ˈKmʋn -dhee -a jhi

Satan -e ɔɔˈ -ziisaɩn- ˈse -glɔɲiɔn- ɔnˈ ˈsrɛipooɛ- ɲan -kpa i. Zoova pʋbʋ ˈzɔn ˈdhe tɛnˈˈ kmʋn ˈdhi, ʋʋ ye ˈe jhaʋn ˈdhi ˈghlʋ. (Gbɔˈwlʋdhɩ- 12:9) -Kenɛnˈ ɛn, ˈdhe nɔnˈˈ -dhɛ ˈˈzaan ˈdhi ɛ, Ɲɔnsoa a muɛn ʋbʋ dhɛ -dhee -ˈnɛɛn ˈˈjhrii nʋn-. Dhɛ dhbhoi- Zan ˈjhea ˈdhe jha ˈdhi -wɛeˈ ɔ ˈtmʋan an, ɛ ka: “ˈˈƖn ˈje dhbhoozuu ʋa ˈwlʋ ˈe jɛiˈˈ, ʋ ˈbhle [ˈˈbhie ɛˈ] kwɛnˈˈ, -wɛ ʋ ˈbhle -gbaacɛeˈ kwa. Ʋ kpɩɛn dhɔsɛ-, sɛ sʋa-, -ɛ -nɩa [Ɲɔnsaʋn-], Satan a, -wɛˈ ʋ sɛn ˈdho zʋɩan ˈˈwlu we. Ʋ poɛ ˈe [ˈˈbhie] ˈdhi. Ʋ kan ˈo, -wɛˈ ʋ po saan ˈdhoɛ kɩn, ˈdhoɛ wɛinˈˈ, -wɛˈ ɛ -sɔ ˈˈbhii- nyʋ dhiiˈ-, gbɔɔˈdjɛ zʋɩan ˈˈwlu ˈye ˈgba.” (Gbɔˈwlʋdhɩ- 20:1-3) ˈBho ɛ ˈdhe ɛ, Ɲɔnsaʋn- -e ɔɔˈ -ziisaɩn- an muɛn i-zaa, ɩn ˈse inɩn- in dheeˈka.—Gbɔˈwlʋdhɩ- 20:10.

Ɲʋnsaɩn- nɩan da ˈbhlʋa ˈˈkpe ɛ, ʋa muɛn i-zaa -ke.—Psaume 37:9, 10; Lukɩ 13:5.

Ɲʋn -ˈmɛan an, ʋa muɛn ˈkmʋndhejhi-!

-Bho Satan -e ɔɔˈ -ziisaɩn- -zaa i ɛˈ, Zoova a muɛn ɲʋn anˈ klɛɛ ˈˈdhiman -po. Dhɛ -a -ˈŋwɔan in ɛn, ɛmɛn- -nɩn ɲʋn -ˈmɛan an, ʋʋ se -da ˈˈo da nɩn-. Zezi pooɛ- ˈmɛan ˈˈɲɩnɔn ˈˈɩn, ˈˈɲɩnɔn- ɲɔn ɔnˈ jha jha ˈdhe ˈdhi ɛ. (Zan 11:11-14) Dhɛnʋɛn -wɛeˈ ɔ ˈdha kaˈ a, ɛmɛn- -nɩn ɲʋn -ˈmɛan an, ʋa muɛn ˈkmʋndhejhi- -ka ɲɔn -ɔn -ˈmʋan anˈ sɔan ˈˈɲɩnɔn ɔn. -Kɔ ˈdhaa ˈka ka: “Tia nyniˈ, -wɛˈ nyʋ klɛɛkpɛ -nɩa ˈdhe nymae ˈdhi [...] ˈye ˈzɔn ˈˈsi.”—Zan 5:28, 29; poo- ɛmɛn -e Nʋʋdhɩ- 24:15 ˈˈɩn.

Ʋa muɛn ˈkmʋn dhe -jhaa da ˈbhlʋa nɔn ˈˈkpe. ˈZɩan an, ɲʋn an ˈmɛan anˈ -ghwɛe- -manɩanˈ ɲʋn an po. ˈKlaa ɛ ˈse ˈan nɩn- in dheeˈka. ˈDhe ɛɛˈ nɔnˈˈ tu ˈdhi ɛ, ɲʋn anˈ ˈkmʋndhejhiɛ- ɛˈ -bɔyaˈˈ -boi- ɲʋn ˈye po ˈdhe ˈmʋnan ˈmʋn! -Aaˈ ɲʋn -ˈmɛan an, ʋa ˈˈɩˈjhaa- a muɛn ˈmʋnan dɩ nɩn- ˈjɛɛn-!