Elizabɛtɩ ˈghwlʋɛ ˈˈjhu -dhee

Zelizalɛmʋn glɔ ɔˈ -bhleˈ -pooa bhla a, ɛɛ nʋɛn zɩn anˈ 400. ˈSraazai- dhueˈ -ɔɔˈ ˈɲnɩn nɩan Zakari -e ɔɔˈ ˈɲnɔn Elizabɛtɩ ˈˈtiɛˈˈ ˈo Zelizalɛmʋn ˈˈbun. Ʋʋ ˈˈtiia ˈˈbhli ɛ, ɛɛ nʋɛn -zɩn -duuˈˈ klaaˈʋʋ ˈse ˈˈjhu ˈghwlʋ. -Zɔn dhueˈ ɛ, Zakari ɔ poɛ ansan ˈˈjhri ˈdhe Ɲɔnsoa aˈ ˈˈgbu -klaaˈˈ aˈ -da nɩan ˈpepeˈ ˈdhi, ˈsʋ dhbhoozuu Gabliɛ -ŋwaan ˈbho ɔ ˈˈjhibhaˈ. -Faʋn an nʋn Zakari ˈmɛn ˈklaa Gabliɛ -ghwluɛ- ˈdhe ɔ bho ɔ ˈnaan: ‘-Faʋn anˈ nʋn ʋn -dhe. ˈƖn ˈbhleɛ -bɔyaˈˈ -dɩ -ɩn ˈghwlʋ ˈe Zoova bho ˈman ˈbɔn ˈye ʋn ˈtmʋʋn-. -Manˈ ˈɲnɔn Elizabɛtɩ a muɛn ˈˈjhu -ɲmau ˈghwlʋ-, aʋ ˈyeɔ Zan ˈdhaa. Zoova zɔ ˈo ˈmɛn -wɛeˈ ɔ ˈye dhbho nɩan ɔɔˈ -nɛn ka nʋn.’ Zakari ˈdeeɔ i ɔ ˈnaan: ‘-Kawɛ ˈye -mɛnˈ ɛnˈ dhɛ tu -gwlɩˈˈ de -ɛ? ˈMɔn -e ˈman ˈɲnɔn -a ˈkpa gɩlɩˈˈ -a se ˈbhɛɛ- -a ˈye ˈˈjhu ˈghwlʋ.’ Gabliɛ ˈnaan: ‘Ɛ nɩn Ɲɔnsoa dhbho ˈʋn -wɛeˈ ˈye ʋn -bɔyaˈˈ -dɩ -ˈnɩn ˈtmʋʋn-. ˈKlaa -jɛn sɩ -gwlɩˈˈ de ɛ, ˈse -ghwlu i ˈsʋ ɛ ˈye ˈˈjhu -dhee -ˈnɔn ɔnˈ ˈghwlʋaˈ -jhɛɛ.’

ˈDhe ɲɔnsoagbu- klaaˈˈ aˈ -da nɩan ˈpepeˈ ɛ, Zakari -gwle ˈe ˈmɛn ɛ ye -ka ɔɔ nʋan see -zii. Ɛɛ ˈbhɔɔa ˈbho ɔ ˈˈsiaˈˈ ˈzɔn ɔn, ˈcɛ ɛ ˈbɔn ʋʋ ˈye dhɛ zia ˈdhe Ɲɔnsoa aˈ ˈˈgbu aˈ -da nɩan ˈpepeˈ i ˈŋwɔn. ˈKlaa Zakari se ˈbhɛɛ- ɔ ˈye -ghwlu. Ɔɔ poɛ -jeɩ dhi, ˈcɛ ɛˈ klɛɛ ˈjheɛ ˈˈkpei -ka Ɲɔnsoa ghwlua ˈdhe ɔ bho ɛ.

Elizabɛtɩ ˈbhleɛ kwliˈˈ ˈˈdhe ʋn -ŋmaanˈ ʋn ˈghwlʋɛ ˈˈjhu -ɲmau -ka dhbhoozuu nʋan ɛɛˈ ˈtmʋn sʋn ɛn. Ʋanˈ ˈˈdhai -ˈˈwe -e ʋanˈ ˈcɛ -ˈˈwe a jhiɛ ˈdhe ʋn bho ʋa yea ˈˈjhu -dhee ˈjhea jhi. ˈMʋnan an nʋn ʋbʋ ˈmɛn ˈjɛɛn-. Elizabɛtɩ -ghwlʋɛ- ˈdhe ʋbʋ bho ʋn ˈnaan: ‘Ɔɔˈ ˈɲnɩn -mɩn -nɩn Zan.’ Ʋʋ ˈnaan: ‘Ɲɔn -ɔ ˈyea ˈɲnɩn -ˈnɩn ˈbhle ˈdhe -aaˈ ˈˈgbuzɔncɛ ˈˈklun ɔ se -nɩn. Aʋ ˈdhɔɔ Zakari, -ka ɔɔˈ ˈˈbho nɩan.’ ˈSʋ Zakari ˈˈdhuɛ- dhɛ ˈmʋn ɔ yeɛ ˈˈkpei ˈcre: ‘Ɔɔˈ ˈɲnɩn -nɩn Zan.’ ˈBhomɔn-, Zakari -dee -ghwluaˈ -kenɛnˈ! Ɲʋn anˈ klɛɛ nɩan ˈo Zide ɛ, ʋʋ ˈŋwɔn ˈˈjhu -dhee -ˈnɔn ɔnˈ bo ˈmɛn. -Taiˈ ˈˈmaan- ʋbʋ ˈmɛn ˈsʋ ʋa deeɛ ʋaˈ ˈˈjɛ i: ‘Dhɛwɛ- ˈˈjhu -dhee -ˈnɔn ɔn mun ˈkpa -a?’

Ɲɔnsoa aˈ -zuu ˈˈjhi ˈe Zakari ˈmʋn ˈmɛn ˈˈdhe ɔ -dee dɩ ɲan -zaaˈ, ɔ ˈnaan: ‘Zoova aˈ ˈɲnɩn ˈye ˈˈɩ ˈbhɛ. Ɔ cɛn ghwlu ˈdhe Ablaamʋn bho, -ka ɔɔ muan ɲʋnpʋʋi -jha a. Zan an muɛn ghwlukwajhaai- -nɩn ˈˈdhe ɔ ˈye ɲʋnpʋʋi ɔˈ -jie ˈkpa po.’

ˈƝnʋnkpaoˈ dhueˈ -ʋanˈ ˈɲnɩn nɩan Mai -ʋn ˈghwlʋa ˈe Elizabɛtɩ aˈ ˈˈgbuzɔncɛ ˈˈklun ɛn, dɩ -jhii ʋn dhi -ke -ɩan- ˈˈmaan ɲʋn -taiˈ. Dɩ -ˈnɩn -mɩn -aa mun ˈjhee- ˈdhe -bo -ɔɔ jhia ˈdhi.