-Zii -ˈnɩɩn ˈse Ɲɔnsoa ŋwɔn ˈjhe ˈdhe jhaʋn ˈdhi

-Zii aˈ klɛɛ Ɲɔnsoa nʋan -dhe ɛ, ɩn -nmɔn ˈdhi ŋwɔn. ˈKlaa -zuu dhueˈ -nɩn ˈe -zii -ˈnɩn ˈˈklun -ʋn -ˈse Ɲɔnsoa ɲwɔn ˈjhe. Ɛ nɩn Ɲɔnsaʋn- Satan. Satan an ˈbɔn ɲʋn ˈyeɔ ˈˈɲɩn ˈˈdhe ɲʋn ˈye Zoova ˈkpʋ ˈˈɩto-. -Kɛ nʋan zi sʋn ɛn, ˈka ka:

ˈDhe Edɛnɩn gle ˈdhi ˈdhe- ɛ, ti a poɛ ˈˈbhi ˈdhɔɛe, -ɩn -nɩn dhi ka. Zoova ˈtmʋʋɛn Adan -e ɔɔˈ ˈɲnɔn Ɛvʋ, ɔ ˈnaan ʋʋ ˈbhɛɛˈ ʋʋ ˈye ɩanˈ ˈˈbhi dhi. ˈKlaa tu dhueˈ -nɩn ˈo -ʋanˈ ˈˈbhuo Ɲɔnsoa ˈnaan ʋaˈ dhiˈ -dhe. Ɔ ˈnaan -bho ʋʋ dhiɔ ɔˈ, -kɛ ˈjhe ɛ nɩn- ɛnˈ, ʋa muɛn ˈmɛn-.—Gbɔ I Deˈan 2:9, 16, 17.

-Zɔn dhueˈ ˈsʋ ɛ, Ɛvʋ -nɩɛn- dhueˈ. ˈBhomɔn- sɛn -ghlu ˈe ʋn bho. ˈKlaa ɛ se sɛn ɛnˈ ˈˈjɛ mɛn- -ɛn ghlu nɩn-, ɛ Ɲɔnsaʋn- Satan mɔn- -jhii sɛn in -wɛeˈ -ɔɔ ghlu ˈe Ɛvʋ bho. Ɔ ˈnaan -bho ʋn dhi tu -ʋanˈ ˈˈbhuo Ɲɔnsoa ˈnaan ʋaˈ dhiˈ -dhe ɛˈ, -ka Ɲɔnsoa nɩan tɔˈ ˈdhi ɛ, ˈka ʋan mun nɩn- -ke. -Kenɛnˈ ɛn, ɔ ˈnaan ʋn ˈse ˈmɛn in. Dhɩ aˈ kpɛ ˈsɔɔn -ˈnɩn ɔ ˈtmʋan an, ɩn se tɔˈ dɩ nɩn-, ɛ sɩ -ˈwo. ˈKlaa ɛɛ ˈbhɔɔa ˈbho ɛ, Ɛvʋ bhla ˈo Satan anˈ ghlu ˈdhe ʋn ye tu -ˈnʋn anˈ ˈˈbhuo dhi. Adan jhia a, ʋn ˈˈɲɩɔnˈ ɔ yeɔ dhi -ke.—Gbɔ I Deˈan 3:1-6.

Dhɛ zia ˈbho Edɛnɩn gle ˈdhi ɛ, ɛɛ toɛˈ -ka Satan nɩan ɲɔnsaʋn- ˈˈdhe ɔ nɩan sɩtmʋin ɛn. Ɔ ˈnaan -bho Ɛvʋ -bhlaa Ɲɔnsoa aˈ ghlu ŋwɔn ɔnˈ, ʋn ˈse ˈmɛn- in. Dhɛ ɔ ˈtmʋan -ˈnɛn ɛn, ɛ se tɔˈdɩ nɩn-. Ɛvʋ -e Adan ˈbhɔɔɛ ˈmɛan. -Bho Satan -ˈmɔn se ˈmɛn mɔn ˈdhe- ɛ, ka ˈˈoo ka aˈ, ɔɔ muɛn ˈmɛn- ˈdhe ˈkmʋn anˈ ɲan. Dhɛnʋɛn ɛn, ɔ nʋɛn dhɛsaʋn-. Ɔɔ kpa ɲʋn ˈsrɛipooɛ- ɲan ˈmɛn ˈzɩan -ke. Ɔ -nɩɛn- sɩtmʋin-, -ɔɔ -ˈˈtun ɲʋn -wɛeˈ ʋʋ ˈye Ɲɔnsoa aˈ ˈtee ŋwɔn -bhlaa.—Zan 8:44.

Dhbhoozii- -ˈnɩɩn bhla ˈo Satan ˈdhe

Nɔnˈˈ -ziia- ˈbho ɛ, dhbhoozii- -ˈnɩɩn ˈkpa ˈe dhɛsaʋn- ˈdhi. Ɩn -ŋmʋɛn- ˈɲnʋnkpaeˈ nmɔan ˈˈjhrii jha da ˈbhlʋa ˈˈkpe ˈsʋ ʋaˈ ˈbɔndɩ ˈkpa ˈe ɩn ˈdhi. Ɩn jhiɛ da ˈbhlʋa ˈˈkpe -wɛeˈ ɩn ˈˈdhuo- -glɔɲiɔn- ku ˈmʋn ˈˈdhe ɩn ˈˈdhuo- ˈɲnʋnkpae ˈmʋn. Dhɛ ɩn nʋan an, ɛ ˈse Ɲɔnsoa -gwliˈi -nmɔɔn.—Gbɔ I Deˈan 6:1, 2; Zudɩ 6.

ˈƝnʋnkpaeˈ ɩn ˈˈdhua ˈmʋn ɛn, ʋʋ nɩn- ɩn ˈghlʋɛ ˈˈɲnuun-. ˈKlaa ˈˈɲnuun ʋʋ ˈghlʋa a, ɛ se ˈˈɲnuun ˈjɛʋn nɩn-. Ʋʋ ˈbhɛa ˈˈɩ ˈsʋ ʋʋ ˈkpa ˈgba klaeˈ, -ʋʋ -tɛn jha, -ʋʋ -ɲnin ˈdhi ŋwɔn, -ʋaˈ klɛɛ nɩn- ŋwɔn -zanzan-. Ɛɛˈ dhɛ tu -jha ˈkledɩ- -duuˈˈ da ˈbhlʋa ˈˈkpe. Dhɩsaɩn- ˈkpa ˈˈkpe da ˈbhlʋa ˈˈkpe ˈjɛɛn- ˈsʋ Zoova ˈnaan ɔ ˈyeɛ nʋn ˈˈnin klaaˈˈ ˈye dhbha ɛ ˈye ɲʋnsaɩn- iza-. ˈˈNin -ˈnɛn dhbha a, Noe -e ɔɔˈ ˈcɛ ɛˈ ˈsʋ -sie- ˈkmʋn.—Gbɔ I Deˈan 6:4, 11; 7:23.

ˈˈNin ɛn dhbha a, -ziisaɩn- -ˈnɩn pleˈ ɩn ye ˈe jhaʋn ˈdhi dhemun. ˈKlaa Ɲɔnsoa pʋɩ ˈfɔ bho. Ɔ ˈse ɩanˈ dɩ ˈŋwɔɔn- ˈdhe ɔɔˈ dhbhoozii- -ˈsrɛa ˈˈɩ ˈˈklun ˈbhodhe. Ɔɔˈ ˈˈtai dhi dheeˈka -ke ɩanˈ ˈkpa -glɔɲiɔn. Zoova a mun iza- ˈdhe dhɩ aˈ klɛɛ ɛˈ ˈpee ˈjhe nɔnˈˈ.—2 Piɛɛ 2:4; Zudɩ 6.

Satan -pooɛ- ˈzɔn

Tʋ dhueˈ -vɔɛn- ˈdhe jhaʋn ˈdhi ˈnɔn -aaˈ nɔnˈˈ. Biiblʋ aˈ ˈsɛɛ- ɲɔn ɔn ˈdhaa Gbɔˈwlʋdhɩ- ɛ, ɛmɛn- -ˈtmʋn ʋanˈ dɩ. -Kɛ ˈdhaa ˈka ka: “Tʋ ˈkpa ˈnɔ jaʋn ˈdhi, Misɛlɩ [-ɔ nɩan Zezi Klisɩ] e ɔɔ dhboozuia kpa dhɔsɛ [Ɲɔnsaʋn-] ˈˈbhli tʋ-. -Wɛˈ dhɔsɛ e ɛɛ dhboozuia vɔn nyʋ ˈna we. Ʋ se zibhoˈ kpa, ʋ se -dɩanˈ ˈbhle ˈnɔ jaʋn ˈdhia ˈdjɛ. Dhɔsɛ klaaˈˈ ˈkpa ˈzɔn, sɛ sʋa-, -ɛ ʋa ˈdhaa- Ziɔn, Satan a, -ɛɛ ˈˈbhiia- ˈbhlʋa-kɩnnyʋa ˈˈdhru i ɛ, ɛ ˈˈvilɔnˈ ˈbhlʋa- kɩn -gba, ɛ mɔ e ɛɛ dhboozui e.”

Dhɛ ɛ po ˈo -ɛ? Dhɛ -ˈtmʋan -kenɛnˈ ɛ ka: “Ɩn ˈkpa ˈmʋna-ˈ jaʋn-, ɛ mɔn e nyʋ ˈˈtia ˈɔn e.” ˈMʋnan an nʋn dhbhoozii- ˈjɛɩn ˈmɛn. Dhɛbhleɛ ɛ, Satan -e ɔɔˈ -ziisaɩn- -pooɛ- ˈzɔn, ɩn se ˈe jhaʋn ˈdhi nɩn- dheeˈka. Ka ɲʋn nɩan ˈnɔn ˈˈkpe ʋaˈ dɩ ˈpɛn -ɛn? Biiblʋ ˈnaan: “ˈBhlʋa- e ˈˈjbo e, ˈcro ˈdho ɩn we, dhɛbhleɛ Ziɔn ˈdrɩn ˈdhe ɩn we, ɔ ˈbhle ˈcɛn klaaˈˈ, ɔ juˈan -ka ɔɔ ti sa ˈˈdhru tɛɛn.”—Gbɔˈwlʋdhɩ- 12:7-9, 12.

Satan -e ɔɔˈ ˈdhenaʋn-, ɲɔn ɔn ˈdhaa -ziisaɩn- ɛn, ʋa pooɛ ɲʋn ˈsrɛ i, ʋa ˈˈduɛ ɲʋn ˈkle. Ʋʋ -nɩɛn- Ɲɔnsoa aˈ ˈmʋɲɛʋn-. Ʋaˈ klɛɛ -ɲniɛn- ˈdhi ŋwɔn.