Tʋvɔin -e ˈɲnʋnkpaoˈ -jhu ˈˈzaan dhueˈ -e

ˈƝnʋnkpaoˈ -jhu ˈˈzaan dhueˈ ˈghwlʋaˈ Israɛ ɛ, ʋn ˈˈtiɛˈˈ ˈe Siribhlʋa aˈ, ʋn -tɛɛn ʋanˈ ˈcɛ bho. Sirikɔʋn anˈ ˈSʋlɩˈˈ kpʋn -ʋʋ zʋ ˈbho Israɛ ɛˈ. -Kaanka bhla, ʋan nʋɛn dhbho ˈdhe Naamanɩn -ɔ nɩan ˈsʋlɩˈˈ aˈ ˈˈdhrujhei- bho ˈˈgbu. Ʋan ˈˈɲɩɛnˈˈ Zoova, ˈklaa ɲʋn anˈ klɛɛ jhiʋ ˈdhei ʋaˈ ˈˈɲɩn Zoova.

ˈNaamanɩn ˈbhleɛ jhau -ghwɛ, ɛɛˈ ˈghwɛ tu ɛ, ɛɛ poɛ jiˈˈ ˈbho ɲʋn anˈ ku ˈˈkpe ˈˈdhe ɩanˈ jiˈˈ tu a ˈˈghweeˈ. ˈƝnunkpaoˈ -jhu ˈˈzaan -ˈnʋn an ˈbɔn ˈjɛɛn ʋn ˈyeɔ sʋn bho po. Ʋn -ghwluɛ- ˈdhe ɔɔˈ ˈɲnɔn bho ʋn ˈnaan: ‘ˈƖn jhibhɛ- ɲɔn -ɔ ˈbhɛɛˈ ɔ ˈye aaˈ -kʋan sʋn bho po. Ɔɔˈ ˈɲɩn -nɩn Elize. Ɛ nɩn Zoova aˈ ghwlukwajhaai-. Ɔ ˈˈtiɛˈˈ ˈdhe Israɛ -bhlʋaˈ.’

Naamanɩn ɔnˈ ˈɲnɔn ˈtmʋn dhɛ ˈˈjhu ˈˈzaan ˈtmʋan ˈmɛn ˈdhe ʋanˈ -kʋan bho. Dhɛ ooˈˈ dhɛ Naamanɩn ˈyea nʋn -wɛeˈ ɔ ˈyea ˈpʋ ɛ, ɔ -nɩɛnˈˈ ɔ ˈyeɛ nʋn. Ɛmɛndɩ ɔ mun ˈdhe Israɛ -bhluaˈ ˈdhe Elize bho. ˈBho ɔ -gwlɩˈˈ -dhe ɛ, -mɛnˈ Elize ˈyeɔ sɩn ˈsɔɔn -kpʋʋn -ka ɲɔn ɔnˈ -kpʋan ɲɔn klaaˈˈ sɩn ˈsɔɔn. ˈKlaa ˈbho ɛɛˈ gɔˈ ˈˈɩ ɛ, ɔ dhbhoɛ ɔɔˈ dhbhonʋʋin- -ɔ mun Naamanɩn ˈˈɩ ˈjhaa- ˈnan. -Wɛeˈ ɔ -ghwlu ˈdhe ɔ bho ɔ ˈnaan: ‘Mun -ˈye -dhre -kpɛ -ˈmɛsɔnˈ ˈbho Zudɛn nin ŋwɔn -wɛeˈ -ˈye ˈpʋ.’

Naamanɩn ˈŋwɔan ɛɛˈ dhɛ tu ɛ, ɛ dhbhɔˈ ˈkpɩ i. -Wɛeˈ ɔ ˈnaan: ‘ˈBho ˈo -gwlɩˈˈ -dhe ɛˈ, Ɲɔnsoa aˈ ghwlukwajhaai ˈye -bhae- -aeˈˈ ɔ ˈye ʋnˈ sɩn ˈˈkpe -jhaa -wɛeˈ ˈman jhau ghwɛ ˈye mun. ˈKlaa ɔ ˈseanˈ nʋn ɔ ˈnaan ˈɩn mun ˈye -dhre ˈbho Israɛkɔʋn anˈ ˈˈnin ŋwɔn. -Mɛnˈ ˈɩn se ˈbhɛɛ- ˈye -dhre ˈdhe ˈˈnin nɩan ˈe Siri iˈ ŋwɔn -dhe?’ ˈˈNɩanˈˈ nɩan ˈdhe -a ˈˈbhli ɛ, ɩn ˈdha dhɛ ɩn ye ʋaˈ ˈˈnɩanˈˈ -zii. Naamanɩn ˈkpa ˈcɛn ɔ ye ˈdhe Elize ˈbho ˈghwlʋ.

Naamanɩn ɔˈ dhbhonʋʋn- -ghwluɛ ˈdhe ɔ bho ʋʋ ˈnaan: ‘Seɛ ˈˈɩ -nɩn -ˈye dhɛ ooˈˈ dhɛ nʋn ˈˈdhe -ˈye ˈpʋ? Dhɛ Ɲɔnsoa aˈ ghwlukwajhaai- deea mun in -ɛ sea ˈˈɩkman- an, dhɛɛdɩ- se ˈbhɛɛ- -ˈyeɛ ˈdɩn -ɛn?’ Naamanɩn poɛ ʋaˈ ghwlu -dheinˈˈ bho. Ɔ muɛn ˈbho Zudɛn nin ŋwɔn ˈˈdhe ɔ ˈkpa ˈbho ɛ ŋwɔn -kpɛ -ˈˈmɛsɔnˈ. Ɔɔ ˈˈsiaˈˈ ˈzɔn kpɛ ɛɛˈ -ˈˈmɛsɔnˈ -nɛn ɛn, ɔ ˈpʋʋˈ. Ɛ ˈbhleɛ ɔɔ ˈmʋnan ˈsʋ ɔ muɛn ˈdhe Elize bho dhe -wɛeˈ ɔ poɔ ˈsɛ-. Ɔ -ghwluɛ ˈdhe ɔ bho ɔ ˈnaan: ‘ˈƖn jhibhiˈ -ka Zoova aˈ ˈsʋ nɩan Ɲɔnsoa.’ ˈBhoo- -gwlɩˈˈ ˈdhee Naamanɩn ˈpʋa -wɛeˈ ɔ jhia dhe ɛ, ka ɛ nɩn ˈbho Israɛ -ɲnʋnkpaoˈ -jhu ˈˈzaan -ˈnʋn -gwlɩˈˈ -dhe -ɛ?