Zelizalɛmʋn anˈ -bhleˈ

-Zɩn -pla zia, -a jhi ˈbho ɩn ˈˈkpe dhe. Neemi -nɩɛn Israɛkɔin- -ɔ ˈˈti ˈbho Pɛsɩkɔʋn- anˈ ˈˈkwiglɔ- ɲɔn ˈdhaa Sizɩ ˈdhi. Ɔ -nɩɛn ˈBheɔ Atazɛɛsɛsɩ ɔˈ dhbhonʋin-. Ɔɔˈ ˈdhoudhi dhueˈ ghwlʋˈ Zida -ɔ ˈtmʋʋɔn -ka dhɩ -ɩan nʋʋan ˈdhemɔn ɩn ɲnian ˈˈjhrii ɛ. Ɔ ˈnaan: ‘Zifʋ -ˈˈwe muan Zelizalɛmʋn dheɛ, ʋʋ se kupeɛˈ i -de. -Bhleˈ -e ˈˈkwiglɔ ɔˈ -klui Babilɔnɩnkɔʋn ˈkɔa, ɩn ˈse ˈkpa -pooɛ-.’ Neemi ˈˈzruu. Ɔɔ ˈbɔn ɔ ˈye Zelizalɛmʋn dhe mun -wɛeˈ ɔ ˈye ɔɔˈcɛ sʋn bho po. Ɛmɛn- dɩ ɔ bhae- Zoova -wɛeˈ ˈbheɔ ˈyeɔ i ˈˈtai- ɔ ˈye mun.

Nɔnˈˈ pla zia, ˈbheɔ ˈjheɛ ˈˈkpei -ka Neemi ˈˈzrua. Ɔ ˈnaan: ‘ˈSe ˈˈzru kaˈ -kpɔ dhueˈ ˈbhoo ˈˈjhibhaˈ. -Ɛ nʋn ʋn -ɛn?’ Neemi ˈnaan: ‘Dhɛɛdɩ- ˈɩn ˈse ˈˈzru i -ɛ? ˈMan ˈˈkwiglɔ- Zelizalɛmʋn, ˈkpa -glɔ -gbauˈˈ.’ ˈBheɔ deeɔ dhi ɔ ˈnaan: ‘Dhɛwɛ- -man ˈbɔn ˈye nʋn ˈye ʋn ˈˈɲɩn -ɛn?’ Neemi ˈˈdooˈ ɔ ye bhae- ˈdhe ɔɔˈ -pɛɛ bho. -Wɛeˈ ɔ ˈnaan: ‘-Kɔngɩnˈ, ˈˈtai- ˈmʋn in ˈye Zelizalɛmʋn mun ˈˈdhe ˈye ɔɔˈ -bhleˈ ˈkpa po.’ ˈBheɔ ˈŋwɔɔn- ˈbho ˈmɛn. Ɔ poɛ dhɩ kpɔ ɔˈˈ -wɛeˈ dhɛ -saˈ Neemi nʋn ˈbho -jieˈˈ. Ɔ poɛ Neemi Zida aˈ jiebhopoi- ˈˈdhe ɔ ˈˈɲɩɔnˈˈ ti -ɩn ˈyea ˈˈkwiglɔ ɔˈ -klui po.

Neemi ɲnian Zelizalɛmʋn ɛn, ɔ ŋmʋɛn glɔ ɔˈ -bhleˈ jha. ˈˈDhe ɔ -ˈgboo- ˈsraazaʋn- -e ˈˈdhrujheʋn- nɩan ˈo i -wɛeˈ ɔ -ghwlu ˈdhe ʋbʋ bho ɔ ˈnaan: ‘Dɩ -a nɩan ˈe ˈdhi ɩn -ɲniɛn- ˈˈjhrii. -A ˈye ˈe ˈkpɩ po -a ˈye dhbho nʋn.’ ˈCɛ ɛˈ klɛɛ ˈŋwɔɔn- ˈbho ˈmɛn. Ʋʋ -dee ˈˈkwiglɔ ɔ -bhleˈ aˈ poaˈ ˈmɛn.

ˈKlaa Israɛkɔʋn- anˈ ˈmʋnɲɛʋn -ˈnʋʋn -dee ʋaˈ -ghwlaa ˈmɛn ʋʋ ˈnaan: ‘-Bhleˈ aʋa poa, -toloˈ mɔn ˈbhɛɛˈ ɔ ˈyɩ -bhlua-.’ Ɲʋn -ʋa- poa -bhleˈ ˈse ʋaˈ ˈˈjrei -ˈnɩn -dheinˈˈ bho po ˈˈdhe ʋʋ kpa dhbho -nʋanˈ ɲan. -Ka -nɔnˈˈ ɔn zia ˈkamɔn- -bhleˈ -ˈnɩn an tɛn jha ˈˈdhe ɩan kuɛi.

Ɛmɛn- dɩ ʋbʋ aˈ ˈmʋnɲɛʋn ˈŋwɔɔn- -ghwlui ʋʋ ˈye dhɩ ˈmʋn in ˈghwlʋʋ- ˈˈdhe ʋʋ ˈye ˈˈzile- ʋʋ ˈye Zelizalɛmʋn glɔ kpʋn. Zifʋ -ˈˈwe ˈŋwɔan ɛɛˈ dhɛ tu ɛ, -faʋn an nʋn ʋbʋ ˈmɛn. ˈKlaa Neemi ˈnaan: ‘-Faʋn- anˈ nʋn aʋ -dhe. Zoova -nɩn -a -nanˈ.’ Ɔ deɛ ˈo ˈsʋlɩˈˈ i ʋʋ ˈye ɲʋn -an nʋan dhbho ˈdhei -fuo- -wɛeˈ ʋbʋ aˈ ˈmʋnɲɛʋn -saˈ ʋbʋ dhɛsaʋn ˈˈdhrui nʋn.

Ʋʋ gwɛ ˈˈkwiglɔ ɔˈ -bhleˈ -e ɔɔˈ -klui aˈ ˈkpa -poaˈ ˈmɛn ˈdhe ˈghwɩ aˈ 52 ˈdhi. Neemi -ˈgbooɛ Levi ɔˈ ˈcɛ ɛˈ klɛɛ i ˈbho Zelizalɛmʋn -wɛeˈ ʋʋ ˈye dhbho ɔˈ ˈˈɩ -gwɛɛ- ɛˈ fɛtɩ po. Ɔ zʋbʋ kpɛ ˈsɔɔn -wɛeˈ ʋʋ ˈye bhle. Ʋʋ -jhiiɛ ˈbho -klu ɲɔn ɔn ˈdhaa -da ˈˈnin ɛ ˈghwlʋa aˈ ˈˈda ˈˈkpe ʋʋ ye ˈo -bhloˈ ˈˈdhru ˈjha. Kpɔ dhueˈ muɛn ˈfɔ dhueˈ bho ˈˈdhe kpɔ -ˈnɔɔn muɛn ˈfɔ -ˈnɔɔn bho. Ʋa biɛn ˈˈkwiglɔ- ʋa yea -gain- -e -vuɔˈ -e -ziplʋ- bhla ˈˈdhe ʋa bhlee Zoova bho. Ɛsɩdrasɩ -nɩn kpɔ dhueˈ -ɔ nan ˈˈdhe Neemi -nɩn kpɔ -ˈnɔɔn ɔn nan. Ʋʋ -ˈŋmʋʋnˈ ˈdhe ˈˈdhruigboogbu- -klaaˈˈ ˈdhi. ˈCɛ ɛˈ klɛɛ, -ɛ nɩan ɲmai -e ˈɲnʋnkpaeˈ -e ˈˈɲnumɩɩnˈˈ ɛn, ʋʋ -za ˈsrae- ʋʋ ye Zoova ˈˈɲɩn ˈˈdhe ʋʋ po fɛtɩ -ˈnɛn ˈmɛn. Ɲʋn -tɛɛan- bho ˈŋwɔn ʋaˈ ˈmʋnan -gɩ ˈmɛn.