-Ɔ -nɩn Zezi Klisɩ -ɛ?

1. Da Zezi ˈghlʋ -ɛ?

Zezi nɩn- ɲɔn se goɔ-. -Da ɔ ˈsea da ˈbhlʋa- ˈˈkpe jhi ke ˈdhe- ɛ, ɔ -nɩɛn- -zuu ˈdhe jhaʋn ˈdhi. (Zan 8:23) Ɔmɔn- Ɲɔnsoa nʋn tɛnˈˈ ˈbho dhɩ aˈ klɛɛ ˈˈjhibha ˈˈa. Ɔ poɛ Ɲɔnsoa sʋn bho ˈˈdhe ɔɔ ye dhɩ aˈ klɛɛ sia ˈo nʋn-. Ɔɔˈ ˈsʋ Zoova aˈ ˈsʋ nʋn ˈkwa i ɛ -kɔndɩ ɲɔn ɔn ˈdhɔɔ Ɲɔnsoa aˈ ˈˈJhu ‘nɩan dhueˈ gbai.’ (Zan 1:14) Ɲɔnsoa -jhɔɔ ghlu ˈkwa, ɛ -kɔndɩ ɲʋn ˈdhɔɔ ‘Ghlu.’​—Zro Iiˈˈbhlaadhɩ- 8:22, 23, 30; Kolɔsɩ 1:15, 16.

2. Dhɛɛdɩ- Zezi jhi da ˈbhlʋa- ˈˈkpe -ɛ?

Ɲɔnsoa ˈyea ɔɔˈ ˈˈJhu da ˈbhlʋa- ˈˈkpe dhbho ɛ, ɔ nʋɛnˈ ˈɲnɔnkpao -jhu dhueˈ nɩan Zuifʋ ɲɔn ɔn ˈdhaa Mai -ʋn -nɩn ɲmau ˈsea -da dhueˈ ide- yeɔ ˈghlʋ. Ɛ -kɔndɩ Zezi ɔˈ ˈˈbho se -glɔɲiɔn- nɩn-. (Lukɩ 1:30-35) Zezi jhi da ˈbhlʋa- ˈˈkpe ˈmɛn -wɛeˈ (1) ɔ ˈye ɲʋn tɔˈdɩ- ˈtmʋʋn- ˈdhe Ɲɔnsoa aˈ dɩ ˈdhi, (2) ɔ ˈyeɛ -to -ka -a -ˈbhɛa -a yeaˈ Ɲɔnsoa aˈ -glʋˈdɩ nʋn -bho -a -nɩn ˈe ˈklejheɛ- ˈdhi mɔn ˈdhe- ɛ, (3) -wɛeˈ ɔ ˈye ˈo ɔɔˈ ˈkmʋn sea ˈgɔ ˈˈbun nɩn- -to ʋn ˈye ‘zeieghwliɛ-’ nɩn-.​—Zro Matie 20:28.

3. Dhɛɛdɩ- zeieghwliɛ- ˈye -pleɛ- -aaˈ dɩ -ɛ?

ˈˈGhwliɛ- ɲɔn ɔn plea -wɛeˈ ɲɔn ˈyea ˈe ˈmɛan ˈŋwɔn ˈghlʋ ɛ, ɛmɛn- ɲɔn ɔn ˈdhaa zeieghwliɛ-. (ˈZɔn ˈˈsiɛɛ- ˈsɛɛ 21:29, 30) Ɲɔnsoa ˈse ˈbɔn -glɔɲiɔn- ˈye gelaˈˈ ˈkpa ˈˈdhe ɔ ˈye ˈmɛn. Dhɛɛdɩ- ɲʋn an ˈdhaan -an? Ɲɔnsoa zela- ˈˈɩ-zaa -ɲiɔn- Adan -glʋˈ ˈmɛn -ka -bho ɔ nʋn dhɛsaʋn- ɛn, ɔɔ muan ˈmɛn-. Mɛnˈ -bho Adan se ‘dhɛsaʋn-’ nʋn ˈdhe- ɛ, ɔ ˈse ˈmɛn in. (Gbɔ I deˈan 2:16, 17; 5:5) Biiblʋ- ˈnaan Adan anˈ dɩ ɲiɔn ɔn ˈmɛn. ˈKamɔn- Adan -siie- ɔɔˈ ˈˈɲnuun- dhɛsaʋn- -e ɛɛˈ geiˈˈ nɩan ˈmɛan. Zeieghwliɛ- ˈye -pleɛ- -wɛeˈ ˈmɛan Adan -siia -abʋ ɛ, -a yeˈ zeiɛ- ˈdhe ɔ ˈkwa.​—Zro Wlɔm 5:12; 6:23.

-Ɔ -ˈbhɛɛ- ɔ yeˈ ɛɛˈ ˈˈghwliɛ- tu ple -wɛeˈ -a yeˈ zeiɛ- ˈdhe ˈmɛan ˈkwa -a? -Aaˈ klɛɛ sea ˈˈɩˈgba, -aaˈ ɲɔn dhueˈ se ˈbhɛɛ- ɔ ˈye -aaˈ dhɛsaʋn- ɛnˈ geiˈˈ ˈˈpɛɛ-, ˈklaa -bho ɲɔn ˈmɛn, ɔɔˈ ˈˈjɛ ɛˈ dhɩsaɩn- ɔ nʋan, ɩmɩn- -anˈ geiˈˈ ɔ -za.​—Zro Matie 16:26.

4. Dhɛɛdɩ- Zezi ˈmɛn -ɛn?

Zezi nɩn- -a se goɔ-, ɔ ˈgba ˈˈɩ. Ɔ ˈse ˈmɛn ɔɔˈ dhɩsaɩn- anˈ dɩ ˈklaa ɔ ˈse dhɛsaʋn- nʋn -kpɔ dhueˈ. Zezi ˈmɛɛnˈ -aaˈ dhɩsaɩn- anˈ dɩ. -Ka Ɲɔnsoa kman -aaˈ dɩ ɛ, ɔ toɛˈ ɔ ye ɔɔˈ ˈˈJhu dhbho ɔ ye ˈmɛn -aaˈ dɩ. -Ka ɔ kman -aaˈ dɩ -ke ɛ, Zezi toɛˈ ˈdhe ɔ ˈˈBho ɔˈ ŋwɔn ˈjhea ˈsʋ ɔ ye ˈo ɔɔˈ ˈkmʋn -to -aaˈ dhɩsaɩn- anˈ dɩ.​—Zro Zan 3:16; Wlɔm 5:18, 19.

-ˈjhe video Dhɛɛdɩ- Zezi ˈmɛn -ɛn? i

5. Dhbho -wɛ Zezi ɔ nʋn ˈzɩan -an?

-Da ɔ nɩan da ˈbhlʋa- ˈˈkpe -dhe ɛ, Zezi ˈpʋɛ- ɲʋn -anˈ dhɩ poa, ɔ -jha ɲʋn -ˈmɛan ˈkmʋn dhe, ɲʋn -an -ˈjhea ˈkle ɛ, ɔ pʋbʋ sʋn bho. Dhɩ ɔɔ muan -nʋn ˈdhe ɲan ɔ ˈyea ɲʋn za ˈo ɔɔˈ ˈˈBho ɔˈ ghlu ˈˈɲɩn ɛn, ɩmɩn- -ɩanˈ dhɩ ˈˈzaɩn- ɔ -to. (Matie 15:30, 31; Zan 5:28) Zezi ˈmɛan, Ɲɔnsoa jhɔ ˈkmʋn dhe ɔ ye -zuu ˈkpa -kenɛnˈ. (1 Piɛɛ 3:18) Zezi -nɩɛn- ˈo Ɲɔnsoa aˈ -dhian- bho. Nɔnˈˈ -ɔ ˈdhe ˈdhi Zoova ˈyeɔ ˈbheɔdhɛ- ˈˈɲɩn da ˈbhlʋa- aˈ klɛɛ ˈˈdhru ɛ, ɔmɔn- Zezi ɔ fuo -dhe. (Eble 10:12, 13) ˈZɩan, Zezi -nɩɛn- ˈBheɔ ˈdhe jhaʋn ˈdhi. -Bɔyaˈˈ -dɩ -ˈnɩn mɩn- -anˈ ghwee- ɔɔˈ ˈcɛ ɛ po da ˈbhlʋa- aˈ klɛɛ ˈˈkpe.​—Zro Gbɔˈwlʋdhɩ- 11:15; Matie 24:14.

ˈDhe nɔnˈˈ -dhɛ ˈˈzaan- ˈdhi ɛ, Zezi nɩan ˈBheɔ, ɔɔ muɛn ˈklejheɛ- ɛˈ klɛɛ -e ɲʋn -ʋa- ˈˈdua ɲʋn ˈkle iza-. Ɲʋn anˈ klɛɛ dea Zezi -gwlɩˈˈ -wɛeˈ -ʋa- -ˈjheɔ ŋwɔn, ʋa muɛn ˈkmʋn anˈ trɔnˈ -dhi -da ˈbhlʋa- a muan -bɔyaˈˈ -deɩn- ˈkpa-.​—Zro 2 Tesalɔsɩ 1:6-8.