-Gazogbudheidei- ˈkpa kletiɛn

-Kʋɔn- -ɲnʋnkpaoˈ -jhuzaanˈˈ dhueˈ -nɩn ˈo Filipʋ -dhe -zuusaʋn- -nɩn ˈe ˈmʋn. -Zuusaʋn- -ˈnʋn an nʋɛnˈ ʋan yea dhɩ zi ˈˈdhe ɲʋn -ʋaˈ -kʋɔn- ʋn nɩan ʋa yea ˈghwɛi -duuˈˈ ˈjhe. Pɔʋ -e Silasɩ ɲnian Filipʋ ɛ, ʋn -dee ʋbʋ aˈ ˈdhe -naanˈ ˈmɛn. Ʋn nʋn kaˈ ˈmɛn ˈdhe ˈghwɩ -duuˈˈ ˈdhi. -Zuusaʋn- -ˈnʋn an nʋɛnˈ ʋan yea ˈˈghwɔ ʋan yea ka ˈdha: “Ɲʋn nʋn nɩɛn Ɲɔnsoa nɩan ˈe ˈˈjha aˈ dhbhonʋʋn-.” Ɛɛ ˈbhɔɔa ˈbho ɛ, Pɔʋ -ghwluɛ ˈe -zuusaʋn- -ˈnʋn bho ɔ ˈnaan: ‘ˈDhe Zezi ɔˈ ˈɲnɩn ˈmʋn, a ˈghwlʋ ˈdhe ʋn ˈmʋn!’ -Zuusaʋn- -ˈnʋn ˈghwlʋ ˈe ˈɲnʋnkpaoˈ -jhu -ˈnʋn ˈmʋn ˈmɛn.

Ɲʋn -ʋaˈ -kʋɔn- ˈɲnʋnkpaoˈ -jhu -ˈnʋn nɩan ˈjheɛ -ka ʋʋ ˈsea ˈghwɛiˈ ˈjhei ˈbhodhe ˈdhe ʋanˈ ˈsaa ˈmʋn ɛn, ʋʋ ˈkpa ˈcɛn. Ʋʋ kpʋn Pɔʋ -e Silasɩ ˈmɛn ʋʋ yʋbʋ ˈbho ˈˈkwiglɔ ɔˈ ˈpeejheʋn ˈˈjhibhaˈ kpa ˈˈdhe ʋʋ ˈnaan: ‘Ɲʋn nʋn anˈ ˈjhe ˈtee ŋwɔn ˈˈdhe ʋa poɛ dhɩ ˈˈjhai da ˈˈkwiglɔ- nɔn ˈdhi!’ ˈPeejheʋn ˈnaan ɲʋn bhla Pɔʋ -e Silasɩ ɲʋn ˈyʋbʋ -gazo ˈdhi po. -Gazo- aˈ -ˈˈgbu -die- -tɛɛan bho ˈˈdhe -ɛ kpea ˈdhii ɛ, ˈdhemɔn -gazogbudheidei- ˈˈvile- ʋbʋ -wɛeˈ ɔ po ʋbʋ aˈ bhɩ ˈdhe tu ˈdhi.

Pɔʋ -e Silasɩ bhleˈ ʋʋ ye Zoova ˈˈɩ ˈbhɛɛ-. Ʋa bhlea -ˈmɛn gazojheʋn- sia ˈo a poɛ -dheinˈˈ dhi. ˈSʋ ˈbho ˈˈmaʋnglu- aˈ gwɛa, ˈbhlʋa trɛˈ ɛ ye -gazo- -gbu i ziia-. -Kwli -kaiɛn- ˈˈŋwɛn ˈˈdhe ˈˈcɩn -e dhɩ ʋʋ saan -gazojheʋn- dhi ɛ, ɩn kainˈ. -Gazogbudheidei- pleˈ ɔ ye ˈe -gazo- aˈ -ˈˈgbu -di -tɛɛan bho ˈˈjhibhaˈ mun ˈˈdhe ɔ ˈjheɛ -ka ɩn -flɔan- ŋwɔn. ˈBho ɔ -gwlɩˈˈ ɛ, -gazojheʋn- pleˈ. Ɛɛˈ dɩ ɔ ˈˈdhuo- -blajrɛnˈ ˈmʋn -wɛeˈ ɔ ˈye ɔɔˈ ˈˈjɛ ˈdhbha.

ˈKlaa, Pɔʋ ˈˈghwɔɔˈ ɔ ˈnaan: ‘-Manˈ nʋn -manˈ ˈˈjɛ dhɛsaʋn ˈˈdhrui -dhe! -Aaˈ klɛɛ nɩn da ˈmɛn!’ -Gazogbudheidei- pa ˈsʋ ɔ ˈˈvilɛ- ɔɔˈ ˈˈjɛ ˈbho Pɔʋ -e Silasɩ ɔˈ bhɩ bho. Ɔ deeɛ- ʋbʋ i ɔ ˈnaan: “Dhɛwɛ- ˈye nʋn -wɛeˈ ˈye ˈpʋ -ɛ?” Ʋʋ -ghwluɛ ˈdhe ɔ bho ʋʋ ˈnaan: ‘Mɔn -e -manˈ -ˈˈgbuzɔncɛ ˈye Zezi -gwlɩˈˈ de.’ Pɔʋ -e Silasɩ bhla Zoova aˈ -bo ˈdhe ʋbʋ bho ˈˈdhe -gazogbudheidei- -e ɔɔˈ -ˈˈgbuzɔncɛ ɛˈ klɛɛ -jhii- ˈˈnin -zɔnˈ.