Zoova -fuɛ- Zozafatɩ ˈdhei

Zozafatɩ nɩan Zida aˈ ˈbheɔ ɔ, ɔ -za Baalɩ ɛˈ ˈsraakpezadhɛ -e -baadhɩ aˈ klɛɛ i ˈbho ɔɔˈ ˈbhlʋa ˈdhi. Ɔɔ ˈbɔn -dhe ˈjɛɛn- ɔɔˈ ˈcɛ ˈye Zoova aˈ ˈtee jhibho-. Ɛmɛndɩ ɔ dhbho ˈbheɔ ɔˈ ˈˈɲnuun- -e Levi ɔˈ ˈˈɲnuun- Zida -bhlʋa aˈ klɛɛ ˈdhii -wɛeˈ ʋʋ ˈye ˈcɛ Ɲɔnsoa aˈ ˈtee -tɔɔn.

ˈBhlʋɩ jhia Zida ˈdhei ɛ, Zida aˈ tʋ bho -paa ˈbhleɛˈ ɩanˈ -faʋn. Ɩn jhibhiˈ -ka Zoova a fua ɔɔˈ ˈcɛ ˈdhei ɛ. Ɛmɛndɩ ʋaˈ -ˈnʋʋn -nan ʋʋ -jha ˈbheɔ Zozafatɩ -baanˈ-. ˈKlaa, -zɔn dhueˈ ɛ, Moabʋkɔʋn -e Amɔnɩnkɔʋn -e ɲʋn ˈˈtia ˈe Sei -bhlʋa ˈdhi ɛ, ʋʋ jhiɛ Zidakɔʋn tʋ ˈˈbhli kpa aˈ. Zozafatɩ jhibhiˈ -ka ɛ nɩan Zoova -ˈyeɔ sʋn bho po ɛ. Ɔ ˈgbooɛ- ɲmai -e ˈɲnʋnkpaeˈ -e ˈˈɲnuun -mɩɩnˈˈ anˈ klɛɛ i ˈbho Zelizalɛmʋn. ˈBho ʋbʋ ˈˈjhibhaˈ a, ɔ bhae- ɔ ˈye ka ˈdha: ‘Zoova, -bho ɛ se -mɔn -nɩn ɛnˈ, -a se ˈbhɛɛ- -a ˈye tʋ aˈ ˈˈdhru kpa. -Aa bhae- mʋn ˈmɛn, dhɛ -a ˈyea nʋn ɛn, ˈtmʋʋɛn -abʋ.’

Zoova -za ɔɔˈ bhaeghwlu aˈ kpa ˈmɛn ɔ ˈnaan: ‘-Faʋn anˈ nʋn aʋ -dhe. ˈMan muɛn aʋ sʋn bho -po. Aʋ gbaeˈ, aʋaˈ zia i -dhe, aʋ -ŋmʋn dhɛ ˈyea nʋn -wɛeˈ ˈyea aʋ ˈpʋʋ- jha.’ -Kawɛ Zoova nʋbʋ aˈ ˈpʋʋ- sʋn -ɛn?

-Zɔn -dhee -ˈnɔɔn zɩan, Zozafatɩ ˈcra bhleʋn dhi ˈˈdhe ɔ ˈnaan, ʋʋ -nan ˈbho ˈsʋlɩˈˈ ˈˈjhibhaˈ. Ʋʋ -nan ʋʋ ˈye Zelizalɛmʋn ˈghwlʋ ʋʋ ye -da ʋʋ ˈyea tʋ -vɔɔn ɲnin. -Da ʋʋ ˈyea tʋ -vɔɔn, ˈbho ɔˈ ˈɲnɩn -nɩn Tekoa.

Ɲʋn -an bhlea, ʋa kpa ˈghwlu ˈˈjha ʋa ˈbhɛɛa Zoova aˈˈ ˈdhe ˈmʋnan ˈdhi ɛ, Zoova vɔɛn ɔɔˈ ˈcɛ ɛˈ tʋ. Ɔ ˈˈbheeɛ- Amɔnkɔʋn -e Moabʋkɔʋn anˈ kaman ˈjhrii ˈsʋʋ ʋʋ ye vɔn ˈbho ʋaˈ ˈsʋ ˈɲnɩn, ʋbʋ aˈ klɛɛ ˈmɛɛn. Zoova -fuɛ- Zida ˈcɛ -e ˈsʋlɩˈˈ -e ˈsraazaʋn ˈdhei. Ɲʋn anˈ klɛɛ nɩan ˈbhlʋɩ- ˈsri ˈdhii ɛ, ʋʋ ŋwɔn dhɛ Zoova nʋan -wɛeˈ ɔ fua ɔɔˈ ˈcɛ ˈdhei ɛɛˈ dɩ ˈmɛn. Ʋʋ jhibhiˈ bhla -ka Zoova a fua ɔɔˈ ˈcɛ ˈdhei jheejhee ɛ. -Kawɛ Zoova a nʋn ɔɔˈ ˈcɛ ˈpʋʋ- sʋn -ɛn? Ɔɔ jhiiɛ- dhɩ -duuˈˈ i ɔ yeɛ nʋn. -Bho ɔ ˈyeɛ nʋn ɛnˈ, ɛ se -glɔɲiɔn -mɔn ˈyeɔ sʋn bho po nɩn.