Adan -e Ɛvʋ ˈghwlʋa ˈe ˈˈjhriinmɔn -deɩn- Edenɩn ˈdhi ɛ, ʋʋ ˈghwlʋɛ ˈˈɲnuun- -duuˈˈ. Ʋbʋ aˈ ɲankɔn- -jhu, Kaɛn, ɔɔ nʋɛn ˈkwla ˈdhi -dhbho ˈˈdhe ɔɔˈ ˈˈdhe tbha ˈo ɔ ˈdhe Abɛlɩ, -mɔn -nɩɛn ˈbhlaedheidei-.

-Zɔn dhueˈ ˈsʋ ɛ, Kaɛn -e Abɛlɩ ˈˈɲɩɛn Zoova -baanˈ-. Jhibho- dhɛ ɲʋn an ˈdhaa -baanˈ- ˈmɛn? Ɛ nɩn dhɛ ɲʋn an ˈˈɲɩanˈˈ Ɲɔnsoa -wɛeˈ ɲʋn ˈyeɔ ˈsɛ po ɛ. -Baanˈ- Abɛlɩ ˈˈɲɩanˈˈ Zoova a, ɔ nʋɔn ˈtʋn. ˈKlaa Kaɛn ɛnˈ nɔn ˈseɔ ˈtʋn nʋn ɛɛˈdɩ Kaɛn ˈkpa ˈcɛn ˈjɛɛn-. Zoova zelɔ -glʋˈ ɔ ˈnaan ˈcɛn ɔ ˈkpaa, ɛ ˈbhɛɛˈ ɛ ˈyeɔ ˈˈtun ɔ ˈye dhɛsaʋn- nʋn. ˈKlaa Kaɛn ˈse Zoova aˈ ghwlu -dheinˈˈ bho po.

ˈBho ɛɛˈ gɔˈˈ ɔ, Kaɛn -ghwluɛ ˈe Abɛlɩ bho ɔ ˈnaan: ‘Jhi -ˈye ˈʋn -jieˈˈ kpa ˈdhe ˈkwla ˈi.’ Ʋʋ nɩan ˈsɔɔn gbai ˈdhe ˈkwla ˈi ˈsʋ ɛ, Kaɛn ˈdhbha ɔɔˈ ˈˈdhe ˈmɛn. Zoova ˈjhea ɛɛˈ dhɛ tu ɛ, kɔ nʋn -ɛn? Ɔ nʋɛn Kaɛn dhi ɔ ye ɔɔˈ ˈcɛ ɛˈ klɛɛ bho tɛɛn-. Kaɛn muan, ɔ ˈse ˈdhe ɔɔˈ ˈcɛ bho dhe jhi -dheeˈ ka.

Dhɛwɛ- -bo nɔn ɔn tɔɔn -abʋ -ɛ? -Ka -aa ˈbɔan -zɔn -dhee -ˈnɔɔn dhɩ ˈyea -nʋʋɛn- ɛn, ɩanˈ -nʋʋɛn- kaˈ. Ɛ ˈbhɛɛˈ ɛ ˈyeɛ nʋn -a ˈye ˈcɛn ˈkpa ˈjɛɛn-. -Bho -a ˈkpa ˈcɛn ɛnˈ, ɲɔn ˈbhɛɛˈ ɔ ˈye jhi ɔ ˈye -aʋ ˈtmʋʋn- -ka ˈcɛn ɲnian ˈˈjhrii ɛ. -Bho ɲɔn jhi -wɛeˈ ɔ ˈtmʋʋn -abʋ ɛɛˈ dhɛ tu ɛˈ, -a ˈye ˈˈdoo- -a ˈye ˈcɛn ˈghwla.

Abɛlɩ -kman Zoova aˈ dɩ ˈˈdhe dhɩ -ɩan- nʋɔn ˈtʋn ɛn ɩmɩn- ɔ nʋn. Ɛɛˈ dɩ Zoova se ˈbhɛɛ- ɔ ˈyeɔ bho ˈˈmae- -flɛ. Ɔɔ muɔn ˈkmʋn dhe -jha -wɛeˈ -bho ˈbhlʋa ˈkpa -bɔyaˈˈ -deɩn- ɛnˈ ɔ ˈye dɔɔ ˈˈkpe ˈˈti.

Ɛɛ ˈbhɔɔa ˈbho ɛ, ɲiɔʋ ˈˈjhi da ˈbhlʋa ˈˈkpe ˈmɛn. Ʋbʋ aˈ -daduuˈˈ -ɲniɛn- ˈdhi ŋwɔn. Dhbhoozii- -ˈnɩɩn ˈkpa ˈe ʋbʋ ˈˈklu -ke -ɩn -ɲnin ˈdhi ŋwɔn. Ɩn ˈghwlʋɛ ˈe jhaʋn ˈdhi ɩn ye da ˈbhlʋa ˈˈkpe jhi. Jhibho- dhɛɛdɩ- ɩn nʋɛn ˈmɛn? Ɩan ˈbɔn ɩn ˈye -glɔɲiɔn ˈkpa -wɛeˈ ɩn -nɩn ˈɲnʋnkpaeˈ ˈye ˈˈbhli ˈˈtii-.

Dhbhoozii- -ˈnɩn ɛn, ɩn -nɩn ˈɲnʋnkpaeˈ -ˈnʋn ˈghwlʋɛ ˈˈɲnuun-. ˈˈƝnuun- ʋbʋ ˈghwlʋ a, ʋʋ -tɛn jha ˈjɛɛn-, ʋʋ -kmanˈˈ ˈˈdhe ʋʋ -ɲniɛn- ˈdhi ŋwɔn. Ʋbʋ a nʋɛn ɲiɔʋ dhɩsain ˈˈdhrui. Zoova ˈse ˈbɔn ɛɛˈ dhɛ tu ˈye ˈo -gwle. Ɛmɛn- dɩ ɔ ˈnaan, ɔ ˈye ˈˈnin -klaaˈˈ -dhbhaa ɛ ˈye ɲʋn -saɩn in -za.

ˈKlaa ˈdhe ʋbʋ ˈˈklu ɛ, ɲɔn dhueˈ -nɩn ˈo -ɔ -nɩn ʋbʋ se gʋɔ-. -Ɔ -ˈnɔn ɔn, ɔ -kman Zoova aˈ dɩ. Ɔɔˈ ˈɲnɩn -nɩn Noe. Ɔ ˈbhleɛ ˈɲnɔn -e ˈˈɲnuun -ɲmai- taan, Sɛmʋn, Kamʋn -e Zafɛtɩ. Ɔɔˈ ˈˈɲnuun- -ɲmai- nɩan ˈtaan ˈbhleɛ ˈɲnʋnkpaeˈ -ke. Zoova -ghwluɛ ˈe Noe bho ɔ ˈnaan, ɔ kɔ bato -klaaˈˈ dhueˈ -wɛeˈ ɔmɔn -e ɔɔˈ ˈˈgbuzɔncɛ ˈye ˈpʋ -bho ˈˈnin -klaaˈˈ a sa dhbha aˈ. Bato ɔ kɔa, ɔ gwɛ kɛsu -klaaˈˈ -ʋan- ˈsa ˈˈnin ˈˈkpe. Zoova -ghwluɛ- ˈe Noe bho -ke ɔ ˈnaan ɔ -paa nmian ˈdhe bato ˈdhi -wɛeˈ ɩn ˈye ˈkmʋn -sie- -ke.

Noe -e ɔɔˈ ˈɲnɔn -e ˈˈɲnuun -dee bato ɔˈ kɔaˈ ˈmɛn. Ʋʋ kɔ bato -ˈnɔn ˈmɛn ˈdhe zɩn anˈ 50 ˈdhi -wɛeˈ ɔɔ ye ˈˈɩ -gwɛ. -Ka Zoova ˈnaan ʋʋ nʋɔn ɔn, ˈkamɔn- ʋʋ nʋɔn ˈjɛɛn-. ˈDhe ɛɛˈ nɔnˈˈ tu ˈdhi ɛ, Noe zela- ɲiɔʋ -ˈglʋ ˈmɛn -ka Ɲɔnsoa ˈyea ˈˈnin -klaaˈˈ -dhbhaa. ˈKlaa ɲɔn dhueˈ ka ˈseɔ -dheinˈˈ bho po.

Ɛ ˈyea ˈo ˈbhɔɔ- ɔ, nɔnˈˈ ʋʋ ˈyea ˈe bato ˈdhi pa ɲninˈ. Dhɛ -nʋʋan ˈbho ɛ ˈdhe ɛ, -bo -ɔɔ jhia a muɛn ɛnˈ dɩ ˈtmʋn-.