʋan ˈbho ˈtɔnin -Zaan ŋwɔn ɔnˈ dɩ -glʋˈ bho!

-Zɩn -ˈnɩn anˈ klɛɛ zia, ɛ ˈyea ˈo ˈbhɔɔ- ɔ, Israɛkɔʋn pa ˈe ˈbhlʋa- -ɔɔˈ ghwlu Ɲɔnsoa cɛan ˈdhi ˈmɛn. Ʋʋ ˈbhɛɛˈ ʋʋ ˈye ˈˈgbi -e ˈˈkwigwlɛ po. Ʋʋ ˈbhɛɛˈ ʋʋ ˈye dhɩ ˈˈdu, ʋʋ ˈye viɲɩn gle ˈbhle ˈˈdhe ʋʋ ˈye ti -ɩan trooa ˈˈdu -ke. Ɛ nɩn ˈbhlʋa- -ɔ ˈdhe ˈdhi ˈnɩnɔnˈ -e dhʋ a sɛin.