Ka -a ˈbhɛɛ -a ˈye nʋn -wɛeˈ -aaˈ ˈˈɲɩnsʋn ˈye ˈe Ɲɔnsoa ˈˈjhriɛ ˈdhe i -nmɔn?

-Ka -a nʋan ɛɛˈ ˈjhe sʋn ˈdhe ˈcɩaandhɛ- zia ˈdhi ɛ, ɛ se pliegbi aˈ klɛɛ -mɩn -nmɔn ˈe Ɲɔnsoa ˈˈjhriɛ ˈdhe i -nɩn. ˈKlaa -a ˈbhɛɛˈ -a ˈye Ɲɔnsoa ˈˈɲɩn -ka ɔɔ ˈbɔan. -ˈMɛn “ˈˈɲɩnsʋn-” -wɛ -ʋan- nʋn Ɲɔnsoa ˈtʋn -ɛn? (Jacques 1:27) -Ŋmʋn dhɛ Biiblʋ a tɔɔan ɲʋn ˈdhe ɛɛˈ dɩ ˈdhi ɛ.

1. Dhɛwɛ- -aaˈ ˈˈɲɩnsʋn ˈye ˈo ˈˈkpe tbha -a?

-Aaˈ ˈˈɲɩnsʋn ˈye ˈo dɩ Biiblʋ a ˈtmʋan ˈˈkpe tbha. Zezi -ghwluɛ- ˈe Ɲɔnsoa bho ɔ ˈnaan: “-Manˈ ghwlu -nɩɛn- tɔˈdɩ-.” (Jean 17:17) Dhɩ pliegbi- -ˈnɩɩn an tɔɔan ɲʋn se ˈe Biiblʋ ˈdhi ˈghwlʋ. Ɩn tbha ˈo -glɔɲiɔn ɔnˈ ˈtmʋʋndɩ -e ˈˈbhlidhɩ ˈˈkpe. Ɛɛ nʋɛnˈ ʋa yea ɲʋn -an “poa Ɲɔnsoa aˈ ˈtee ˈfɔ bho” nɩn, Zoova se ʋaˈ dɩ -kman. (Zro Marc 7:9.) ˈBho -ˈmɛn ɛnˈ ˈgɔ ˈˈɩ ɛ, -bho -aaˈ ˈˈɲɩnsʋn tbha ˈo dɩ Biiblʋ a ˈtmʋan ˈˈkpe ˈˈdhe -aa sa ˈe Ɲɔnsoa aˈ ˈsrɩn ˈdhi naan anˈ, ɛɛ poɛ ɔɔˈ -pɛɛ ˈmʋnan in.

2. Ka -a ˈye Zoova ˈˈɲɩn sʋn nʋn -ɛn?

Zoova aˈ ˈsʋ -a ˈye ˈˈɲɩn, dhɛ nɩan ˈo ɛ, ɔmɔn- nʋn -aʋ. (Révélation 4:11) Dhɛ -ˈmɛn ˈdha -mɛn -nɩn -a ˈye ɔɔˈ dɩ -kman, -a ˈye ɔɔˈ ˈsʋ ˈˈɲɩn, -a ˈse -baadhɩ -e dhɛ -dhee -ˈnɛɛn ˈˈɲɩn in.​—Zro Isaïe 42:8.

-Aaˈ ˈˈɲɩnsʋn ˈye “ˈpepe -nɩn ˈˈdhe ʋn ˈye ˈŋwɔɔn- ka -nɩn” ˈdhe Zoova ˈˈjhriɛ ˈdhe. (Romains 12:1) Dhɛ -ˈmɛn ɛn ˈdha -mɛn -nɩn -a ˈye ɔɔˈ ˈsrɩn ŋwɔn ˈjhe. Ɛɛˈ kpɔ dhueˈ ka, ɲʋn kman Zoova aˈ dɩ ɛ, ʋa ˈjheɛ ˈsrɩn ɔ toa ˈo ˈdhe ˈˈbhlitiiɛ ɛˈ dɩ ˈdhi ŋwɔn. Ʋaˈ nʋn dhɩsaɩn- -ɩan- jha ɲʋn ˈkledɩ bho, -ɩn nɩan tebha -e ˈˈgeji -e nmɔn ˈnan anˈ -jieˈˈ -ziɛ.a

3. Dhɛɛdɩ- -a -nɩn -aaˈ ˈdhoudhi -ˈˈwe ˈye Zoova ˈˈɲɩn -da dhueˈ -ɛ?

ˈˈDhruigbooɛ- -aa nʋan ˈdhe ˈdhɔɔ ooˈˈ ˈdhɔɔ ˈdhi ɛ, ɛɛ poɛ -aʋ sʋn bho -aa yea ‘Zoova ˈˈɩ ˈbhɛɛ ˈdhe ɲɔnsoagbu ˈdhi.’ (Psaume 111:1, 2) Ɛɛˈ kpɔ dhueˈ -mɛn -nɩn -aa bhleˈ -aa yea Ɲɔnsoa ˈdha. (Zro Psaume 104:33.) Zoova a ˈbɔn -a ˈye ˈˈdhrui ˈgboo-, dhɛ nɩan ˈo ɛ, ɔ -kman -aaˈ dɩ ˈˈdhe ɔ jhibhiˈ -ka ɛ ˈbhɛɛa ɛ ˈyea -aʋ sʋn bho po -a ˈyea -bɔyaˈˈ sea ˈˈtianˈ ˈbhle ˈjhe ɛ. ˈDhe ˈˈdhruigbooɛ ˈmʋn ɛn, -aa poɛ bha ˈkpɩ.

KPA DHƐ I ˈŊWƆƐN ƝAN

4. Dhɛɛdɩ- -a ˈse -baadhɩ ˈbhlei ˈdhe -aaˈ ˈˈɲɩnsʋn ˈdhi -ɛ?

VIDEO: Ɲɔnsoa a ˈbɔn -a ˈye -baadhɩ i -jhii -wɛeˈ -a ˈyeɔ ˈˈɲɩn? (3:26)

• Ɲɔnsoa aˈ ˈcɛ ɛ ˈbɔan ʋʋ ˈyea -baadhɩ i -jhii ˈˈdhe ʋʋ ˈyeɔ ˈˈɲɩn -dhe ɛ, dhɛwɛ- -nʋʋɛn-?

ˈBho ɲʋn -ˈnʋʋn -gwlɩˈˈ ɛ, -baadhɩ -e fete ʋa jhiia i ˈdhe ʋaˈ ˈˈɲɩnsʋn ˈdhi a nʋɛnˈ ʋa yea Ɲɔnsoa i ˈˈkʋʋan. ˈKlaa ɛɛˈ nʋanˈ anˈ sʋbʋ Ɲɔnsoa bho tɛɛn? Zro Exode 20:4-6 -e Psaume 106:35, 36, -ˈmɛn aʋ ˈtmʋn ideedɩ- nɩn anˈ dɩ:

• -Baadhɩ- -aeˈˈ fete -wɛ ɲʋn -ˈnʋʋn an jhii i ˈdhe ʋaˈ ˈˈɲɩnsʋn ˈdhi -ɛ?

• -Bho ɲʋn an sa -baadhɩ -aeˈˈ fete i jhii ˈdhe ʋaˈ ˈˈɲɩnsʋn ˈdhi ɛˈ, ka Zoova ˈjheɛ -ɛ?

• -Bho ɲʋn an sa -baadhɩ -aeˈˈ fete i jhii ˈdhe ʋaˈ ˈˈɲɩnsʋn ˈdhi ɛˈ, ka -man ˈjheɛ -ɛ?

5. Zoova aˈ ˈsʋ ɔˈ ˈˈɲɩan an zeie -aʋ ˈmɛn ˈdhe sɩ ˈkwa

VIDEO: Tɔˈdɩ zeiɔˈ (5:16)

Zro Psaume 91:14, -ˈmɛn aʋ ˈtmʋn ideedɩ- nɩn anˈ dɩ:

• Dhɛ -a kman Zoova aˈ dɩ ˈˈdhe -aa ˈˈɲɩan ɔɔˈ ˈsʋ ɛ, dhɛwɛ- -ɛɛˈ ghwlu ɔ ˈcɛn ɔɔ mun -nʋn ɔ ˈye -aʋ ˈˈɲɩn -ɛn?

6. -Aa ˈˈɲɩɛn Ɲɔnsoa ˈdhe -aaˈ ɲɔnsoagbu aˈ ˈˈdhruigbooɛ ˈmʋn

ˈDhe -aaˈ ˈˈdhruigbooɛ ˈmʋn ɛn, -aa ˈbhɛɛ Zoova ˈˈa ˈˈdhe -aa poɛ bha ˈkpɩ -bho -aa sa ˈe dɩ za aˈ. Zro Psaume 22:22, -ˈmɛn aʋ ˈtmʋn ideedɩ- nɩn anˈ dɩ:

• Dɩ ˈdhoudhi -ˈˈwe za ˈe ˈdhe ˈˈdhruigbooɛ ˈmʋn ɛn, ˈjheeɩ ˈmʋnan ˈdhi ˈmɛn kpɔ dhueˈ

• -Man ˈbɔn -ˈye -manˈ ˈˈjɛ kpɔˈˈ po -wɛeˈ -ˈye ˈe dɩ -za?

7. -Bho -aa sa dhɩ -a ˈcɩan ɲʋn -ˈnʋʋn ˈtmʋʋn ɛnˈ, ɛɛ nʋɛn Zoova ˈtʋn

-A ˈbhɛɛˈ -a ˈye dhɩ -duuˈˈ i -jhii -wɛeˈ -a ˈye ɲʋn dhɩ Biiblʋ a tɔɔan ɲʋn ˈtmʋʋn-. Zro Psaumes 9:1 -e 34:1, -ˈmɛn aʋ ˈtmʋn ideedɩ- nɩn anˈ dɩ:

• Dhɛwɛ- ˈcɩan ˈdhe Biiblʋ ˈdhi -ɛɛˈ dɩ -man ˈbɔn -ˈye ɲɔn ˈtmʋʋn- -ɛn?

DHƐWƐ- ˈCƖAN-?

-Bho -a ˈye ˈe -aaˈ Nʋin ˈˈjhriɛ ˈdhei -nmɔn ɔnˈ, -ˈmɛn ɔɔˈ ˈsʋ -a ˈye ˈˈɲɩn, -a ˈyeɔ ˈˈɩ ˈbhɛɛ- ˈdhe ˈˈdhruigbooɛ ˈmʋn ˈˈdhe dhɩ -a ˈcɩan an, -a ˈyɩ ɲʋn -ˈnʋʋn -tɔɔn.

Dhɛwɛ- -ˈŋwɔn in -ɛn?

• Dhɛwɛ- ˈbhɛɛ -ɛ ˈye -aʋ sʋn bho po ˈˈdhe -a ˈye Ɲɔnsoa ˈˈɲɩn -kajɔɔnka -a?

• Dhɛɛdɩ- -a ˈye Zoova aˈ ˈsʋ ˈˈɲɩn -ɛn?

• Dhɛɛdɩ- -a -nɩn ɲʋn -an ˈbɔan -ʋʋ ˈyea ˈe Zoova ˈˈjhriɛ ˈdhei -nmɔn ˈye -da dhueˈ ˈkpa -a?

ˈBƆN DHƖ -ˈNƖƖN ANˈ I ˈŊWƆAN IN

ˈDhe -bo -ɔ ˈɲnɩn nɩan “Je ne suis plus esclave des idoles” ˈdhi ɛ, -ka ˈɲnʋnkpaoˈ dhueˈ nʋan -baadhɩ aˈ ˈˈɲɩan ˈbhɔ sʋn ɛn, ɛmɛn -man mun ˈjhe-.

“La Bible transforme des vies” (La Tour de Garde, 1er juillet 2011)

ˈCɩan dhɛ ˈbhɛɛa -ɛ -ˈyea ʋn sʋn bho po ˈˈdhe -ˈyea ˈe ideedɩ -za ˈdhe ˈˈdhruigbooɛ ˈmʋn.

“Loue Jéhovah dans l’assemblée” (La Tour de Garde, janvier 2019)

-Bho ˈˈdhruigbooɛ ˈmʋn muɛn -nɩn ˈkle ˈdhe ˈdhoudhi dhueˈ bhoˈ -dhe ɛˈ, -ŋmʋn -ka ɔɔ nʋan ˈˈdhe ɔɔ ˈjheea ˈˈdhruigbooɛ ˈjɛɛn ˈdhi ɛ.

Zoova ˈˈduɛ ˈman dɩ (3:07)

ˈBho ɲʋn anˈ -da -duuˈˈ -gwlɩˈˈ ɛ, kloa -nɩɛn- kletiɛn -ˈˈwe aˈ dhɛ. ˈKlaa, ɛ -nmɔn ˈo i kletiɛn -ˈˈwe ˈye kloa i -jhii ʋʋ ˈye Ɲɔnsoa ˈˈɲɩn?

“Pourquoi les Témoins de Jéhovah n’utilisent pas la croix dans leur culte?” (Dɩ ˈghwlʋa ˈo ɛntɛɛnɛtɩ ˈˈkpe ɛ)