-Nʋʋn Aʋ ˈjhe -Bɔyaˈˈ sea ˈˈtianˈ ˈbhle! dhbhoˈˈ ˈdhe -manˈ -bobhladhbho ˈdhi

-A ˈjhea ˈmʋnfeesɛɛ -e livrʋ -dhee -a ˈyea i -jhii -wɛeˈ -a -nɩn ɲʋn ˈyea Biiblʋ ˈcɩan an, ˈmʋnan an nʋn -aʋ ˈmɛn! ˈKpɩ -aa poa ˈe -wɛeˈ -a ˈyea dhɛcɩaʋn nʋn ɛn, -aa bhaeɛ Zoova ɔ ˈyɩ ˈˈniman po. (Mt 28:18-20; 1Co 3:6-9) Ka -aa nʋn ˈsɛɩ -dhee -ˈnɩn dhbho -nʋʋn sʋn -ɛn?

ˈSɛɛ ɲɔn ɔn ˈdhaa Aʋ ˈjhe -Bɔyaˈˈ sea ˈˈtianˈ ˈbhle! Biiblʋ ˈcɩan- an, ɛɛ tɔɔɛn ɲʋn ɲʋndhɛtɔɔnsʋn- -dhee. -ˈMɛn -bho -man sa -manˈ ˈˈjɛ kpɔˈˈ po ˈˈdhe -ˈye ɲʋn dhɛ -tɔɔn ɔnˈ, ˈˈdu ˈsrɩn nɩan da ˈzɔn da ˈˈjhriɛ.a

• Zro kpɔ ˈdhii, -ˈmɛn ˈtmʋn ideedɩ- nɩan ˈdhe ɛ ˈdhi ɩanˈ dɩ.

• Zro Biiblʋ aˈ ˈˈjhri -da ɲʋn ˈcrea “zro”, -ˈmɛn po dhɛcɩain sʋn bho -ka ɔ ˈyea ɩanˈ ˈˈjhriɛ ˈˈdu sʋn nʋn ɔ ˈyeɛ i ˈŋwɔn.

• Po ˈo video, -ˈmɛn ideedɩ tbha ˈo video nɔn ˈˈkpe i ɛ, aʋ ˈtmʋn ɩanˈ dɩ.

• Po ˈe ˈkpɩ -ˈye ˈcɩaandhɩ nɩan ˈe kpɔ ˈdhi ˈˈdhru jra.

ˈDhe -bobhlaaˈ a, ˈˈɲɩn ɲɔn ˈmʋnfeesɛɛ -wɛeˈ -bho ɔɔ sa ˈbɔn ɔ ˈye dhɛ ˈcɩan anˈ, -ˈyɩ jhibho-. (-Ŋmʋn -da ɲʋn ˈcrea “ka -a ˈyea ˈmʋnfeesɛɛ -bɔyaˈˈ sea ˈˈtian ˈbhle! -to sʋn nʋn ˈbho ɲankɔn -zɔn ˈˈkpe ɛ.”) -Bho aʋ gwɛ ˈmʋnfeesɛɛ ˈdhii ˈcɩaan ˈˈdhe dhɛcɩain ɔn sa ˈbɔn ɔ ˈye dhɛ ˈcɩan ɲan kpa aˈ, -ˈmɛn ˈbhɛɛ -ˈyeɔ livrʋ ˈˈɲɩn ˈˈdhe aʋ ˈye ɛɛˈ cɩaandhɛ ɛˈ 4 -nɛn ˈcɩan. -Bho -nɩn ɲɔn ɔn sa dhɛ ˈcɩan ˈdhe Dhɛ Biiblʋ a tɔɔn ɲʋn -aeˈˈ Restez dans lˈamour de Dieu ˈdhi ɛˈ, -ˈmɛn aʋ ˈkpa ˈe -Bɔyaˈˈ sea ˈˈtianˈ ˈbhle! ɛˈ livrʋ ˈdhi ˈˈdhe -da aʋ ˈyea -dee ɛ, -ˈyeɛ ˈo -za.

-ˈJHE VIDEO NƆN IN, -A ˈSƐ -MANˈ BIIBLƲ ˈCƖAN- ˈMƲN JHIAˈ, -ˈMƐN -ZA ˈE IDEEDƖ NƖAN DA ˈZƆN DA:

• Dhɛwɛ- dhɛcɩaʋn an mun ˈcɩan ˈdhe livrʋ -dhee -ˈnʋn ˈdhi -ɛ?

• Ɲʋn -nɩn -a -deea dhɛ ˈcɩan an, dhɛɛdɩ- -a ˈyʋbʋ video nɔn ˈˈɩ -to -ɛ?

• Dhɩwɛ- -ˈye dhɛcɩain ˈkpɩ po -mɩɩnˈˈ mɩɩnˈˈ ɔ ˈye nʋanˈ i ˈbɔn -ɔn? “-Ŋmʋn ˈo ˈˈtɛʋn- -da ɲʋn ˈcrea dhɩ ɔ ˈyea ˈcɩan -e dhɩ ɔ ˈyea nʋn ˈdhi.”