Pɔʋ -e Timote

Timote -nɩɛn ˈdhoudhi -ɲmau ˈˈzaan- dhueˈ -ɔ -nɩn ˈe Lisrɩ aˈ ɲɔnsoagbu- ˈdhi -dhe. Ɔɔˈ ˈˈbho -nɩɛn Glɛkɩ ˈˈdhe ɔɔˈ ˈdhou -nɩɛn Zifʋ. Ɔɔˈ ˈdhou Enisɩ -e ɔɔˈ ˈˈnan -ɲnʋnkpaoˈ Loisɩ a ˈtmʋʋɔn Zoova aˈ dɩ -ɛ ˈghwlʋa ˈe ɔɔˈ ˈˈzaan nɔnˈˈ.

Pɔʋ ɔ nʋan ɔɔˈ -bobhladhbho- ɔˈ ˈdhebhaˈ -muɛn ɛnˈ ˈsɔɔn nɛn ɛn, ɔ muɛn Lisrɩ. Ɔ ˈjheɛ ˈˈkpei -ka Timote -kman ˈdhoudhi -ˈˈwe aˈ dɩ ˈˈdhe ɔɔ pʋbʋ sʋn bho jheejhee ɛ. Pɔʋ ˈtmʋɔn ɔ ˈyeɔ -jieˈˈ kpa. -Mɩɩnˈˈ -mɩɩnˈˈ ˈsʋ, Pɔʋ -tɔɔɛn Timote dhɛ -wɛeˈ ɔ ˈye -bɔyaˈˈ -bo -bhlai- -e ɲʋndhɛtɔɔin- ˈdhɔɛeˈ -nɩn.

-Da ooˈˈ -da Pɔʋ -e Timote a muan, -zuu gwɛai a pʋbʋ jie bho -dhe. ˈDhe ˈˈmaʋnglʋ- dhueˈ ˈdhi ɛ, Pɔʋ ˈjheɛ ˈjheedhɛ -ɛ ˈdhe ˈdhi Masedoanɩnkɔin- dhueˈ ɔ bhaeɔ dhi ɔ ˈnaan: “Jhi -ˈye -aʋ sʋn bho po!” Pɔʋ -e Timote -e Silasɩ -e ˈdhoudhi -ˈˈwe -ˈnʋʋn mun ˈe ˈmɛn ʋʋ ye bo bhla ˈˈdhe ʋʋ yeɛ nʋn ɲɔnsoagbi- ye ˈe -nɩn.

ˈDhe Masedoanɩn ɛnˈ ˈˈkwiglɔ- ɲʋn an ˈdhaa Tesalonikɩ ˈdhi ɛ, ˈɲnʋnkpaeˈ -e ɲmai- -duuˈˈ ˈkpa kletiɛn. ˈKlaa Zifʋ -ˈˈwe -ˈnʋʋn nɩan ˈe ɛ, ʋa nʋɛn Pɔʋ -e ɔɔˈ dhaiˈˈ -ˈˈwe -gwlɛnˈ bho. Ʋʋ -ˈgbooɛ ɲʋn in ˈˈdhe ʋʋ kpa ˈdhoudhi -ˈˈwe -ˈnʋʋn ˈbho ˈˈkwiglɔ ɔˈ ˈˈdhrujheʋn- ˈˈjhibhaˈ -wɛeˈ ʋa ˈˈghwɔ ʋʋ ˈnaan: “Ɲʋn nʋn -nɩɛn rɔmʋnkɔʋn anˈ ɲʋnbhleglibha aˈ ˈmʋnɲɛʋn-!” Ɲʋn -an ˈbɔn -ʋʋ ˈye Pɔʋ -e Timote ˈdhbha, ɛɛˈ dɩ ʋʋ ple ˈˈmaʋn ʋʋ mun Bere.

Ɲʋn nɩan ˈo Bere -kman -bɔyaˈˈ bo ɔˈ -dheinˈˈ bho -po dɩ. Glɛkɩ -e Zifʋ -duuˈˈ -ˈkpa dhɛcɩaʋn ˈbho ˈˈkwiglɔ- -ˈnɔn ˈdhi. ˈKlaa Zifʋ -ˈˈwe -ˈnʋʋn -ˈghwlʋ Tesalonikɩ -ʋʋ jhi dhɩ ˈˈjhai poaˈ ˈbho -glɔ -ˈnɔn ˈdhi. ˈSʋ Pɔʋ ˈkpa ˈo ˈmɛn ɔ ye Atɛnɩn mun. Timote -et Silasɩ -siɛ ˈo Bere -weɛˈ ʋʋ ˈye ˈdhoudhi -ˈˈwe ˈkpɩ po. ˈBho ɛ ˈdhe ɛ, Pɔʋ ˈnaan Timote mun Tesalonikɩ ɔ ˈye ˈdhoudhi -ˈˈwe ɲʋn an ˈˈduaˈˈ ˈkle ˈdhemɔn sʋn bho po. Ɛɛ ˈbhɔɔa ˈbho ɛ, Pɔʋ dhbhoɔˈ -ke ɔ ye ɲɔnsoagbi- -duuˈˈ ˈdhii cɛɛn ɔ ye ˈdhoudhi -ˈˈwe ˈkpɩ po.

Pɔʋ -ghwluɛ ˈe Timote bho ɔ ˈnaan: “Ɲʋn anˈ klɛɛ -ʋa- ˈbɔan -ʋʋ ˈyea Zoova ˈˈɲɩn ɛn, ɲʋn an muɛn ʋbʋ ˈkle ˈˈdu-.” Ɲʋn ˈˈduɛˈˈ Timote ˈkle ˈˈdhe ɲʋn poɔ -gazo ˈdhi ɔɔˈ dhɛgwlɩdeɛ- ɛˈ dɩ. ˈKlaa dhɛ ɔ ˈbhɛɛa ɔ ˈyeɛ -to -dhe -ka ɔ kpʋan ˈo Zoova ˈˈbun in ɛn, ɛ ˈbhleɛ ɔɔˈ ˈmʋnan-.

Pɔʋ -ghwluɛ ˈe Filipʋkɔʋn- bho ɔ ˈnaan: “ˈMan jha aʋ Timote. Ɔɔ muɛn aʋ dhɛ ˈdhe ˈtɔdɩ ˈdhi -naan ˈdhaa -tɔɔn. Ɔɔ muɛn aʋ dhɛ -tɔɔn ˈdhe -bobhladhbho- ˈdhi.” Pɔʋ jhibhiˈ -ka ɔ ˈbhɛɛa ɔ ˈyea Timote -gwlɩˈˈ de ɛ. Ʋʋ -nɩɛn dhaiˈˈ -ˈˈwe -dhe ˈˈdhe ʋʋ ˈˈɲɩɛnˈˈ Ɲɔnsoa -dadhueˈ ˈdhe -zɩn -duuˈˈ ˈdhi.