Ɛsitɛɛ ˈpʋʋ- ʋanˈ ˈcɛ ˈmɛn

Ɛsitɛɛ -nɩɛn Zifʋ -ɲnʋnkpaoˈ -jhu ˈˈzaan -ʋn ˈˈti ˈo Pɛsɩkɔʋn- anˈ ˈˈkwiglɔ- ɲʋn an ˈdhaa Sizɩ ˈdhi. Ɛɛ nʋɛn -zɩn -duuˈˈ bhla, Nabukodonozɔɔ -za ʋanˈ ˈcɛ ˈdhe Zelizalɛmʋn. Ʋanˈ ˈˈbho ɔˈ ˈdhoudhi ɔˈ ˈˈjhu Madose nɩan Pɛsɩkɔʋn- anˈ ˈbheɔ ɔˈ dhbhonʋin -mɔn ˈbhɔaʋ.

ˈBheɔ Asierisɩ ɔ ˈbɔn ˈɲnɔn -dhee -dhe. Ɔɔˈ dhbhonʋʋn jhɔ ˈɲnʋnkpaeˈ nmɔan ˈˈjhrii ˈjɛɛn ˈbho ɔɔˈ ˈbheɔglɔ ˈdhi. Ɛsitɛɛ -nɩn ˈdhe ʋbʋ ˈˈklu ˈmɛn. ˈDhe ˈɲʋnkpaeˈ -ˈnʋn anˈ klɛɛ ˈˈklu ɛ, Ɛsitɛɛ -mʋn ˈBheɔ za oˈ -ʋn ˈye ɔɔˈ ˈɲnɔn -nɩn. Madose ˈnaan Ɛsitɛɛ ɛˈ ˈtmʋʋn- ɲɔn ooˈˈ ɲɔn -dhe -ka ʋn nɩan Zifʋ ɛ.

ˈBheɔ ɔˈ dhbhonʋʋn- -klaeˈˈ aˈ ˈˈdhrujhei nɩan ˈo -dhe ɛ, ɔɔˈ ˈɲɩn -nɩn Amanɩn. Ɔɔ ˈbhɛɛ ɔɔˈ ˈˈjɛ ˈˈɩ -dhe. Ɔɔ ˈbɔn ɲʋn anˈ klɛɛ ˈye ˈˈdhru glu po ˈbho ɔ ˈˈjhibhaˈ. Madose ɔˈ po ˈˈdhru glu ˈbho Amanɩn ˈˈjhibhaˈ. Ɛ ˈbhleɛ Amanɩn ɔnˈ ˈcɛn ˈjɛɛn ˈsʋ ɔɔ ˈbɔn ɔ ˈye Madose ˈdhbha. Amanɩn ˈŋwɩɩn -ka Madose nɩan Zifʋ ɛ, ɔ poɛ dhɩ kpɔ ɔˈˈ -wɛeˈ ɔ ˈye Zifʋ -ˈˈwe aˈ klɛɛ nɩan ˈo ˈbhlʋa ˈdhi ˈdhbha. Ɔ -ghwluɛ ˈe ˈbheɔ bho ɔ ˈnaan: ‘Zifʋ -ˈˈwe -nɩɛn ɲʋnsaɩn-. -ˈYʋbʋ i -za.’ Asierisɩ ˈnaan: ‘Nʋn dhɛ -man ˈbɔan.’ Ɔ ˈŋwɔɔn- ˈbho ˈmɛn -ke ɔ ˈye ˈo ˈtee -dhee i de. ˈTee -dhee Amanɩn dea ˈo dhi ɛ, ɛ ˈnaan ɲʋn ˈdhbha Zifʋ -ˈˈwe ˈbho Adaa -cʋ aˈ ˈghwɩn aˈ 13 zɔn ˈˈkpe. Zoova a ˈjhe dhɛ -ɛɛ nʋʋan ˈmɛn -dhe.

-Ka ɲʋn dea ˈo ˈtee -ˈnɛn in -dhe ɛ, Ɛsitɛɛ sɩ jhibho-. Ɛɛˈ dɩ Madose kpʋ ɛɛˈ ŋwʋn dhueˈ ˈˈdhe ɔ ˈnaan: ‘A mun a ˈye ˈdhe ˈbheɔ bho -ghwlu.’ Ɛsitɛɛ ˈnaan: ‘Ɲɔn ooˈˈ ɲɔn ˈbheɔ ˈsea ˈdha -wɛeˈ -ɔɔ muan ˈbho ɔ ˈˈjhibhaˈ a, ɲʋn an ˈdhbhɔ ɔˈ. ˈBheɔ ˈsea ˈʋn ˈdha a, ɛɛ nʋɛn ˈghwɩ aˈ 30 bhla! -Bho ɛ -nɩn kaˈ mɔn -dhe ɛˈ, ˈman ye ˈe mun. -Bho ɔ -to ˈʋn ɔɔˈ ˈbheɔkɔu- ˈˈɩ ɛˈ, ˈman muɛn ˈkmʋn -sie-. -Bho ɔ seɛ nʋn -ke ɛˈ, ˈman muɛn ˈmɛn-.’

Ɛsitɛɛ pa ˈe ˈbheɔgbu aˈ ŋmɛinˈˈ -jhriiɛ ˈdhi. ˈBheɔ ˈjhʋ ɛ, ɔ tʋ ɔɔˈ ˈbheɔkɔu ˈˈɩ. Ʋn ˈkpaa ˈbho ɔ ˈˈbun ˈˈdhe ɔ dee ʋ dhi ɔ ˈnaan: ‘Ɛsitɛɛ, dhɛwɛ- ˈɩn ˈbhɛɛ ˈye nʋn ˈye aʋn ˈˈɲɩn -ɛn?’ Ʋn ˈnaan: ‘ˈMan ˈbɔn -nɩn Amanɩn ˈye fɛtɩ dhueˈ ˈmʋn jhi.’ ˈBho fɛtɩ -ˈnɛn ˈmʋn ɛn, Ɛsitɛɛ ˈnaan ʋʋ jhi fɛtɩ -ˈnɛɛn ˈmʋn -kenɛnˈ. Ʋʋ jhia fɛtɩ aˈ ˈsɔɔn nɛn ˈmʋn ɛn, ˈbheɔ deeɛ ʋn dhi -kenɛnˈ ɔ ˈnaan: ‘Dhɛwɛ- ˈɩn ˈbhɛɛ ˈye nʋn ˈye aʋn ˈˈɲɩn -ɛn?’ Ʋn ˈnaan: ‘ˈDhe nɔnˈˈ dhɛzaanˈˈ ˈdhi ɛ, ɲɔn dhueˈ -ɔɔ mun ˈmɔn -e ˈman ˈcɛ ˈdhbhaa-. -Kɔngɩnˈ ˈpʋʋ- -abʋ.’ ˈBheɔ deeɛ- ʋn dhi ɔ ˈnaan: ‘-Ɔɔ ˈbɔn -ɔ ˈye aʋn ˈdhbha -a?’ Ʋn ˈnaan: ‘Ɛ nɩn Amanɩn, ɲɔnsaʋn- nɔn.’ Asierisɩ ˈkpa ˈcɛn ˈjɛɛn- ˈsʋ, ˈbho ɔ ˈˈsi ɔ ˈnaan ɲʋn ˈdhbha Amanɩn.

ˈKlaa ɲɔn ooˈ ɲɔn se ˈbhɛɛ- ɔ ˈye Amanɩn ɔnˈ ˈtee i -za. ˈBheɔ mɔn ɔnˈ ˈˈjɛ seɛ ˈbhɛɛ-. ˈSʋ ˈbheɔ poɛ Madose ɔɔˈ dhbhonʋʋn- -klaeˈˈ aˈ ˈˈdhrujhei- ˈˈdhe ɔ ˈŋwɔɔn ˈbho Madose ye ˈo ˈtee -dhee i de. ˈTee Madose dea ˈo dhi ɛ, ɛ nʋɛnˈ Zifʋ -ˈˈwe ˈbhɛɛˈ ʋʋ ˈye ʋaˈ ˈˈjɛ bho ˈghwlʋ -zɔn ɲʋn an muan ʋbʋ bho -pa a. ˈBho Adaa -cʋ aˈ ˈghwɩ aˈ 13 zɔn ˈˈkpe ɛ, Zifʋ -ˈˈwe kpa -zibhoˈ ˈbho ʋaˈ ˈmʋnɲɛʋn ˈˈkpe. -Ɛ ˈghwlʋa ˈo -dhe ɛ, ʋa poɛ ɛɛˈ fɛtɩ zʋn ooˈˈ zʋn.