ˈBhlʋa a muɛn -Bɔyaˈˈ -deɩn- ˈkpa-

Ɲʋn anˈ kpɛ ɛˈ klɛɛ ʋa dhi dhɛ da dhueˈ ˈdhe ˈkmʋn -dhee ˈdhi

Dhɩsaɩn- anˈ klɛɛ Satan nʋan da ˈbhlʋa ˈˈkpe ɛ, Zoova a muɩn iza-. Zoova deɛ ˈo Zezi i ɔ ˈye ˈBheɔ nɩn- da ˈbhlʋa aˈ klɛɛ ˈˈkpe. ˈDhe ɔɔˈ ˈbhlʋa aˈ jebhopoaˈ a, ɔ ˈyeɛ nʋn ˈbhlʋa aˈ klɛɛ ˈye -bɔyaˈˈ -deɩn- ˈkpa.—Daniel 7:13, 14; Lukɩ 23:43.

Dhɩ -ɩanˈ ghlu Zoova cɛan ɔ ˈyea nʋn ɛn, ɩn ka:

DHIIDHƖ A MUƐN ˈˈƖDI- ˈJƐƐN-: “ˈBhlʋa a muɛn -nmɔn. Ɲɔnsoa, -aaˈ Ɲɔnsoa a muɛn -aʋ- -bɔyaˈˈ ˈˈɲɩn-.” “Dhɩjhɔ ɔ muɛn isie- da ˈbhlʋa ˈˈkpe. Dhɩ a muɛn -nmɔn ˈdhe trɩ ˈˈdhru kpɔˈ.”—Psaume 67:6; 72:16.
TƲ ˈSE ˈKPA- I DHEEˈKA: “Aʋ jhi ˈjhe ˈman ˈcɛ, dhɩ Zoova a nʋan, -ka ɔɔ nʋan dhɩ klaeˈˈ klaeˈˈ aˈ nʋn sʋn da ˈbhlʋa ˈˈkpe ɛ. Ɔ -ɲnaan tʋ i da ˈbhlʋa aˈ klɛɛ ˈˈkpe.”—Psaume 46:8, 9.
ƝƲNSAƖN- ˈSE INƖN- IN: “Dhɛsaʋnʋʋn- an muɛn ˈnɔn ˈkmʋn ˈghlʋ-. [...] ˈˈDhe ˈdhe nɔnˈˈ -dhɛ ˈˈzaan ˈdhi ɛ, ɲʋnsaɩn- ˈse inɩn- in. -Man muɛn ˈo ʋaˈ -deɩnˈ mun- ˈsʋ ʋʋ ˈse ˈo nɩn- in.”—Psaume 37:9, 10.
ˈGHWƐ -E ˈˈZRUA -E ˈMƐAN ˈSE INƖN- IN: “ˈDhe nɔnˈˈ -ˈnɔn ˈdhi ɛ, ˈˈdhɔʋn anˈ ˈˈjhri a muɛn ˈgbai-, ɲʋn ˈˈsuan an, ʋaˈ dheinˈˈ an muɛn ˈgbai-. ˈDhe nɔnˈˈ -ˈnɔn ˈdhi ɛ, ɲʋn -klɔa a, ʋa muɛn -delɔ- ɔˈ dhɩ jha iˈjhasʋn ˈbhle-, ˈˈdhe ɲɔn sea ghlu ˈbhle ɛ, ɔɔˈ -mɩɔʋn an muɛn ˈˈjha iˈˈghwɔɔ- ˈdhe ˈmʋnan ˈmʋn.”—Isaïe 35:5, 6.

Nyɔsoaa ˈdjɛkpa ˈyʋ we nɩ-. Ʋa Nyɔsoa nɩˈ. Nyɔsoa ˈyʋ ˈˈmii- tɛnˈˈ klɛɛkpɛ ˈˈjrii- ˈsran, -nɛˈ ˈmɛɛ- se nɩ i -nɛˈ, ˈˈviɛn- se nɩ i -nɛˈ, zrɛ se nɩ i, wwliaˈˈ ˈˈwooɛ- se nɩ i, dhɛnʋɛ -zɛiˈˈ dhɩ ziˈ.”—Gbɔˈwlʋdhɩ- 21:3, 4.

-Ka Satan -e ɔɔˈ -ziisaɩn- nɩan an, Zoova se ˈan nɩn-, ɔɔˈ ˈtmʋn sɩ. Dhɩ aˈ klɛɛ -ɩanˈ ghlu ɔ cɛan an, ɩan muɛn ˈo -ɲnin ˈˈkpɔkpɔ. (Lukɩ 1:36, 37) Zoova -kman -manˈ dɩ, ɔɔ ˈbɔn ˈbhlʋa ɔɔ muan -Bɔyaˈˈ -deɩn- po ɛ, -ˈye ˈe ɔ ˈdhi nɩn-. -ˈMɛn dee- Zoova aˈ -Bobhlaʋn- dhi ʋʋ ˈye -ʋn tɔˈdɩ- ˈdhɔɛe nɩan ˈe Ɲɔnsoa aˈ Ghlu ˈdhi -tɔɔn. -Bho -man sa ˈo tɔˈdɩ- -ˈnɩn ˈdhe bhla ˈdhe -manˈ ˈkmʋn ˈdhi ɛˈ, -ˈse sɩ aˈ -kʋɔn- nɩn- in. -Bho nɔnˈˈ ɲnin ɛnˈ, -ˈse ˈe dhɛsaʋn- -e ˈmɛan anˈ -kʋɔnˈ kwlaˈ nɩn- in dheeˈka. -Ka Zezi ˈtmʋɩn ɛn, ˈka ɛɛ mun nɩn-. Ɔ ˈnaan: “Ɩan mue dɩa ˈˈtein juo-, -wɛˈ dɩa ˈˈtein ˈye ɩn kiin -flɔɔn.”—Zan 8:32.