Ghwlu Zɛfute cɛan

Israɛkɔʋn ˈbhɔ Zoova ˈmɛn -kenɛnˈ ˈˈdhe ʋʋ -dee gɩlɩ ˈsrɩ aˈ ˈˈjhibhaˈ -gbɛɛ -ˈnan ˈmɛn. Amɔnɩnkɔʋn kpa Israɛkɔʋn tʋ ˈˈbhli ɛ, gɩlɩ ˈse dhɛ nʋn -wɛeˈ ɩn ˈyʋbʋ sʋn bho po. Israɛkɔʋn ˈjheɛ ˈkle ˈdhe -zɩn -duuˈˈ ˈdhi. Ɛɛ ˈbhɔɔa ˈbho ɛ, ʋʋ -ghwluɛ- ˈe Zoova bho ʋʋ ˈnaan: ‘-A nʋɛn dhɛsaʋn-. -Kɔngɩnˈ ˈpʋʋ -abʋ ˈdhe -aaˈ ˈmʋɲɛʋn ˈkwa.’ Israɛkɔʋn za ʋaˈ -baadhɩ i ˈˈdhe ʋʋ -dee Zoova aˈ ˈˈɲɩanˈˈ -kenɛnˈ. ˈSʋ Zoova ˈse ˈbɔn ɔ ˈyʋbʋ i ˈˈtai- ʋʋ ˈye ˈkle ˈjheaˈ ɲan kpa.

Tʋvɔin- -ɔɔˈ ˈɲnɩn nɩan Zɛfute ɛ, ɔmɔn- ɲʋn za ˈo -ɔ ˈye ˈe ˈcɛ ɛˈ ɲan -kɔn ˈˈdhe ʋʋ ˈye Amɔnɩnkɔʋn bho vɔn. Ɔ -ghwluɛ- ˈe Zoova bho ɔ ˈnaan: ‘-Bho po -aʋ sʋn bho -wɛeˈ -a kpa tʋ aˈ ˈˈdhru ɛˈ, ˈman cɛn ghwlu ˈdhee- bho, ɲɔn -bho ˈman sa ŋmɛinˈˈ jhi -ɔɔ muan ɲan -kɔn -ɔ ˈyea ˈʋn ˈˈɩ ˈjhaa- a, ˈman muɔn ʋn ˈˈɲɩn-.’ Zoova poɛ Zɛfute ɔˈ bhaeghwlu -dheinˈˈ bho ˈˈdhe ɔ poɔ sʋn bho ɔ ye tʋ aˈ ˈˈdhru kpa.

Zɛfute ɔ jhia ŋmɛinˈˈ dhe ɛ, ɲɔn kɔan ɲan -ɔ jhiɔ ˈˈɩ ˈjhaa- -ˈnan an, ɛ nɩn ɔɔˈ ˈˈjhu -ɲnʋnkpaoˈ nɩan dhueˈ gbai. Ʋan bhla dhɩ ʋan yea dhee. -Kawɛ Zɛfute ɔ mun -nʋn -ɛn? Ghwlu ɔ cɛan ˈdhe Zoova bho ɛ, ɔ poɛ ʋanˈ dɩ -glʋˈ bho ˈˈdhe ɔ ˈnaan: ‘Oo, ˈman ˈˈjhu -ɲnʋnkpaoˈ! A poɛ ˈʋn -ghwɛe- -gwlɩi. ˈƖn cɛn ghwlu ˈdhe Zoova bho. -Bho ˈyʋ ŋwɔn ˈjhe ɛˈ, ˈye aʋn ˈdhe Silo kpa ˈdhe -pooˈˈ ˈdhi a ˈye dhbho nʋn ˈdhemɔn.’ ˈKlaa ɔɔˈ ˈˈjhu -ɲnʋnkpaoˈ -ghwluɛ- ˈdhe ɔ ˈbho ʋn ˈnaan: ‘ˈMan ˈˈbho, -bho cɛn ghwlu ˈdhe Zoova bho ɛˈ, -ˈyʋ ŋwɔn ˈjhe. -Jɛn ˈman ˈbɔan -kaan an, ɛmɛn- -nɩn -ˈye ˈʋn dhi ˈˈtai- ˈmɔn -e ˈman dhaiˈˈ -ɲnʋnkpaeˈ -e -a ˈye ˈe trʋ ˈˈkpe mun -a ˈye ˈcɩ ˈsɔɔn nʋn ˈdhemɔn. ˈBho ɛ ˈdhe ɛ, ˈman muɛn Silo -mun.’ Zɛfute ɔˈ ˈˈjhu -ɲnʋnkpaoˈ nuɛn dhbho ˈdhe Zoova aˈ -pooˈˈ ˈdhi ˈdhe Silo ˈsʋ ɛ ye ʋanˈ ˈmɛanˈ -jhɛɛ. Zʋn ooˈ zʋn, ʋanˈ dhaiˈˈ -ˈˈwe a mun ˈsɛ -poaˈ.