Dhɩ ɲʋn za ˈkwla ˈdhe Zan bho ɛ

-Da ɲʋn poa dhbhoi Zan -gazo ˈdhi ˈbho -glɔ nɩan ˈo ˈˈnin ɛnˈ gwɛa ɲʋn an ˈdhaa Patɩmɔsɩ ˈdhi ɛ, Zezi toɔ ˈjheedhɩ aˈ 16 ˈˈɩ. ˈJheedhɩ -ˈnɩn an ˈtmʋɛn dhɩ -ˈyea -nʋʋɛn- ˈdhe ˈkmʋn anˈ ɲan anˈ dɩ. -Ka Ɲɔnsoa aˈ ˈɲnɩn ˈyea -vlɛnˈˈ in -zaa sʋn nʋn -e -ka ˈbheɔglɔ ˈyea -jhi sʋn nʋn -e -ka Zoova ˈyea ɔɔˈ ˈɲnɩn ˈˈɩ ˈbhɛɛ- sʋn nʋn -e -ka Ɲɔnsoa aˈ -ˈglʋdɩ ˈyea -nʋʋɛn sʋn nʋn ˈdhe jhaʋn ˈdhi -e da ˈbhlʋa ˈˈkpe ɛ, ɩanˈ dɩ -mɩn ˈjheedhɩ- -ˈnɩn anˈ ˈtmʋn.

ˈDhe ˈjheedhɛ dhueˈ ˈdhi ɛ, Zan ˈjheɛ Zoova -ɔ -dei ˈbho ˈbheɔkpaa- -klaaˈˈ ˈˈkpe -wɛeˈ ɲankɔʋn- anˈ 24 -paa dhɩ pli ˈmʋn ˈˈdhe ˈbheɔgblɩ- -nʋʋan ˈsanʋnˈ -nɩn ˈo ˈˈdhru. ˈˈNin ɛnˈ ˈˈjhriicrɛ- ɛˈ nɛn -e ˈˈnin ɛnˈ ˈˈgbu ghwlu -a ˈghwlʋ ˈe ˈbheɔkpaa- bho. Ɲankɔʋn- anˈ 24 ɛn poɛ ˈˈdhru glu ˈbho Zoova ˈˈjhibhaˈ ˈˈdhe ʋa gbɛɛ ɔ ˈˈjhibhaˈ. ˈDhe ˈjheedhɛ -ˈnɛɛn ˈdhi ɛ, Zan ˈjheɛ ɲʋn -duuˈˈ -ʋʋ ˈghwlʋ ˈbhlʋɩ aˈ klɛɛ ˈdhii, -ʋa- po ghwlu aˈ klɛɛ ʋa yea Zoova ˈˈɲɩn. Zezi nɩan ˈbhlaajhu ɛ, ɔmɔn- -ɔɔ pʋbʋ jie bho ˈˈdhe -ɔɔ kpʋbʋ ˈdhe ˈkmʋnɩɛn- ɛnˈ ˈˈnin bho. Ɛɛ ˈbhɔɔa ˈbho ɛ, ˈdhe ˈjheedhɛ -dhee -ˈnɛɛnˈ ˈdhi ɛ, Zezi -e ɲankɔʋn- anˈ 24 -dee ɲʋn ˈbhleaˈ ˈmɛn ˈdhe jhaʋn ˈdhi. ˈBho ˈjheedhɛ -ˈnɛn ˈdhe, Zan ˈjheɛ Zezi -ɔɔ bhla ˈˈkuudhɛ, -ɛ nɩan Satan, ɔmɔn- -e ɔɔˈ ziisaɩn- -e. Zezi zʋbʋ ˈdhe jhaʋn ˈdhi ˈˈdhe ɔ -ˈˈvile- ʋbʋ da ˈbhlʋa ˈˈkpe.

ˈSʋ Zan ˈjheɛ ˈBhlaajhu -e ɲʋn anˈ 144.000 -ʋʋ -ɲnain ˈbho Siɔn -Trʋ ˈˈkpe. Ɔ ˈjheɛ dhbhoozuu- -ke -ʋan bhla nain da ˈbhlʋa aˈ klɛɛ ˈˈkpe -wɛeˈ -ʋan ˈtmʋʋn ɲʋn ʋʋ ˈye Ɲɔnsoa -plee ˈˈdhe ʋʋ ˈyeɔ ˈˈɩ ˈbhɛɛ-.

ˈDhe ˈjheedhɛ- tbha ˈo -ˈmɛn ˈdhe ˈdhi ɛ, Aamagedɔn tʋ ˈkpaaˈ. ˈDhe tʋ -ˈnʋn ˈdhi ɛ, Zezi -e ɔɔˈ ˈsʋlɩˈˈ kpa -zibho ˈbho Satan -e ɔɔˈ ˈkmʋn -saʋn ˈˈkpe. ˈDhe ˈjheedhɛ ˈbhɔɔa ˈbho ˈdhi ɛ, ɔ ˈjheɛ ghwluiŋwɔɛn- nɩan ˈo ɲʋn nɩan ˈe jhaʋn ˈdhi -e da ˈbhlʋa ˈˈkpe ˈɲnɩn. Satan -e ɲʋn anˈ klɛɛ ˈkpa ˈdhe ɔɔˈ ˈfɔ bho -zaa dhi. Ɲʋn anˈ klɛɛ nɩan ˈe jhaʋn ˈdhi -e da ˈbhlʋa ˈˈkpe ʋa ˈbhɛɛ- Zoova aˈ ˈɲnɩn ˈˈɩn ˈˈdhe ɔɔˈ ˈsʋ ʋa ˈˈɲɩn.