Zoziasɩ -kman Ɲɔnsoa aˈ ˈtee aˈ dɩ

Zoziasɩ ˈbhleɛ -zɩn -ˈˈmaan -wɛeˈ ɔ ˈkpa ˈbheɔ. ˈDhe ɛɛˈ nɔnˈˈ tu ˈdhi ɛ, ɲʋn nɩan ˈo ʋa poɛ gu ˈˈdhe ʋa gbɛɛ -baadhɩ ˈˈjhibhaˈ. Zoziasɩ ˈbhlea zɩn anˈ 16 ɛ, ɔɔ ˈbɔn ɔ ˈye Zoova ˈˈɲɩn -ka Zoova a ˈbɔan. -Da Zoziasɩ ˈbhlea zɩn anˈ 20 ɔn, ɔ -dee -baadhɩ -e ˈsraakpezaadhɩ aˈ i -zaaˈ ˈmɛn ˈbho ˈbhlʋa aˈ klɛɛ ˈdhi. Ɔ ˈbhlea zɩn anˈ 26 ɛ, ɔ poɛ Zoova aˈ ˈˈgbu -klaaˈˈ ˈkpa.

ˈSraazai- klaaˈˈ Ikia ˈjheɛ Zoova aˈ ˈtee aˈ ˈsɛɛ dhueˈ ˈdhe Ɲɔnsoa aˈ ˈˈgbu klaaˈˈ ˈdhi. Ɛgwɛ ɛ nɩn ˈtee Moizɩ ɔˈ ˈˈjɛ ˈcrea ˈkwa i ɛ. Safanɩn nɩan Zoziasɩ ɔˈ ˈsɛɛcrei- ɛ, ɔ -jha Zoziasɩ ˈsɛɛ nɛn ˈmɛn ˈˈdhe ɔ zroɛ ˈdhii ɔ ˈye Zoziasɩ ˈˈɲɩn. Dhɛ ɔ zroa ˈdhii Zoziasɩ poɛ -dheinˈˈ bho ɛ, ɔ ˈŋwɔɛn ˈmʋin ˈmɛn -ka ˈcɛ ˈsea Zoova ŋwɔn ˈjhe ˈdhe -zɩn -duuˈˈ ˈdhi ɛ. Ɔ -ghwluɛ- ˈdhe Ikia bho ɔ ˈnaan: ‘Zoova ˈkpa ˈcɛn ˈjɛɛn- ˈdhe -a bho. Dhɛ -a ˈyea nʋn ɛn, -mun -ˈyeɛ Zoova i dee-, ɔɔ muɛn -aaˈ ghwlu aˈ kpa -za.’ Zoova -jhiiɛ- ghwlukwajhaa- -ɲnʋnkpaoˈ -ʋan- ˈɲnɩn nɩan Ulda i -wɛeˈ ɔ -za ʋaˈ ghwlu aˈ kpa. Ɔ ˈnaan: Zudakɔʋn ˈbhɔ ˈʋn ˈmɛn. Dhɩ ʋʋ nʋan, ʋa muɛn ɩanˈ ˈgei ˈjhe-, ˈklaa ɛ ˈse ˈbho Zoziasɩ ɔˈ nɔnˈˈ -nɩn in. Dhɛ nɩan ˈo ɛ, ɔɔ jha ɔɔˈ ˈˈjɛ jha.’

Dhɛ Zoova ˈtmʋʋan, ˈbheɔ Zoziasɩ ˈŋwɔɛn ɛn, ɔ muɛn ˈe Ɲɔnsoa aˈ ˈˈgbu klaaˈˈ ˈdhi ˈˈdhe ɔ ˈgboo- Zuda ˈcɛ i. -Wɛeˈ ɔ zro Zoova aˈ ˈtee ˈdhii ˈbho ˈcɛ ɛˈ klɛɛ ˈˈjhibhaˈ. Zoziasɩ -e ˈcɛ ɛˈ klɛɛ nɩan ˈo ɛ, ʋʋ cɛn ghwlu ʋʋ ˈye Zoova aˈ ˈtee aˈ klɛɛ ŋwɔn ˈjhe ˈdhe ʋaˈ -pɛɛ ɛˈ klɛɛ ˈmʋn.

Ʋʋ ˈsea Pakɩ po ɛ, ɛɛ nʋɛn -zɩn -duuˈˈ. ˈˈDhe ˈsɛɛ Zoziasɩ zroa ˈdhii ɛ, ˈdhe ɛ ˈdhi ɛ, ɲʋn ˈnaan ʋʋ ˈye Pakɩ po zʋn ooˈˈ zʋn. ˈSʋ ɔ -ghwluɛ- ˈdhe ʋbʋ bho ˈnaan: ‘-A ˈye Pakɩ po -a ˈye Zoova ˈˈɲɩn.’ Ɔ -toɛ ˈo nmian -duuˈˈ ʋʋ ˈye ˈsrae- -zaa ˈˈdhe ɔ ˈtmʋʋn- ʋbʋ ʋʋ ˈye bhleʋn- kpɔ ˈˈɩ po ˈdhe Ɲɔnsoa aˈ ˈˈgbu klaaˈˈ ˈdhi. -Wɛeˈ ˈcɛ po Pakɩ ɛˈ fɛtɩ ɛmɛn -e dipɛn sea ˈˈbuundhɛ bho -nɩn ɛnˈ fɛtɩ ˈdhe ˈghwɩ -ˈˈmɛsɔnˈ ˈdhi. -Ɛ ˈghwlʋa ˈe Samiɛ ɛˈ nɔnˈˈ ɔn, Pakɩ -nɩn ɛ ˈyea gʋɔ- ɔ, ɛ se -nɩn. Zoziasɩ -kman Ɲɔnsoa aˈ ˈtee aˈ dɩ ˈjɛɛn-. ˈˈDhe -mɔn ˈdhe -man ˈbɔn dhɩ -duuˈˈ aˈ ˈcɩan in ˈmɛn ˈdhe Zoova aˈ dɩ ˈdhi?