Ʋʋ kpa Pɔʋ Rɔmʋn

Pɔʋ jra ɔɔˈ -bobhladhbho- ɔˈ ˈdhebhaˈ -muɛn ɛnˈ taan nɛn ˈˈdhru ˈbho Zelizalɛmʋn. Ʋʋ kpʋɔnˈ ˈbhomɔn ʋʋ yeɔ -gazo- ˈdhi po. ˈDhe ˈˈmaʋnglʋ- dhueˈ ˈdhi ɛ, Pɔʋ ˈjheɛ ˈjheedhɛ- -ɛ ˈdhe ˈdhi Zezi -ghwlu ˈdhe ɔ bho ɔ ˈnaan: “-Man muɛn Rɔmʋn -mun ˈˈdhe -ˈye bo bhla ˈdhe ˈˈkwiglɔ- -ˈnɔn ˈdhi.” Ɲʋn za Pɔʋ Zelizalɛmʋn ʋʋ yeɔ Sezare kpa ɔ ye -zɩn ˈsɔɔn nʋn ˈdhe -gazo- ˈdhi. ˈˈDhrujhei- Fɛsɩtisɩ nɩan ɔɔˈ ˈpee ˈjhea a, Pɔʋ ˈnaan: ‘ˈMan ˈbɔn Sezaa ˈye ˈman ˈpee ˈjhe ˈdhe Rɔmʋn.’ Fɛsɩtisɩ ˈnaan: “-ˈNaan -man ˈbɔn Sezaa ˈye -ˈman ˈpee ˈjhe, ɲʋn an muɛn ʋn ˈdhe ɔ bho -kpa.” Ɲʋn ˈjhaa- Pɔʋ ˈdhe bato dhueˈ -ɔɔ muan Rɔmʋn ˈdhi ˈˈdhe Lukɩ -e Aritakɩ -nɩn ɔn mun -ke.

ˈBho ˈtɔnin- ˈˈkpe ɛ, ˈˈnin poɔˈ -klaaˈˈ dhueˈ jhi -dhe ˈjɛɛn- ˈdhe ˈghwɩ -duuˈˈ ˈdhi. Ɲʋn anˈ klɛɛ nɩan ˈe bato ˈdhi a sa ˈjhe -ˈmɛn ʋʋ ˈye ˈmɛn -dhe. ˈKlaa Pɔʋ -ghwluɛ- ˈe ʋbʋ bho ɔ ˈnaan: ‘Dhbhoozuu dhueˈ -ghwluɛ- ˈdhee bho ˈdhe ˈjha dhueˈ ˈdhi ʋn ˈnaan: “-Faʋn anˈ nʋʋn- -dhe, Pɔʋ. -Man muɛn Rɔmʋn mun ˈˈdhe ɲʋn anˈ klɛɛ -nɩn nɩan ˈdhe bato ˈdhi a muɛn ˈkmʋn -sie- -ke.” Aʋ po ˈe ˈkpɩ! -A ˈse ˈmɛn in.’

ˈˈNin poɔˈ -ˈnɔn nʋɛn ˈghwɩ aˈ 14. Ɛɛ ˈbhɔɔa ˈbho ɛ, ʋa ˈjheɛ ˈbhlʋa- i ˈdhe ɲan. Ɛ nɩn ˈbhlʋa- nɩan ˈbho ˈˈnin ɛnˈ gwɛa ɲɔn ɔn ˈdhaa Malitɩ. Bato seeˈ ɲnin ˈsʋ ɔ ghwlʋɛˈ ˈfɛ. ˈKlaa ɲʋn anˈ klɛɛ nɩan ˈe bato ˈdhi ɛ, ʋʋ ɲnin ˈdhɔɛeˈ ˈmʋn ˈbho ˈbhlʋa nɩan ˈo ˈˈnin ɛnˈ gwɛa ˈˈkpe. Ʋʋ nɩɛn- ɲɔʋbʋ aˈ 276 -dhe. Ɲʋn -ˈnʋʋn ˈˈbileˈ ˈˈdhe -ˈnʋʋn kpʋɛn bato ɔˈ ˈfɛ i ʋʋ ˈye ˈo ˈˈnin ˈˈkpe -jhii ˈsʋ ʋʋ ye ˈe ˈkpʋʋ ɲnin. Ɲʋn nɩan ˈbho Malitɩ ˈˈduɛˈˈ ʋaˈ dɩ ˈˈdhe ʋʋ dbha nɛn ʋʋ ˈyʋbʋ ˈˈɲɩn ʋʋ ye ˈŋwɔnan.

ˈCɩ taan zia, ˈsʋlɩˈˈ poɛ Pɔʋ ˈdhe bato -ˈnɔɔn -ɔɔ muan Rɔmʋn ˈdhi. Pɔʋ ɲnian ˈe ɛ, ˈdhoudhi -ˈˈwe jhiɔ ˈˈɩ ˈjhaa -ˈnan. Ɔ ˈjhʋbʋ ɛ, ɛ -kuu ɔ dhi ˈˈdhe ɔ poɛ Zoova ˈsɛ. -Bho ɔ -nɩn gazojhei mɔn -dhe ɛˈ, ɔ kpʋɛn ˈˈgbu -ʋn ˈdhe ˈdhi ɔ -nɩn -wɛeˈ ˈsʋlai- dhueˈ deɔ ˈdhei ˈdhemɔn. Ɔ nʋɛn -zɩn ˈsɔɔn ˈdhe ˈˈgbu -ˈnʋn ˈdhi. Ɲɔʋbʋ a jhiɛ ˈdhe ɔ bho, -wɛeˈ ɔɔ ˈtmʋʋn ʋbʋ Zezi -e Ɲɔnsoa aˈ ˈbheɔglɔ ɔˈ dɩ. Ɔ ˈcreɛ ˈsɛɩ- -ke ɔ ˈye ˈe Asi ˈˈzaan- -e Zide aˈ ɲɔnsoagbi- ˈdhii kpa. Zoova -jhiiɛ Pɔʋ i ˈjɛɛn- ɔ ˈyeɛ nʋn -bɔyaˈˈ -bo ye -bhlaa ˈbhlʋɩ aˈ klɛɛ ˈdhii.