Zezi ˈpʋʋɛ- ɲɔn ˈbho Saba -zɔn ˈˈkpe

Faiziɛn -ˈˈwe ˈɲɛn Zezi ˈmʋn ˈmɛn ˈˈdhe dhɛ ʋʋ ˈyea i -jhii- -wɛeˈ ʋʋ ˈyeɔ kpʋn ɛn, ɛmɛn ʋa ˈbɔn in. Ʋʋ ˈnaan ɔ ˈse ɲʋn ˈghwɛ ɛ nʋan ˈpʋʋ i -dhe ˈbho Saba zɔn ˈˈkpe dhɛ nɩan ˈo ɛ, ɛ nɩn -gwle -ghwɩ. ˈBho Saba -zɔn dhueˈ ˈˈkpe ɛ, Zezi ˈjheɛ ˈˈjhu dhueˈ -ɔɔˈ ˈjhei ˈˈdhe -ɔɔ zrɔ ˈghwɛi ˈbho -jieˈˈ. Ɔ -ghwluɛ- ˈe ɔɔˈ dhɛcɩaʋn bho ɔ ˈnaan: ‘Aʋ -ŋmʋn -ka Ɲɔnsoa aˈ ˈˈɩkmaan- an muan ˈˈjhu -ˈnɔn sʋn bho -po ɛ.’ Zezi ˈˈbheeɛ- ˈbhlʋ -e ɔɔˈ tɔn ˈˈjhrii -wɛeˈ ɔ nʋn ˈpɔɔ, ˈˈdhe ɔ ˈˈdhuɔ ˈmʋn ɔ triɔ ˈo ˈˈjhu -ˈnɔn ɔnˈ ˈˈjhri ˈˈkpe. -Wɛeˈ ɔ -ghwlu ˈdhe ɔ bho ɔ ˈnaan: ‘Mun -ˈye ˈˈjhrii ˈsran ˈbho ˈˈnin ɲɔn ɔn ˈdhaa Siloe ŋwɔn.’ ˈˈJhu ˈsran ˈˈjhrii ˈmɛn ˈˈdhe ɔmɔn- ˈsea i ˈjhe -kpɔ dhueˈ ˈdhe ɔɔˈ ˈkmʋn ˈdhi ɛ, ɔɔ ˈjheɛi bhla.

-Taiˈ ˈˈmaan- ɲʋn nɩan ˈo ˈmɛn ˈjɛɛn-. Ʋʋ ˈnaan: ‘Ɛ se ˈˈjhu -ɔɔ zrɔa ɲʋn ˈghwɛi bho -nɩn daa, -aeˈˈ ɲɔn -ˈnɔɔn -nɩn ɔn gʋʋɔ -ɔ?’ ˈˈJhu -ˈnɔn -ghwluɛ- ˈe ʋbʋ bho ɔ ˈnaan: ‘Ɛ nɩn ˈmɔn-! ˈMan ˈdhou ˈghwlʋa ˈʋn ɛn, ˈmaan ˈjhe i -dhe!’ ˈSʋ ɲʋn an deeɔ i ʋʋ ˈnaan: ‘Dhɛɛdɩ- -manˈ ˈˈjhri se ˈˈdhɔ -dheeˈ ka -a?’ Dhɛ -nʋʋan- ɔ ˈtmʋʋn ʋbʋ ˈsʋ ɛ, ʋʋ kpɔ ˈe faiziɛn -ˈˈwe bho.

ˈˈJhu -ˈnɔn ˈtmʋʋn- faiziɛn -ˈˈwe ˈmɛn ɔ ˈnaan: ‘Zezi triɛ ˈpɔɔ ˈbho ˈman ˈˈjhri ˈˈkpe -wɛeˈ ɔ ˈnaan ˈɩn mun ˈye ˈˈjhrii ˈsran. Ɛmɛn- ˈɩn nʋn, ˈˈdhe ˈman ˈjheɛ i -kaan bhla.’ Faiziɛn -ˈˈwe ˈnaan: ‘-Bho Zezi ɔ sa ɲʋn ˈpʋʋ ˈbho Saba -zɔn ˈˈkpe ɛˈ, -ˈmɛn ɔɔˈ ˈˈɩkman- -ˈnɛn se ˈe Ɲɔnsoa bho ˈghwlʋ.’ ˈKlaa ɲʋn -ˈnʋʋn ˈnaan: ‘-Bho ɔɔˈ ˈˈɩkman- -ˈnɛn se ˈe Ɲɔnsoa bho ˈghwlʋ -dhe ɛˈ, -ˈmɛn ɔ se ˈbhɛɛ- ɔ ye ɲʋn ˈpʋʋ- -kaˈ.’

Faiziɛn -ˈˈwe ˈdha ˈˈjhu -ˈnɔn ɔnˈ ˈcɛ ˈmɛn ˈˈdhe ʋʋ dee ʋbʋ i ʋʋ ˈnaan: ‘Dhɛwɛ- -nɩn ˈo -wɛeˈ aʋaˈ ˈˈjhu -ˈnɔn ɔn ˈjhei -dheeˈ ka bhla -a?’ -Faʋn- an nʋn ɔɔˈ ˈcɛ ˈmɛn dhɛ nɩan ˈo ɛ, faiziɛn -ˈˈwe ˈtmʋɩn see -dhe -ka ɲʋn dea Zezi -gwlɩˈˈ ɛ, ʋa muɛn ʋbʋ i -nʋn ˈdhe zifʋ -ˈˈwe aˈ ˈˈdhruigboogbu- ˈdhi. ˈSʋ ʋbʋ ˈnaan: ‘-A se ˈo dhɛˈˈ jhibho-. Aʋ dee- ɔɔˈ ˈˈjɛ i.’ Faiziɛn -ˈˈwe deeɛ- ˈˈjhu -ˈnɔn in kpɛ -duuˈˈ ˈsʋ ɔˈnaan: ‘ˈƖn ˈtmʋʋn aʋ dhɩ aˈ klɛɛ ˈɩn jhibhaˈ ˈmɛn. Dhɛɛdɩ- aʋa kpa ˈman in deeɛ- ɲan -an?’ Faiziɛn -ˈˈwe kpa ˈcɛn ˈˈdhe ʋʋ nʋɔn in.

Zezi muɛn ˈe ˈˈjhu -ˈnɔn bho ˈˈdhe ɔ deeɔ i ɔ ˈnaan: ‘De Ɲʋnpʋi- -gwlɩˈˈ ˈmɛn?’ ˈˈJhu -ˈnɔn -ghwluɛ- ˈe ɔ bho ɔ ˈnaan: ‘-Bho ˈɩn jhibhɔ ɔˈ, man muɔn -gwlɩˈˈ de.’ Zezi ˈnaan: ‘ˈMɔn -nɩn Ɲʋnpʋi-.’ Zezi -toɛ- ˈdhiŋwɔnmɔɛn- ˈjɛɛn-! Ɔ ˈse ˈo ˈˈjhu -ˈnɔn ɔnˈ ˈpʋʋɛ ɛˈ ˈsʋ ˈˈkpe ˈˈtii-. ˈKlaa ɔ poɔ sʋn bho -ke ɔ ye dhɛgwlɩdeɛ- ˈbhle.