Davidɩ -e Sailɩ

Davidɩ dhbhaˈ Goliatɩ ɛ, ˈbho ɛ ˈdhe Sailɩ poɔ ɔɔˈ ˈsʋlɩˈˈ aˈ ˈˈdhrujhei-. Davidɩ kpa tʋ aˈ ˈˈdhru -kpɛ -duuˈˈ, ɛ nʋɛnˈ ɔ ˈye ˈɲnɩn ˈghwlʋ. -Bho ɔɔ sa tʋˈ ˈghwlʋ ɛˈ, ˈɲnʋnkpaeˈ a dheeˈ ʋa bhleˈ ʋa yea ka nʋn: ‘Sailɩ dhbhaˈ ɲʋn anˈ ˈˈghwlu ˈˈdhe Davidɩ dhbhaˈ ɲʋn anˈ ˈˈghwluu -ghwluu’. Sailɩ ɔ nʋɛn Davidɩ -gwlɛnˈ bho ˈˈdhe ɔɔ ˈbɔn ɔ ˈyeɔ dhbhaˈ.

Davidɩ jhibho- -ziplu aˈ bhlaaˈ ˈmɛn -kajɔɔnka. -Zɔn dhueˈ ɛ, ɔɔ bhla -ziplu ɔ ˈyea Sailɩ ˈˈɲɩn ˈsʋ ɛ, Sailɩ ɔɔ ˈbɔn ɔ ˈyeɔ ˈˈdhi tbha. Davidɩ bhlia ˈsʋ ɛ, ɛ ɲman bhloˈ ˈmʋn. ˈBho ɛ ˈdhe ɛ, Sailɩ ˈdɩn Davidɩ ɔˈ dhbhaaˈ ˈmɛn kpɛ -duuˈˈ. Ɛ ˈyea ˈo ˈbhɔɔ- ɔ, Davidɩ ple ɔ ye ˈˈman ˈdhe -bɩɛnˈˈ -bhlʋa- ˈˈkpe.

Sailɩ muɛn Davidɩ i ˈbɔanˈ ɔmɔn -e ˈsʋlɩˈˈ aˈ 3.000 -e. -Zɔn dhueˈ ɛ, ɔ pa ˈe trʋ dhueˈ ˈdhi ˈnɔn Davidɩ -e ɲʋn -nɩn ɔ nan ˈˈmaan. Ɲʋn -nɩn Davidɩ nan -jha ghwlu jha ʋʋ ye ka nʋn: ‘-ˈDhbhɔ! -Bho seɛ nʋn ˈzɩan anˈ, -mɛnˈ ˈseɛ -nʋɩn -dheeˈ ka.’ Davidɩ ˈˈkʋaan- Sailɩ i -ghwɔɔ ˈˈdhe ɔ cɛn ˈo ɔɔˈ ˈˈmʋnpaadhɛ ɛˈ ˈfɔ. Sailɩ seɔˈ ˈjhe. ˈBho ɛ ˈdhe ɛ, dhɛ Davidɩ nʋan ɛ ˈˈzruɔˈ dhɛ nɩan ˈo ɛ, ɔ ˈse ˈbheɔ Zoova dea ˈo dhi ŋwɔn ˈjhe. Ɔ ˈse ˈo ˈŋwɔɔn- -wɛeˈ ɲʋn -nɩn ɔ nan ˈye Sailɩ dhɛsaʋn ˈˈdhrui nʋn. Sailɩ ˈghwlʋa ˈe trʋ ˈdhi ˈsʋ ɛ, Davidɩ -ghwluɛ- ˈe ɔ bho ɔ ˈnaan: ‘ˈJhee ɛˈ, ˈɩn ˈbhɛɛˈ ˈye ʋn dhbhaˈ -dhe!’ Sailɩ ɔ mun Davidɩ i ˈˈtai- ˈmɛn?

ˈˈƖɩn-. Sailɩ kpa Davidɩ ɔˈ i -nʋʋɛn ɲan. ˈˈMaʋn -glʋ dhueˈ ɛ, Davidɩ -e ɔɔˈ ˈdhoudhi -ɲnʋnkpaoˈ aˈ ˈˈjhu ɲmau- Abisai ˈsrooɛ- -ˈgwlɩi ʋʋ ye ˈdhe Sailɩ ɔˈ ˈkamanˈ ˈdhi pa. Abʋnɛɛ -ɔ nɩan Sailɩ ɔˈ ˈdheifuoi ɛ, ɔɔ ˈmʋʋnˈ. Abisai -ghwluɛ- ˈe Davidɩ bho ɔ ˈnaan: ‘-Ŋmʋn ˈnɔn Sailɩ ka -ɔ ˈpɛn in da! ˈˈTai ˈmiin ˈyeɔ dhbha!ˈ’ Davidɩ ˈnaan: ‘-A ˈˈdhuo- ɔɔˈ ˈˈdhi -e dhɛ ɔɔ ˈnaan ˈdhi ˈmʋn -ˈmɛn -a mun.’

Davidɩ ˈjha ˈe trʋ ˈˈdhru ˈnɔn -bho ɔ -nɩn -wɛeˈ ɔ ˈbhɛɛa ɔ ˈyea Sailɩ ɔˈ kamanˈ klɛɛ ˈˈkpei ˈjhe ɛ. ˈˈDhe ɔ ˈˈghwɔ ɔ ˈnaan: ‘Abʋnɛɛ dhɛɛdɩ- ˈse ˈbheɔ ˈdhei -fuo -ɛ? Dawɛ- Sailɩ ɔˈ ˈˈdhi -e dhɛ ɔɔ ˈnaan ˈdhi -nɩn -ɛn?’ Sailɩ jhibhɛ- Davidɩ ɔˈ ghwlu ˈˈɩ ˈˈdhe ɔ -ghwlu ˈdhe ɔ bho ɔ ˈnaan: ‘-ˈBhɛɛ -ˈye ˈʋn dhbhaˈ -dhe ˈklaa seɛˈ nʋn. ˈƖn jhibhiˈ bhla -ka ɛ nɩan -mɔn -ɔ ˈyea ˈbheɔ -nɩn ˈbhoo ˈdhe ɛ.’ ˈSʋ Sailɩ muɛn ˈdhe ɔɔˈ ˈbheɔgbu ˈdhi dhe. ˈDhe Sailɩ bho ˈˈgbuzɔnˈ ɔn, ɛ se ɲʋn anˈ klɛɛ ˈɲɛn Davidɩ ˈmʋn -nɩn.