Dhbho -wɛ ɲankɔʋn- an nʋn ˈdhe ɲɔnsoagbu ˈdhi -ɛ?

-A se ɲʋnklaeˈˈ ɲɔn ɔn za geiˈˈ ˈbhle ˈdhe -aaˈ -glibha- ˈdhi. ˈDhe kletiɛndhɛ ɛˈ -deenanˈ -dhe ɛ, ˈˈjhriɛbhoduʋn- -an ˈˈdu ‘ɲɔnsoagbu aˈ dɩ.’ ˈKamɔn- ɛ nɩn- ˈzɩan -ke. (Nʋʋdhɩ- 20:28) Ɲankɔʋn- -ˈnʋn ɛn, ɛ ɲʋn -ʋaˈ ɲɔnsoadhɛ kui, -ʋʋ -kɔn ˈe ɲɔnsoagbu aˈ ɲan, -ʋa- pʋ je bho. -Bho ʋa seɛ nʋn ɛnˈ, ‘ʋaˈ sie -pɛɛ dhe, ʋa za -glʋˈ ˈkwla, ʋaˈ kpʋn dɩn ghwɛiˈ, ɛ nɩn dɩ -ˈˈsi ʋbʋ ˈˈɩ.’ (1 Piɛɛ 5:1-3) Dhbho -wɛ ʋa nʋn ʋa ˈˈɲɩn -aʋ -ɛ?

Ʋa fuɛ -aʋ- ˈdhe i, ʋa ˈˈduɛ -aaˈ dɩ. Ɲankɔʋn- an poɛ ɲɔnsoagbu je bho, ʋa ˈˈduɛ ʋanˈ ɲɔnsoadhɛ ɛˈ dɩ. -Ka ɛ nɩan Ɲɔnsoa -ˈˈɲɩn ʋbʋ dhbho -ˈnɔn ɔn, ɲankɔʋn- jhibhiˈ. Ɛɛˈ dɩ ʋaˈ ˈjha ɔɔˈ ˈcɛ ˈˈdhru. ˈBho ɛɛˈ ˈgɔ ˈˈɩ ɛ, ʋa nʋɛnˈ -aaˈ ˈkmʋn an yea -kajɔɔnka nɩn- -aa yea ˈmʋnan ˈjhe. (2 Kolɛntɩ 1:24) -Ka ɲɔn ɔn jhibha ɔɔˈ -nɩnandhɩ aˈ klɛɛ ɛ, ˈkamɔn- ɲankɔʋn an po ˈe ˈkpɩ ʋa jhibho ɲʋn anˈ klɛɛ nɩan ˈe ɲɔnsoagbu ˈdhi.—Iibhlaadhɩ- 27:23.

Ʋa tɔɔn -aʋ Ɲɔnsoa aˈ -glʋˈdɩ-. ˈDhɔɔ ˈˈoo ˈdhɔɔ ɔ, ɲankɔʋn- an poɛ ɲɔnsoagbu aˈ ˈˈdhruigboɛ- je bho -wɛeˈ ʋa kuu -aaˈ dhɛgwlɩdeɛ- i. (Nʋʋdhɩ- 15:32) Ɲankɔʋn- kuɛ i ɛ, ʋa ziɛ ˈe -bobhladhbho ɔˈ ɲan, ʋʋ nɩn- -aa bhla -bo -da dhueˈ ˈˈdhe ʋa kuu -aʋ dhi ˈdhe -bobhlasʋn anˈ kpɛ ɛˈ klɛɛ ˈdhi.

Ʋa poɛ -aʋ ˈkpɩ dhueˈ ˈdhue. -Bho ɲankɔʋn- ˈye -aʋ- ˈkpɩ po ˈdhe ɲɔnsoadhɛ ˈdhi ɛˈ, ʋa jhiɛ ˈe -a bho ŋmɛinˈˈ. -A -ˈbhɛɛˈ -a -ˈye ˈjhee- -ke ˈdhe ˈBheɔglɔ ɔˈ ˈˈGbu ˈdhi. Ʋa jhiiɛ ˈCreedhɩ i -wɛeˈ ʋa po -aʋ- sʋn bho, ʋa ˈˈdu -aʋ- dɩ -gwliˈ i. —Zakɩ 5:14, 15.

ˈBho ɲɔnsoagbu aˈ dhbho ˈdhe ɛ, ɲankɔʋn- anˈ -da -duuˈˈ ˈbhleɛ ʋaˈ ˈˈjɛ ɛˈ dhbho ʋa nʋn. Ʋʋ ˈbhleɛ ʋaˈ ˈˈgbuzɔncɛ ɛˈ dɩ ˈˈduɛ- -ke. Dhɩ -ˈnɩn anˈ klɛɛ ɛ deeɛ nɔnˈˈ -duuˈˈ i. -Aaˈ ˈdhoudhi -ˈˈwe -ˈnʋn, -ʋa- nʋan dhbho -dia- kaˈ a, -a -ˈyʋbʋ ŋwɔn ˈjhe.—1 Tesalɔsɩ 5:12, 13.

• Dhbho -wɛ ɲankɔʋn- an nʋn ˈdhe ɲɔnsoagbu ˈdhi -ɛ?

• -Ka ɲankɔʋn- an naan -aaˈ dɩ tɔˈ i ɛ, ka ʋa nʋn ɛɛˈ -to sʋn -ɛn?