Ɲɔnsoa nʋɛn jhaʋn -e ˈbhlʋa-

Zoova nʋn -aʋ. Ɔmɔn- nʋn dhɩ aˈ klɛɛ. Ɔmɔn- nʋn dhɩ ɲʋn an ˈjhea -e dhɩ ɲʋn anˈ ˈjhea. Ɔ ˈyea dhɩ ɲʋn an ˈjhea nʋn ɛn, ɔ nʋɛn dhbhoozii- -duuˈˈ. Jhibho- dhbhoozii ˈmɛn? Dhbhoozii- -nɩn Zoova gʋɔˈ. Ɲɔn se ˈbhɛɛ- ɲɔn ˈyɩ ˈjhe, -ka ɲɔn sea ˈbhɛɛ- ɲɔn ˈyea Ɲɔnsoa ˈjhe ɛ. Dhbhoozuu- kɔan ɲan Zoova nʋan, ʋmʋn- poɔ sʋn bho -wɛeˈ ɔ nʋn ˈcɩanzɩɩn- -e dhɩ aˈ klɛɛ jhia -aʋ ˈdhei. ˈDhe ɩn ˈˈklu ɛn, ˈdhemɔn- ˈbhlʋa -nɩn. Ɔmɔn- -nɩn -aaˈ -dein- ˈˈdhe ɔ -nmɔn ˈˈjhrii ˈjɛɛn-.

Zoova poɛ ˈbhlʋa ˈkpa -kajɔɔnka -wɛeˈ nmiian -e ɲiɔʋ ˈye dɔ ˈˈkpe ˈˈti. Ɔ nʋɛnˈ ˈjhrʋ a yea fan da ˈbhlʋa ˈˈkpe. Ɔ nʋɛn trɩ -e ˈtɔnin -e ˈˈnin ghwleˈ.

Dhɛwɛ- -nʋʋɛn- ˈbho -mɛnˈ ˈdhe -ɛ? Zoova ˈnaan: ‘ˈYe -peiˈˈ -e ˈˈduudhɩ -e ti nʋn.’ ˈSʋ ti -e ˈˈduudhɩ -dee ˈvaɩnˈ -poaˈ ˈmɛn. ˈBho ɛ ˈdhe ɛ, Zoova nʋɛn nmiian anˈ klɛɛ: -Jɩn -an bhla nain -e -jɩn -an naan ˈdhe ˈˈnin -zɔnˈ -e -jɩn -an nan -e -jɩn -an ciian ˈbɛɛ. Ɔ nʋɛn nmiian -mɩɩnˈˈ -ka -bɔɛnˈ nɩan -e nmiian -klaeˈˈ -ka dhɔɛ nɩan. ˈDhe ɩn ˈˈklu ɛ, -jɛnwɛ -ɛɛ nʋn ʋn ˈtʋn -ɛn?

ˈBho ɛ ˈdhe ˈsʋ ɛ, Zoova ghwluɛ ˈe dhbhoozuu- kɔan ɲan ɔ nʋan bho ɔ ˈnaan: “-A nʋn ɲiɔn.” Ɲiɔn -nɩn nmiian ˈse gʋɔ- i. Ɔ ˈye dhɩ aˈ nʋanˈ ˈbhɛɛ-. Ɔ ˈye -ghwluaˈ ˈbhɛɛ-, ɔ ˈye ˈkɩlɛ- ˈˈdhe ɔ ˈye bhae-. Ɔ ˈye dhɩ nɩan da ˈbhlʋa ˈˈkpe -e nmiian anˈ dɩ ˈˈdu. Jhibho- ɲiɔn- Ɲɔnsoa kɔan ɲan ɔ nʋan ˈmɛn? -Bho -ˈyeɔ jhibho- ɛˈ, -a zro -bo -ɔɔ jhia ˈdhii.