-Bho mun ˈe -aaˈ ɲɔnsoagbu ˈdhi ɛˈ, dhɛ -man mun ˈo ˈjhee- -ɛ?

-Da -duuˈˈ ˈbhɔ ɲɔnsoagbi ˈdhii mun- dɩ ˈmɛn, dhɛ nɩan ˈo ɛ, ɲɔn -ˈyʋbʋ sʋn bho po ˈˈdhe ʋʋ ˈyea ɲɔnsoadhɛ iˈŋwɔn ɔn, ɔ se nɩn-. Ʋaˈ ˈjhee- ˈdhe -pɛɛ ɛˈ bhluaˈ -ke. -Bho aʋ jhi ˈe Zoova aˈ -Bobhlaʋn- anˈ ɲɔnsoagbu ˈdhi ɛˈ, dhɛ aʋa mun ˈo ˈjhee- -ɛ?

ˈMʋnan- nɩan ˈe ˈcɛ kman bha aˈ dɩ ˈˈdhe -ʋa- ˈˈdua bha aˈ dɩ ˈˈklun ɛn, ɔmɔn- -man mun ˈjhe-. ˈDhe tɛnˈˈ kletiɛn -ˈˈwe aˈ nɔnˈˈ ɔn, ʋa ˈgbooɛ ˈˈdhrui ˈˈdhe ʋa ˈˈɲɩn Ɲɔnsoa, ʋa ˈcɩan ɔɔˈ Ghlu -wɛeˈ ʋa po bha ˈkpɩ. (Eble 10:24, 25) -Bho ʋʋ nɩn- -da dhueˈ ɛˈ, ˈmʋnan- -nɩn ˈo. Dhɛ nɩan ˈo ɛ, ʋaˈ ˈdhoudhi -ɲmai- -e ˈdhoudhi -ɲnʋnkpaeˈ -nɩn ʋbʋ nɩan ˈe ɲɔnsoadhɛ ˈdhi ɛ, ɛ -jhbhɛɛʋn- ˈjɛʋn-. (2 Tesalɔsɩ 1:3; 3 Zan 14) Kletiɛn -ˈˈwe nɩan tɛnˈˈ -ˈnʋn ɛn, ʋaˈ ˈgɔ -aa naan ˈe ˈdhi. Ɛɛˈ dɩ ˈmʋnan- ʋa ˈjhea -dhe ɛ, -aa -ˈjheɔ -ke.

-Ka ɲɔn ɔn nʋan Biiblʋ aˈ ˈsrɩn ˈˈjhriɛ ˈˈdu sʋn ɛn, ɛmɛn- -ˈye iˈŋwɔn. ˈDhe tɛnˈˈ kmʋn ˈdhi -dhe ɛ, ˈɲnʋnkpaeˈ -e ɲmai -e ˈˈɲnuun- mɩɩnˈˈ -e, -ʋʋ nɩan Ɲɔnsoa aˈ ˈcɛ ɛ, ʋaˈ klɛɛ ɛ ˈgbooɛ ˈˈdhrui -da dhueˈ. ˈkamɔn- -aa nʋn ˈzɩan -ke. Ɲʋn jhibha Biiblʋ -kajɔɔnka a, ʋa poɛ -aʋ- sʋn bho ˈˈdhe -ka ɲɔn ɔn nʋan Biiblʋ aˈ ˈsrɩn anˈ ˈˈjhriɛ ˈˈdu sʋn ˈdhe ɔɔˈ ˈkmʋn ˈdhi zɔn ˈˈoo zɔn ɔn, -aa -ˈŋwɔɛn in. (Deutéronome 31:12; Nehémia 8:8) ˈDhe -aaˈ ɲɔnsoagbu ˈdhi ɛ, ɲɔn ˈˈoo ɲɔn ˈbhɛɛˈ ɔ ˈye -ghlu, ɔ ˈye bhle, ˈˈdhe -ka ɔ ˈbhlea dhɛgwlɩdeɛ- ɛ, ɔ ˈyeɛ -to.—Eble 10:23.

-Manˈ ɲɔnsoadhɛ ɛ muɛn iku-. Ka Pɔʋ ˈdha ka ˈdhe ɲɔnsoagbu- dhueˈ bho: “ˈˈAn wwlʋaˈ ˈbɔn ˈˈɩn ˈye ɩn ˈje. [. . .] Ɛ mɔ -nɩ ɩn mɔ e ˈˈmɔ e dhɛwwlideɛ -a ˈbhlea -gba a, ˈdheɛ ˈdhi ɛ, ɩn mɔ e ˈˈmɔ e -a ˈye ˈkpɩ ˈʋn ˈkpa -da dhueˈˈ.” (Wlɔm 1:11, 12) -Da dhueˈ -nɩɛn- ɛn kuuɛ -aaˈ dhɛgwlɩdeɛ- i, ɛɛ poɛ -aʋ- ˈkpɩ -a -ˈye kletiɛn ɛnˈ -nansʋn anˈ dɩ ikpʋn. Ɛmɛn- dɩ -aa ˈgboo ˈˈdhrui jheejhee.

-Aa -ˈdha -ʋn ˈmɛn -ˈye ˈe -aaˈ ɲɔnsoagbu ˈdhi jhi ˈdhɔɔ -ɔɔ jhia ˈˈdhe dhɩ aˈ klɛɛ -a -ˈtmʋan -kaan an, -manˈ ˈˈjɛ ˈyɩ ˈjhe. Ɲʋn an muɛn -ʋn sɩn ˈsɔɔn -kpʋʋn. -Aaˈ ˈˈdhruigboɛ- ɛˈ klɛɛ se geiˈˈ -za dhɩ nɩn-, ɲɔn ɔnˈ -za ˈghwɛi -ke.

• Ɲʋnwɛ- -ɛˈ ˈgɔ -aa naan ˈe ˈdhi ˈdhe -aaˈ ˈˈdhruigboɛ ɛˈ dɩ ˈdhi -ɛ?

• Dhɛ -aa -ˈjhe ˈdhe -aaˈ ˈˈdhruigboɛ ˈmʋn -ɛn?