Ka yeˈ Ɲɔnsoa iˈˈkwaan- sʋn nʋn -ɛn?

1. Ɲɔnsoa a ˈŋwɔɔn ɲʋn anˈ klɛɛ ɛˈ bhaeghlu- ˈmɛn?

Ɲɔnsoa a ˈdha ɲʋn anˈ klɛɛ nɩan ˈbhlʋɩ- ˈdhi i ˈmɛn ʋʋ ˈyeɔ iˈˈkwaan- ˈdhe bhaeghlu ˈdhi. (1 Zan 5:14) ˈKlaa ɛ se ɲʋn anˈ klɛɛ ɛˈ bhaeghlu- ɔɔ ˈŋwɔɔn nɩn-. Ɛmɛn- -nɩn -kʋan- weˈˈ ɲnian ʋaˈ ˈɲnʋn ˈkwa ʋaˈ sɔɔnˈ: Ʋaˈ bhaeghlu- ˈbhɛɛˈ ʋn ˈse ˈe Ɲɔnsoa bho -ɲnin in. (1 Piɛɛ 3:7) -Kenɛnˈ, -da Israɛ -kɔʋn- ˈnɛan ˈe ʋaˈ dhɩsaɩn- ˈdhi i ɛ, Ɲɔnsoa aˈ po ʋaˈ bhaeghlu dheinˈˈ bho ˈdhe-. ˈKlaa -bho ɲɔn nʋn dhɛsaʋn- -wɛeˈ ɔ zian- kplɩn ˈˈɩn ɛn, Ɲɔnsoa a ˈŋwɔɔn ɔɔˈ bhaeghlu ˈmɛn. Dhɩ -ˈnɩn an toɛˈ -ka bhaeɛ- sa -goaˈˈdhɛ- nɩn- ɛn, ɛ ˈˈghwliɛ- ˈklaa -a -ˈbhle.​—Zro Iiˈˈbhlaadhɩ- 28:9; Nʋʋdhɩ- 3:19.

-ˈjhe video Ɲɔnsoa a ˈŋwɔɔn ɲʋn anˈ klɛɛ ɛˈ bhaeghwlu ˈmɛn? i

2. Ka ɲʋn ˈye bhae sʋn nʋn -ɛn?

Zoova aˈ ˈsʋ -a yeˈ bhae-. Dhɛ nɩan ˈo ɛ, ɔmɔn- nʋn -aʋ- ˈˈdhe ɔmɔn- -nɩn Ɲɔnsoa. (Matie 4:10; 6:9) -Kenɛnˈ, -a se ˈˈɩˈgba. Ɛ -kɔndɩ -a yeˈ bhae- ˈdhe Zezi ɔˈ ˈɲnɩn ˈmʋn ˈklaa ɔ ˈmɛɛnˈ -aaˈ dhɩsaɩn- anˈ dɩ. (Zan 14:6) Zoova ˈse ˈbɔn -a yeˈ bhae- -sɛɛ ˈbhle. Ɔ ˈse ˈbɔn -ke -a yeˈ bhaeghlu dhueˈ ˈcɩan ˈˈdhe -a yʋˈ ibhla zɔn ˈo zɔn. Ɔɔ ˈbɔn -aaˈ bhaeghlu ˈye ˈe -aaˈ -pɛɛ bho ˈghlʋ.​—Zro Matie 6:7; Filipi 4:6, 7.

-Bho -aa sa ˈdhi i bhae mɔn -dhe ɛ, Zoova a ˈŋwɩɩnˈ. (1 Samuel 1:12, 13) Ɔ ˈnaan -a -ˈbhɛɛˈ -a yeɔˈ bhae- nɔnˈˈ ˈˈo nɔnˈˈ: -glaeˈˈ pɛɛn o ˈjhrʋ -gbaoˈ o ˈˈmaʋn o -bho -a yeˈ dhɛ dhi o -bho -a -nɩn ˈe ˈkle ˈdhi -ke ɛ.​—Zro 1 Piɛɛ 5:7; Matie 15:36.

3. Dhɛɛdɩ- kletiɛn weˈˈ a ˈgboo ˈˈdhru i -ɛ?

Ɲɔnsoa aˈ iˈˈkwaan- -kman ˈˈɩn ˈnɔn ˈkmʋn nʋn ˈdhi. Dhɛ nɩan ˈo ɛ, ɲʋn anˈ -da -duuˈˈ se Ɲɔnsoa -gwlɩˈˈ de ˈˈdhe -ka ɔ ˈyea kupeɛideɛ- da ˈbhlʋa- ˈˈkpe -jha, -bho ɲɔn ɔn sɩ ˈtmʋn ɛn, ʋa ghwlaa ɲʋn ˈmɛn. (2 Timotee 3:1, 4; 2 Piɛɛ 3:3, 13) Ɛɛˈ dɩ ɛ, -a -nɩn -aaˈ ˈdhoudhi weˈˈ dea dhɛ nɩan dhueˈ -gwlɩˈˈ ˈye bha ˈkpɩ ˈˈɲɩn.​—Zro Eble 10:24, 25.

-Bho -a -nɩn ɲʋn kman Ɲɔnsoa aˈ dɩ a sa nan, ɛɛ poɛ -aʋ- sʋn bho -aa yeɔ iˈˈkwaan. Dhɛgwlɩˈˈdeɛ- ɲɔn ɔn ˈjhea ˈdhe Zoova aˈ -Bobhlaʋn- anˈ ˈˈdhruigboonanˈ, ɛɛ ˈˈɲɩɛn ɲʋn ˈkpɩ.​—Zro Wlɔm 1:11, 12.

4. Ka yeˈ Ɲɔnsoa iˈˈkwaan- sʋn nʋn -ɛn?

-Bho -man sa ˈbɔn yeˈ Zoova iˈˈkwaan-, -ˈmɛn dhɩ -man -ˈcɩaan ˈdhe ɔɔˈ Ghlu ˈdhi ɛ, -naan ɩanˈ dɩ tɔˈ i. Ɔɔˈ ˈsrɩn -e dhɩ ɔɔ nʋan -e dhɩ ɔ ˈnaan ɔ ˈye nʋn ˈdhe ɲan, -naan ɩn tɔˈ i. Bhaeɛ- -e tɔˈ i-naan an poɛ -aʋ- sʋn bho -aa yeɛ ˈjhe -ka Ɲɔnsoa aˈ ɲʋn dɩ-kmaan -e ɔɔˈ tɔˈ ˈdha dhɛ ɛ.​—Zro 1 Timotee 4:15, 16.

-Bho se dhɛgwlɩˈˈdeɛ- ˈbhle ɛ, se ˈbhɛɛ- yeˈ Ɲɔnsoa iˈˈkwaan-. -Bho ɲɔn ˈˈdu dhɛ, ɔ ˈyeɛ ˈˈnin gbɔ ipo. ˈKa dhɛgwlɩˈˈdeɛ- ɛˈ dɩ ˈpɛn -ke. Dhɩ -man -ˈjhea tɔˈ dɩ ˈdhi ɛ, yeˈ ɩanˈ dɩ tɔˈ ˈˈkpe i-naan zɔn ˈˈo zɔn, -wɛeˈ ɩn ˈye -manˈ dhɛgwlɩˈˈdeɛ- i-kuu.​—Zro Matie 4:4; Eble 11:1, 6.

5. -Bho -man sa Ɲɔnsoa iˈˈkwaan- ˈdhee, ˈjɛɛn- -wɛ yeˈ ˈo ˈjhee- -ɛ?

Ɲʋn kman Zoova aˈ dɩ ɛ, ɔɔ ˈˈduɛ ʋaˈ dɩ. Dhɛ ˈˈo dhɛ -ˈbhɛa -ɛ yeaˈ ʋaˈ dhɛgwlɩˈˈdeɛ- ˈkɔɔ-, ˈˈdhe -ɛ -ˈbhɛa -ke -ɛ yeaˈ ʋaˈ ˈkmʋn sea ˈˈtian ˈbhle ɛˈ -pɛɛ ˈˈɩ-tbhaa ˈghwlaa-, ɔ ˈbhɛɛˈ ɔ ˈyeɛ nʋn ɛ ˈyʋbʋ bho -tɛɛn. (Psaume 91:1, 2, 7-10) Dhɩ -bho -a nʋn -wɛeˈ -a -ˈsa ku ˈzɔn i-flɔn in ˈˈdhe -a -ˈsea ˈˈbɔya- ˈjhe i -ke ɛ, ɔ ˈnaan -aaˈ nʋɩnˈ -dhe. -Ka -a yeaˈ nʋn -wɛeˈ -aaˈ ˈkmʋn ˈyea ˈdhɔɛe nɩn- ɛn, ɛmɛn- Zoova a tɔɔn -abʋ.​—Zro Zakɩ 1:25; 4:4,8.