Zoova ˈˈɲɩɛnˈˈ Samʋnsɔn ˈˈɩkman-

Israɛkɔʋn anˈ -daduuˈˈ -dee -baadhɩ aˈ ˈˈɲɩanˈˈ ˈmɛn -kenɛnˈ. ˈSʋ Zoova ˈˈtaiɛ- Filisikɔʋn dhi ʋa yʋbʋ aˈ ˈbhlʋa jie bho po. ˈKlaa Israɛkɔʋn -ˈnʋʋn -nɩn ˈo ʋʋ -kman Zoova aˈ dɩ. Ʋbʋ aˈ dhueˈ mɔn -nɩn Manoa. Ɔ se ˈˈɲnuun ˈbhle. -Zɔn dhueˈ ˈsʋ ɛ, Zoova dhbhoɛ dhbhozuu dhueˈ ˈdhe Manoa aˈ ˈɲnɔn bho. Dhbhoozuu ˈnaan: ‘Aa muɛn ˈˈjhu -ɲmau ˈghwlʋ. Ɔmɔn- -ˈye Israɛkɔʋn zeie- ˈdhe Filisikɔʋn ˈkwa. Ɔɔ muɛn nazirɩɛn -nɩn.’ Jhibho- ɲʋn ɲɔn ɔn ˈdhaa nazirɩɛn ˈmɛn? Ɛ nɩn ɲʋn -ʋʋ -poɛ- ˈfɔ bho Zoova aˈ dhbho ɔˈ dɩ. Nazirɩɛn -ˈˈwe aˈ cɛn ʋaˈ ˈˈmɩɩn-.

Nɔnˈˈ -pla zia, Manoa -e ɔɔˈ ˈɲnɔn ˈghwlʋɛ ˈˈjhu -ɲmau ˈˈdhe ʋʋ ˈdhɔɔ- Samʋnsɔn. Samʋnsɔn ˈbhɛaˈ a, Zoova ˈˈɲɩɔnˈˈ ˈˈɩkman-. Ɔ ˈbhɛɛˈ ɔ ˈye ɔɔˈ sɩn anˈ ˈsʋ nʋn ɔ ˈye -blaa ˈdhbha! -Zɔn dhueˈ ɛ, ɔɔ ˈsʋ ˈdhbha Filisikɔʋn anˈ 30. Filisikɔʋn ˈɲɛɔnˈ ˈmʋn ˈmɛn ˈˈdhe ʋa ˈbɔn ɔɔˈ ˈdhbha i. ˈˈMaʋnglu dhueˈ -da Samʋnsɔn nɩan ˈmʋanˈ ˈbho Gaza ɛ, -ˈmɛn ʋbʋ a ˈfuɔ ˈbho ˈˈkwiglɔ ɔˈ -kluu ˈˈŋwɛn -wɛeˈ ʋʋ ˈyeɔ ˈdhbha -glaeˈ pɛɛn. ˈKlaa ˈbho ˈˈmaʋnglu aˈ gwɛa, Samʋnsɔn -sɔn ˈmʋn ˈmɛn ˈˈdhe ɔ muɛn ˈo ˈˈkwiglɔ ɔˈ -kluu ˈˈjhibhaˈ -wɛeˈ ɔ -za ˈo ʋanˈ kluu. Ɔ pʋ ˈbho ɔɔˈ kpaaghwu ˈˈkpe ˈsʋ ɔ ˈye ˈe trʋ dhueˈ ˈˈdhru ˈjha ˈbho Ebrɔn ˈˈbun!

Ɛɛ ˈbhɔɔa ˈbho ɛ, Filisikɔʋn muɛn ˈe Samʋnsɔn ɔnˈ ˈdhaiˈˈ -ɲnʋnkpaoˈ ɲɔn ɔn ˈdhaa Dalila bho ˈˈdhe ʋʋ ˈnaan: ‘-Aa muan ʋn ˈtamanˈˈ ˈjhɔ ɔˈ 5.500 ˈˈɲɩn-, -bho a ˈtmʋʋn -aʋ -da ɔɔ za ɔɔˈ ˈˈɩkman -ˈnɛn ɛnˈ. -Aa ˈbɔn -a ˈyeɔ kpʋn -a ˈyeɔ gazo ˈdhi po.’ Dalila a ˈbɔn ˈghwɛi ˈsʋ ʋn ˈŋwɔɔn- ˈbho ˈmɛn. ˈBho -deenanˈ an, Samʋnsɔn ˈse ˈbɔn ɔ ˈyʋ ˈtmʋʋn -dhe -da ɔɔˈ ˈˈɩkman an ˈghwlʋa. ˈKlaa ʋn ˈnɛɔn ˈˈmlan ˈjɛɛn- ˈsʋʋ ɛɛ ˈbhɔɔa ˈbho ɛ, ɔ -tɔɔn ʋn ɔɔˈ ˈsrɛ ˈmɛn. Ɔ ˈnaan: ‘Ɲɔn ˈse ˈman ˈˈmɩɩn cɛn kpɔ dhueˈ dhɛ nɩan ˈo ɛ, ˈɩn nɩɛn nazirɩɛn. ˈKlaa -bho ɲɔn cɛn ˈman ˈˈmɩɩn ɛnˈ, ˈɩn ˈse ˈˈɩkman- in -dheeka.’ Samʋnsɔn ˈsʋ ɛɛˈ dhɛ tu ˈtmʋʋn- dhi -dhe!

Dalila ˈˈdooˈ ʋn ye Filisikɔʋn ˈtmʋʋn-: ‘ˈƖn jhibho ɔɔˈ ˈsrɛ ˈmɛn!’ Ʋn poɛ Samʋnsɔn ˈɲɩnɔnˈˈ ˈbho ʋanˈ ˈkɔi ˈˈdhru -wɛeˈ ʋn ˈtmʋʋn ɲɔn dhueˈ -ɔ cɛn Samʋnsɔn ɔnˈ ˈˈmɩɩn-. ˈˈDhe ʋn ˈˈghwɔ: ‘Samʋnsɔn, Filisikɔʋn paˈ!’ Samʋnsɔn -sɔn ˈmʋn ˈmɛn ˈˈdhe ɔ se ˈkpɩ ˈbhle -dheeka. Filisikɔʋn kpʋɔnˈ, ʋʋ ghwa ɔɔˈ ˈˈjhri ˈmɛn ˈˈdhe ʋʋ poɔ -gazo ˈdhi.

-Zɔn dhueˈ ɛ, Filisikɔʋn -duuˈˈ ˈgboo- dhi ˈdhe ʋaˈ gela- ʋa ˈdhaa Dagɔn ɔnˈ ˈˈgbu ˈdhi ˈˈdhe ʋa ˈˈghwɔ ʋʋ ˈnaan: ‘-Aaˈ gela nʋɛnˈ -a ˈye Samʋnsɔn kpʋn! Aʋ jhɔ da! -Wɛeˈ -a -nɩn ɔ ˈye ˈˈjhai vɔn dhɛ ˈˈzaan.’ Ʋʋ poɔ ˈo ˈˈgbu aˈ -ˈgbɩ ˈsɔɔn ˈɲnɩn ˈˈdhe ʋa ghwlɔɔ. Samʋnsɔn bhae ɔ ˈnaan: ‘Oo Zoova, -kɔngɩnˈ ˈˈɲɩn ˈʋn ˈˈɩkman- -kenɛnˈ kpɔ dhueˈ gbai.’ Ɛɛ nʋʋan, -ˈmɛn Samʋnsɔn ɔnˈ ˈˈmɩɩn ˈghwlʋʋ -dheeka. ˈˈDhe ɔ ˈˈtun ˈˈgbu aˈ -ˈgbɩ -ˈnɩn ˈdhe ɔɔˈ ˈkpɩ aˈ klɛɛ ˈmʋn. ˈˈGbu -ˈnʋn anˈ klɛɛ bhluˈ, ɲʋn anˈ klɛɛ nɩan ˈe ʋn ˈdhi ˈmɛɛnˈ. Samʋnsɔn ˈmɛɛn -ke.