-Zuu gwɛai jhiɛ ˈo Kɔɔnɛɩ ˈˈkpe

Rɔmʋnkɔʋn- anˈ ˈsʋlɩˈˈ aˈ ˈˈdhrujhei dhueˈ -nɩn ˈo Sezare -dhe. Ɔɔˈ ˈɲnɩn -nɩn Kɔɔnɛɩ. -Bho ɔ se Zifʋ -nɩn mɔn -dhe ɛˈ, Zifʋ -ˈˈwe a ˈjheɔ ŋwɔn. Ɔ nmɔn -ˈglʋ -dhe ˈdhe ɲʋn sea dhɛ ˈbhle bho. Ɔ deɛ Zoova -gwlɩˈˈ ˈˈdhe ɔɔ bhaeɔˈ -dhe jheejhee. -Zɔn dhueˈ ɛ, ɔ ˈjheɛ dhbhoozuu- -ʋn -ghwlu ˈdhe ɔ bho -ʋn ˈnaan: “Ɲɔnsoa ˈŋwɔn -manˈ bhaeghwlu ˈmɛn. Dhbho ɲʋn ˈdhe Zope, ˈˈkwiglɔ- -ɔ ˈbho ˈdhi Piɛɛ nɩan -ˈmɛn ˈdhɔɔ ɔ ˈye ˈdhee- bho jhi.” Kɔɔnɛɩ ˈˈdoo- ɔ ye ɲʋn taan dhbho ˈdhe Zope ˈdhe Sezare ɛˈ ˈzɔin. -ˈGhwlʋ Sezare -wɛeˈ mun ˈe -nɩɛn kilo ɔˈ 50.

ˈDhe nɔnˈˈ nɩan dhueˈ ˈdhi ɛ, Piɛɛ ˈjheɛ ˈjheedhɛ ˈdhe Zope. Ɔ ˈjheɛ nmiian zifʋ -ˈˈwe aˈ dhia ˈˈdhe ghwlu dhueˈ -ghwlu ˈdhe ɔ bho ʋn ˈnaan: “Dhi nmiian -ˈnɩn” ˈKlaa Piɛɛ ˈse ˈo ˈŋwɔɔn-. Ɔ ˈnaan: “ˈƖn ˈse nmiian sea i -gwɛ dhi -kpɔ dhueˈ!” Ghwlu -ˈnʋn ˈnaan: ‘-Manˈ ˈdhaa- nmiian -ˈnɩn dhɩ sea i gwɛ- -dhe. Ɲɔnsoa nʋɛnˈ ɩn -gwɛ i.’ Ghwlu -ˈnʋn ˈtmʋʋn- Piɛɛ ˈmɛn -ke ʋn ˈnaan: ‘Ɲʋn taan -nɩn ˈo -manˈ ˈˈgbu aˈ -klu ˈˈjhibhaˈ. -Nɩn ʋbʋ mun.’ Piɛɛ muɛn ˈo -klu ˈˈjhibhaˈ ˈˈdhe ɲʋn nɩan ˈo ɛ, ɔ dee- ʋbʋ dhɛ ʋa ˈbɔɔan in. Ʋʋ ˈnaan: ‘Kɔɔnɛɩ nɩan Rɔmʋnkɔʋn- anˈ ˈsʋlɩˈˈ aˈ ˈˈdhrujhei- dhueˈ -mɔn dhbho -aʋ. Mun ˈdhe ɔ bho ˈdhe Sezare.’ Piɛɛ ˈtmʋʋn ʋbʋ ˈmɛn ʋʋ ˈye ˈbho ɔ ˈˈŋwɛn ˈpɛn. Zɔn -ˈnɔɔn zɩan, ɔ nɩn ʋbʋ -e ˈdhoudhi -ˈˈwe -ˈnʋʋn nɩan ˈo Zope ˈkpa ˈo ˈmɛn ʋʋ ye mun.

Kɔɔnɛɩ ˈjhea Piɛɛ ɛ, ɔ poɛ ˈkɔi glʋ. ˈKlaa Piɛɛ ˈnaan: ‘-Sɔn ˈmʋn! -Ka nɩan ˈkamɔn- ˈɩn -nɩn -ke. Ɲɔnsoa ˈnaan ˈɩn jhi ˈnɔn- -ɔn bho -ˈˈgbu, -bho Zifʋ -ˈˈwe aˈ pa ˈe ɲʋn sea Zifʋ -nɩn bho -ˈˈgbu mɔn -dhe ɛˈ. -Kaan bhla, dhɛ -ɛɛˈ dɩ ˈdha ˈʋn ɛn, ˈtmʋʋɛn ˈmʋn.’

Kɔɔnɛɩ -ghwluɛ ˈe Piɛɛ bho ɔ ˈnaan: ‘Ɛɛ nʋɛn ˈghwɩ ɲiɛn bhla, ˈɩn -nɩɛn Ɲɔnsoa bhae- -ˈnan -dhe -wɛeˈ dhbhoozuu- dhueˈ -ghwlu ˈdhee bho ʋn ˈnaan ˈɩn ˈdha -ʋn. -Kɔngɩnˈ -tɔɔn -abʋ Zoova aˈ Ghwlu.’ Piɛɛ ˈnaan: ‘ˈƖn ˈŋwɔɛn in -ka Ɲɔnsoa aˈ ˈcra ɲʋn ˈin ɛn. Ɔɔ ˈŋwɔɔn- ɲɔn ooˈˈ ɲɔn -ɔn ˈbɔan -ɔ ˈyeɔ ˈˈɲɩn ˈmɛn.’ Piɛɛ -tɔɔɛn ʋbʋ dhɩ -duuˈˈ ˈdhe Zezi ɔˈ dɩ ˈdhi. ˈSʋ -zuu gwɛai jhiɛ ˈo Kɔɔnɛɩ -e ɲʋn nɩan ˈbho ɔ ˈˈŋwɛn ˈˈkpe ˈˈdhe ɲʋn -jhaa ʋaˈ klɛɛ ˈˈnin -zɔnˈ.