ˈBheɔ Davidɩ ɔˈ dhɛsaʋn-

Sailɩ ˈmɛan ˈsʋ ɛ, Davidɩ ˈkpa ˈbheɔ. Ɔ ˈbhleɛ zɩn anˈ 30 -dhe. -Zɩn pla -zia, ɔ nʋɛn dhɛsaʋn- klaaˈˈ dhueˈ. -ˈˈJiejhrubho -zɔn dhueˈ ɛ, ɔɔ nain -dhɛ ˈˈzaan -dhe ˈdhe ɔɔˈ ˈˈgbu ˈˈdhru. Ɔ ˈjheɛ ˈɲnʋnkpaoˈ -ʋn -nmɔn ˈˈjhrii ˈjɛɛn-. Ɔ deeɛ- ɲʋn in -wɛeˈ -da ˈɲnʋnkpaoˈ -ˈnʋn ˈghwlʋa ɔ ˈye ˈo jhibho-. Ʋanˈ ˈɲnɩn -nɩn Bɛsabe, ɛ nɩn ˈsʋlaiˈˈ- dhueˈ -ɔɔˈ ˈɲnɩn nɩan Uri ɔˈ ˈɲnɔn. Davidɩ jhʋ ˈdhe ɔɔˈ ˈbheɔgbu ˈdhi. Ɔ -nɩn ʋn pɛn in ˈsʋ ʋn ˈbhleɛ ˈˈkwli. Davidɩ ɔ ˈbɔn ɔ ˈye dhɛ ɔ nʋan i ˈˈdu -dhe. Ɔ ˈtmʋʋɛn- ɔɔˈ ˈsʋlɩˈˈ aˈ ˈˈdhrujhei- ɔ ˈnaan: Nʋɛn Uri ˈye ˈe ˈsʋlɩˈˈ aˈ ɲan -kɔn, -bho aʋa sa tʋ vɔn -mɛnˈ aʋ -zaa kɩn -wɛeˈ ɔɔˈ ˈsʋ ˈye ˈe ɲan -sie-. Ɛ nʋɛnˈ ɲʋn ye Uri dhbhaˈ. ˈBho ɛ ˈdhe ɛ, Davidɩ ˈˈdhuɛ- Bɛsabe ˈmʋn ʋn ye ɔɔˈ ˈɲnɔn ˈkpa.

Dhɩsaɩn anˈ klɛɛ Davidɩ nʋan, Zoova ˈjhɩɩ. Dhɛwɛ- Zoova ˈye nʋn -ɛn? Ɔ dhbhoɛ ɔɔˈ ghwlukwajhaai- Natan ˈdhe Davidɩ bho. Natan -ghwluɛ- ˈe Davidɩ bho ɔ ˈnaan: ‘ˈˈJhu dhueˈ muan ˈsʋ ɔ ˈbhleɛ ˈbhlaajhu- dhueˈ gbai -ʋn dɩ ɔ -kman ˈjɛɛn-. ˈSʋ ˈˈghwliɛjhei -klaaˈˈ dhueˈ -ɔ ˈbhlea ˈbhlaeˈ -duuˈˈ ɛ, ɔ ˈˈjhri ˈˈjhu -ˈnɔn ɔnˈ ˈbhlaajhu nɩan dhueˈ ˈmɛn.’ Davidɩ ˈŋwɔan -bo -ˈnɔn ɔn, ɔ ˈkpa ˈcɛn ˈjɛɛn- -wɛeˈ ɔ ˈnaan: ‘ˈˈGhwliɛjhei -ˈnɔn ɔn, ɲʋn ˈyeɔ dhbhaˈ!’ ˈSʋ Natan ˈnaan: ‘ˈˈGhwliɛjhei -ˈnɔn ɔn, ɛ nɩn -mɔn.’ Ɛ nʋɛnˈ Davidɩ ˈˈzruuˈ ˈjɛɛn- ˈˈdhe dhɛsaʋn- ɔ nʋan ɔ jhibhɛ ˈˈɩ -wɛeˈ ɔ ˈnaan: ‘ˈƖn nʋɛn dhɛsaʋn- ˈbho Zoova ˈˈjhibhaˈ.’ Dhɛsaʋn Davidɩ nʋan -ˈnɛn ɛnˈ dɩ ɛ, ɔmɔn -e ɔɔˈ ˈˈgbuzɔncɛ ˈjhe ˈkledɩ- -duuˈˈ. Zoova -za Davidɩ kplɩn kwai, ˈklaa ɔ ˈseɔ dhbhaˈ dhɛ nɩan ˈo ɛ, ɔ jhibhɛ- ɔɔˈ dhɛsaʋn ˈˈʋn ˈˈdhe ɔɔ jha ɔɔˈ ˈˈjɛ jha.

Davidɩ ɔ ˈbɔn ɔ ˈye ˈˈgbu klaaˈˈ dhueˈ po -ʋn ˈdhe ˈdhi ɲʋn ˈye Zoova ˈˈɲɩn. ˈKlaa Zoova ˈnaan ɛ nɩn ɔɔˈ ˈˈjhu Salomɔn -ˈye ˈˈgbu -ˈnʋn po. ˈSʋ Davidɩ ˈnaan: ‘Salomɔn -nɩɛn- ˈˈjhu ˈˈzaan ke, Zoova aˈ ˈˈgbu ɛ, ʋn ˈye ˈˈjhriinmɔn-. ˈYe dhɩ -ˈyea ˈˈgbu -ˈnʋn po kpɔ ɔˈˈ po -wɛeˈ ˈyeɔ sʋn bho po.’ Ɔ -toɛ ˈo ˈghwɛi -duuˈˈ -ɩn ˈye ˈˈgbu -ˈnʋn po, ɔ ˈbɔɛnˈ dhbhonʋʋn- jhibha dhbho ɔˈ nʋanˈ in -kajɔɔnka. Ɔ ˈgbooɛ- ˈsanʋnˈ -e ˈghwɛi dhi. Ɔ -za ti ɲʋn an ˈdhaa sɛdrɩ ˈdhe Tii -e Sidɔn ɔnˈ. Davidɩ ɔˈ ˈmɛan an ˈˈkʋaan in ɛn, -ka ˈˈgbu -ˈnʋn ˈyea -pooɛ sʋn nʋn ɛn, ɔ -tɔɔɛn ɔɔˈ ˈˈjhu Salomɔn ˈmɛn. Ɔ -ghwluɛ- ˈdhe ɔ ˈbho ɔ ˈnaan: ‘Ɛ nɩn Zoova po ˈʋn jie bho -wɛeˈ ˈɩn tri ˈˈgbu nʋn, -faʋn anˈ nʋn ʋn -dhe. Ɔɔ muɛn ʋn sʋn bho -po, -ˈbhle ˈkpɩ ˈˈdhe nʋn dhbho -kajɔɔnka.’