Kletiɛn -ˈˈwe a bhla -bɔyaˈˈ -bo ˈbhlʋɩ -duuˈˈ ˈdhii

Zezi ˈtmʋʋn dhbhoʋn ˈmɛn -dhe ʋʋ ˈye -bɔyaˈˈ bo bhla da ˈbhlʋa aˈ klɛɛ ˈˈkpe. Dhɛ ɔ ˈtmʋan, ɛmɛn- ʋʋ nʋn. ˈDhe 47 zʋn ˈdhi ɛ, ˈdhoudhi -ˈˈwe nɩan Antiɔsɩ dhbho Pɔʋ -e Baanabe ˈmɛn ʋʋ ye -bo -bhlaaˈ mun ˈdhe ˈdhebhaˈ. -Bobhlaʋn- ˈsɔɔn -ˈnʋn -ʋʋ fia -glʋˈ bhla bo ˈdhe Azi ˈˈZaan- (ɲʋn an ˈdhaa Tiiki ˈnɔn -aaˈ nɔnˈˈ zɩanˈ an). ˈˈKwigwlɛ- ʋʋ jhiia ˈdhii ɩanˈ -ˈnɩɩn -mɩn -nɩn Dɛɛbe -e Lisri -e Ikoniɔmʋn.

Pɔʋ -e Baanabe a bhla bo ˈdhe ɲʋn anˈ klɛɛ bho -dhe: ɲʋn ˈbhlea ˈˈghwliɛ -e ɲʋn sea ˈˈghwliɛ ˈbhle -e ɲʋn -klaeˈˈ -e ˈˈɲnumɩɩnˈˈ. ˈTɔdɩ aˈ bo ʋʋ bhla ˈdhe Klisɩ ɔˈ bo ɔˈ dɩ ˈdhi ɛ, ɲʋn -duuˈˈ ˈŋwɔɔn- ɩanˈ dɩ ˈmɛn. Pɔʋ -e Baanabe ɔ bhla bo ˈdhe Sɛɛzisɩ Polisɩ -ɔ nɩan Siprʋ ɛˈ ˈˈdhrujhei- bho ɛ, gwɩɔn- dhueˈ -ɔɔ ˈbɔn -ɔ ˈyʋbʋ jie dhe -kaan ˈdhe. ˈKlaa Pɔʋ -ghwluɛ ˈe gwɩɔn- -ˈnɔn bho ɔ ˈnaan: ‘Zoova a muɛn ʋn -bhla!’ ˈSʋ, gwɩɔn -ˈnɔn ˈˈdhɔɔˈ. ˈˈDhrujhei- -ˈnɔn ˈjhea dhɛ -nʋʋan, ɔ ˈkpa Zezi ɔˈ dhɛcɩain-.

Pɔʋ -e Baanabe bhla bo -da ooˈˈ da: ŋmɛinˈˈ ˈdhii, ˈdhɔɔ ˈdhii, jie bho i -e Zifʋ -ˈˈwe aˈ ˈˈdhruigboogbi ˈdhii. Ʋʋ ɲnian Lisrɩ ɛ, ʋʋ ˈpʋʋɛ ˈˈjhu dhueˈ -ɔ -klɔɔa-. Ɲʋn -ˈjhea ɛɛˈ da, ˈbho ʋbʋ -gwlɩˈˈ ɛ, Pɔʋ -e Baanabe -nɩɛn gɩlɩ- ˈˈdhe ʋa ˈbɔn ʋʋ ˈyʋbʋ ˈˈjhibhaˈ -gbɛɛ. ˈKlaa Pɔʋ -e Baanabe kaan ʋbʋ jieˈ ˈˈdhe ʋʋ ˈnaan: ‘Ɲɔnsoa aˈ ˈsʋ aʋ ˈye ˈˈɲɩn! -A -nɩɛn -glɔɲiɔn.’ ˈSʋ Zifʋ -ˈˈwe jhi -ʋʋ nʋɛn ˈˈdhe ɲʋn -ˈnʋn ˈkpaa- Pɔʋ ˈcɛn. Ʋʋ tbhɔɔ ˈseiˈˈ dhi, ʋʋ ˈˈklɔi ʋʋ yeɔ ˈo ˈˈkwiglɔ ˈdhi -za. ˈBho ʋbʋ -gwlɩˈˈ -dhe ɛ, ɔ ˈmɛɛn. ˈKlaa, Pɔʋ ˈse ˈmɛn -dhe! ˈDhoudhi -ˈˈwe ˈˈdooˈ ʋʋ yeɔ sʋn bho po ˈˈdhe ʋʋ -pɔɔ ˈdhe ˈˈkwiglɔ- ˈdhi dhe. Ɛɛ ˈbhɔɔa ˈbho ɛ, Pɔʋ muɛn Antiɔsɩ dhe.

ˈDhe 49 zʋn ˈdhi ɛ, Pɔʋ -dee ɔɔˈ -bobhladhbho- ɔˈ ˈdhebhaˈ -muɛn- ɛnˈ kpɛ ˈsɔɔn -nɛn. Ɔ ˈyea -dee ɛ, ɔ muɛn ˈdhoudhi -ˈˈwe ˈˈɩ dee- -ˈnan ˈdhe Azi ˈˈzaan-. ˈBho ɛ ˈdhe ɛ, ɔ bhla bo ˈdhe Elɔpʋ aˈ ˈfɔ tɛɛan bho ˈdhi. Ɔ muɛn ˈdhe Atɛnɩn -e Efɛzɩ -e Filipʋ -e Tesalonɩkɩ -e dhɩ -ˈnɩɩn ˈmʋn in. Silasɩ -e Lukɩ -e ˈdhoudhi -ɲmau ˈˈzaan dhueˈ -ɔɔˈ ˈɲnɩn nɩan Timote ˈkpa Pɔʋ bho ˈdhe ɔɔˈ ˈdhebhaˈ -muɛn ˈdhi. Ʋʋ nʋʋɛn dhbho i ʋʋ ye ɲɔnsoagbi- man ˈˈdhe ʋʋ yɩ ikuu-. Pɔʋ nʋɛn -zʋn dhueˈ ˈdhe ˈˈdieˈˈ ˈbho Korɛntɩ -wɛeˈ ɔ ˈye ˈdhoudhi -ˈˈwe nɩan ˈo ˈkpɩ po. Ɔ bhla -bo, ɔ -tɔɔɛn- ɲʋn dhɛ ˈˈdhe ɔ ˈcreɛ ˈsɛɩ ɔ ye ɲɔnsoagbi- -duuˈˈ ˈdhii kpa. Ɔɔ nʋɛn -peeˈˈ -ke -dhe -wɛeˈ ɔɔ ˈˈdu ɔɔˈ ˈˈjɛ ɛˈ dɩ. Ɛɛ ˈbhɔɔa ˈbho ɛ, Pɔʋ muɛn Antiɔsɩ dhe.

ˈDhe 52 zʋn ˈdhi ɛ, Pɔʋ -dee ɔɔˈ -bobhladhbho ɔˈ ˈdhebhaˈ -muɛn ɛnˈ taan nɛn ˈmɛn ˈdhe Azi ˈˈzaan-. Ɔ nʋɛn -zɩn -duuˈˈ ˈbho Efɛzɩ ɔɔ yea ɲʋn dhɛ -tɔɔn, ɔɔ yea ɲʋn anˈ ˈghwɛˈbhɔɔ ˈˈdhe ɔɔ yea ɲɔnsoagbu- sʋn bho po. Zɔn ooˈˈ zɔn, ɔɔ bhla ghweepo -bo -dhe ˈdhe -klainˈˈ -gbu dhueˈ ˈdhi. Ɲʋn -duuˈˈ -a poɔ -dheinˈˈ bho -dhe ˈˈdhe -ʋa- ziian kplɩn ˈˈɩn. ˈBho ɛ ˈdhe ɛ, ɔ muɛn Filipʋ -ɛ nɩan ˈdhe Efɛzɩ aˈ ˈˈdhru bho ˈˈdhe ɔ dreˈ ˈsʋ ɔ ɲnin Korɛntɩ. Pɔʋ bhla bo ˈdhe ˈbhlʋɩ -duuˈˈ ˈdhii ɛ, ɛ ˈyea ˈo ˈbhɔɔ- ɔ, ɔ muɛn Zelizalɛmʋn.