Samali ˈɲnɔn ˈbho ˈˈninbhie ˈˈdhru

Pakɩ ɛˈ fɛtɩ gwɛa jha, Zezi -e ɔɔˈ dhɛcɩaʋn -jhiiɛ- Samali i -wɛeˈ ʋʋ ˈye Galile dhe mun. Ʋʋ ɲnian ˈo Sisaa -glɔ ˈˈbun ɛn, Zezi -ɲnan in ˈbho -da dhueˈ ɲɔn ɔn ˈdhaa ‘Zakɔbʋ ɔˈ ˈˈninbhie-’. Ɔ nɩan fɔanˈ ˈbhomɔn ˈsʋ ɛ, ɔɔˈ dhɛcɩaʋn muɛn dhiidhɛ -dɩanˈ ˈdhe ˈˈkwiglɔ- ˈdhi.

ˈƝnʋnkpaoˈ dhueˈ jhi ˈˈnin -jriaˈ. Zezi -ghwluɛ- ˈe ʋn bho ɔ ˈnaan: “A ˈˈɲɩn ˈʋn ˈˈnin ˈye ˈnan.” Ʋn -ghwluɛ- ˈe ɔ bho ʋn ˈnaan: ‘Dhɛɛdɩ- -man ghwlu ˈdhee bho -ɛ? ˈƖn -nɩɛn- Samali ˈɲnɔn. See -dhe ɛ, Zifʋ -ˈˈwe aˈ ghwlu ˈe Samalikɔʋn bho.’ Zezi -ghwluɛ- ˈe ʋn bho ɔ ˈnaan: ‘-Bho a jhibho- ɲɔn ˈɩn nɩan -dhe ɛˈ, aa muɛn ˈʋn ˈˈnin ˈjhbhaa- ˈˈdhe ˈyea ʋn ˈˈnin -ɛɛ ˈˈɲɩanˈˈ ɲʋn ˈkmʋnɩɛn- ˈˈɲɩn.’ ˈƝnʋnkpaoˈ -ˈnʋn deeɔ i ʋn ˈnaan: ‘-ˈMɛn -kawɛ -man ˈbɔn -ˈye ˈdha -a?’ ‘Se -zouˈˈ ˈbhle mɔn -ke.’ Zezi ˈnaan: ‘Ɲɔn -ɔn ˈnan ˈˈnin ˈman ˈˈɲɩɔn ɔn, ˈˈnin ˈnantʋn ˈseɔ -nʋn in -dheekaˈ -flɛ.’ ˈSʋ ˈƝnʋnkpaoˈ -ˈnʋn ˈnaan: “-ˈˈɲɩn ˈʋn ɛɛˈ ˈˈnin tu.”

-Wɛeˈ Zezi -ghwlu ˈdhe ʋn bho ɔ ˈnaan: ‘A ˈdha aaˈ -kʋan ɔ ˈye jhi.’ Ʋn ˈnaan: ‘ˈƖn se -kʋan ˈbhle.’ Ɔ -ghwluɛ- ˈe ʋn bho ɔ ˈnaan: ‘A ˈtmʋɛn ˈtɔdɩ-. A ˈˈtiɛˈˈ jhela- kpɛ -mmˈˈ -dhe, ˈˈdhe -jɔn -nɩn a deai -kaanbhla, ɔ se aaˈ -kʋan -nɩn -ke.’ ˈƝnʋnkpaoˈ -ˈnʋn ˈnaan: ‘-Nɩɛn- ghwlukwajhaai-! ˈˈDhe ʋn de ˈo ʋn ˈnaan: ˈMan ˈcɛ deɛ -gwlɩˈˈ -ka -a ˈbhɛɛa -a ˈyea Ɲɔnsoa ˈˈɲɩn ˈbho trʋ nʋn ˈˈkpe ɛ, ˈklaa Zifʋ -ˈˈwe ˈnaan ˈbho Zelizalɛmʋn ɛnˈ ˈsʋ -mɔn ɲʋn ˈye Ɲɔnsoa ˈˈɲɩn-. ˈBho ˈmɔn -gwlɩˈˈ -bho Ɲʋnpʋʋi- jhi ɛˈ, -ka -a ˈyea Ɲɔnsoa ˈˈɲɩn sʋn nʋn ɛn, ɔɔ muɛn -aʋ ˈtmʋʋn-.’ ˈSʋ Zezi ˈtmʋʋn dhɛ ɔ ˈsea ɲɔn ˈtmʋʋn- kpɔ dhueˈ ɔ ˈnaan: ‘ˈMɔn- -nɩn Ɲʋnpʋʋi-.’

ˈƝnʋnkpaoˈ -ˈnʋn ˈˈdooˈ ʋn ye -glɔˈ dhe mun ˈˈdhe ʋn ˈtmʋʋn- ɲʋn ʋn ˈnaan: ‘ˈBhoo -gwlɩˈˈ ɛ, ˈɩn ˈjhe Ɲʋnpʋʋi ˈmɛn. Ɔ jhibho- dhɩ aˈ klɛɛ ˈmɛn ˈdhe ˈman dɩ ˈdhi. Aʋ jhi aʋ ˈyeɔ ˈjhe!’ Samalikɔʋn bhla ˈbho ʋn ˈdhe ʋʋ ye -da ˈˈninbhie nɩan ɲnin ˈˈdhe ʋʋ po dɩ Zezi ɔ tɔɔan ɲʋn -dheinˈˈ bho.

Ʋʋ ˈtmʋʋn- Zezi ˈmɛn ɔ ˈye ˈo ʋaˈ glɔ ˈdhi -sie-. Zezi -tɔɔn ʋbʋ dhɩ ˈdhe ˈghwɩ ˈsɔɔn ˈdhi, ˈsʋ ʋaˈ -daduuˈˈ deɔ -gwlɩˈˈ. Ʋʋ -ghwluɛ- ˈe ˈɲnʋnkpaoˈ -ˈnʋn bho ʋʋ ˈnaan: ‘-A poa ˈˈjhu -ˈnɔn -dheinˈˈ bho -kaan, -a ˈjheɛ ˈˈkpei ˈmɛn ˈjɛɛn- -ka ɔ nɩan ˈbhlʋa aˈ klɛɛ ɛˈ ˈpʋʋi- ɛ.’