Ɲɔnsoa nʋɛn ɲmau- -e ˈɲnʋnkpaoˈ kɔan ɲan

Zoova poɛ -deɩn- dhueˈ kpɔˈˈ ɲɔn ɔn ˈdhaa ˈbho Edɛnɩn -gle. Ti -e ti aˈ ˈvaɩnˈ -e nmiian ˈˈjhi ˈo ˈmɛn. ˈSʋ ɛ, Ɲɔnsoa ˈˈdhuɛ- ˈbhlʋ ˈmʋn ɔ ye ɲankɔn- -ɲiɔn- Adan nʋn -wɛeˈ ɔ poɔ -feɛˈ ˈmlan. Jhibho- dhɛ -nʋʋan ˈmɛn? Adan -dee -fɔanˈ ˈmɛn! Zoova -ghwluɛ- ˈe ɔ bho ɔ ˈnaan, ɔ ˈˈdu -deɩn- -ˈnɩn anˈ dɩ -ˈmɛn ɔ ˈˈɲɩn nmiian anˈ klɛɛ ˈɲnɩn.

Zoova ˈˈɲɩɛnˈˈ Adan ˈtee dhueˈ -ɛ -kɔndɩ ˈjɛɛn-. Ɔ ˈnaan: ‘-ˈBhɛɛˈ -ˈye ti aˈ klɛɛ ɛˈ ˈˈbhi dhi. ˈKlaa tu dhueˈ -nɩn ˈo, -manˈ dhi -e ʋanˈ ˈˈbhi -dhe. -Bho dhi ʋanˈ ˈˈbhi ɛˈ, -man muɛn ˈmɛn-.’

Nɔnˈˈ -ziia ˈbho ɛ, Zoova ˈnaan: ‘ˈYe ɲiɔn- -dhee -ˈnɔɔn nʋn ɔ ˈye Adan sʋn bho po.’ -Wɛeˈ ɔ po Adan ˈˈɲɩnɔnˈˈ. Ɔ ˈˈdhuɛ- ɔɔˈ -ŋmɩɛn- -kpa dhueˈ ˈmʋn ɔ ye ˈɲnʋnkpaoˈ nʋn. ˈƝnʋnkpaoˈ -ˈnʋn -mʋn ɲʋn ˈdhaa- Ɛvʋ. Adan -e Ɛvʋ ˈkpa ˈɲnɔn -e -kʋan-. Adan ˈjhea Ɛvʋ ɛ, kɔ ˈdha -a? ˈMʋnan an nʋɔn -dhe ˈjɛɛn- -wɛeˈ ɔ ˈnaan: ‘Aʋ -ŋmʋn ˈɲnʋnkpaoˈ Zoova ˈˈdhua ˈman -ŋmɩɛn- kpa ˈmʋn ɔ nʋan! Ʋn -nɩn ˈɩn gʋʋɔ- ˈˈjhrii ˈjɛɛn-.’

Zoova ˈnaan Adan -e Ɛvʋ ˈghwlʋ ˈˈɲnuun ʋʋ ˈye da ˈbhlʋa ˈˈkpe ˈˈjhi. Ɔɔ ˈbɔn -dhe ʋʋ ˈyeɛ nʋn ˈbhlʋa aˈ klɛɛ ˈye -bɔyaˈˈ -deɩn- ˈkpa -ka Edɛnɩn -gle nɩan. Ɔɔ ˈbɔn ʋʋ ˈye dhbho nʋn -dadhueˈ ˈdhe ˈmʋnan ˈmʋn. ˈKlaa -ka ɔɔ ˈbɔan dhɩ ˈyea -nɩn -dhe ɛ, ɩn ˈse anˈ -nɩn. Dhɛɛdɩ- -ɛ? -Aa muɛn in ˈŋwɔn- ˈdhe -bo -ɔɔ jhia ˈdhi.