Ɲiɔʋ- -ˈˈmaan ˈpʋ

Noe -e ɔɔˈ ˈˈgbuzɔncɛ -e nmian pa ˈe bato ˈdhi ˈmɛn. Zoova kan bato ˈˈŋwɛn -wɛeˈ ˈˈnin -dee dhbhaaˈ. ˈˈNin dhbhaˈ -dhbhaa ˈsʋ bato ˈsa ˈˈnin ˈˈkpe. ˈˈNin dhbhaˈ da ˈbhlʋa aˈ klɛɛ ˈˈkpe. Ɲʋnsaɩn- anˈ klɛɛ ˈsea ˈe bato ˈdhi pa a, ʋʋ ˈmɛn ɛnˈ. Noe -e ɔɔˈ ˈˈgbuzɔncɛ nɩɛn ˈe bato ˈdhi. Dhɛ ˈsʋbʋ nʋn. -Naan tɔˈ i ke aˈ, dhɛ ʋʋ ˈjhea Zoova ŋwɔn ɔn, ɛ ˈbhleɛ ʋbʋ aˈ ˈmʋnan.

ˈˈNin dhbhaˈ -dhbhaa ˈdhe ˈghwɩ aˈ 40 ˈdhi -wɛeˈ ɛɛ ye dhbha dɩ ˈbhɔ-. ˈˈNin jhiɛ jha -mɩɩnˈˈ -mɩɩnˈˈ. ˈSʋ ɛ, bato -ɲnain ˈbho trʋ dhueˈ ˈˈdhru. ˈˈNin -duuˈˈ -nɩn da ˈbhlʋa ˈˈkpe ke -dhe ɛɛˈ dɩ Noe -e ɔɔˈ ˈˈgbuzɔncɛ ˈse ˈe bato ˈdhi ˈghwlʋ.

-Mɩɩnˈˈ -mɩɩnˈˈ ˈsʋ, ˈˈnin ɛnˈ klɛɛ -gwɛ da ˈbhlʋa ˈˈkpe ˈmɛn. Noe -e ɔɔˈ ˈˈgbuzɔncɛ nʋɛn -zʋn dhueˈ ˈdhe bato ˈdhi -wɛeˈ Zoova -ghwlu ˈdhe ʋbʋ bho ɔ ˈnaan: Aʋ ˈbhɛɛˈ aʋ ˈye zɔnˈ ˈˈsi. Dhɛ Zoova muan -wɛeˈ ɔɔ ˈpʋʋ ʋbʋ ɛ, ʋʋ poɔ ɛɛˈ ˈsɛ-. Ʋʋ ˈˈɲiɔn -baanˈ-.

-Baanˈ- -ˈnɔn nʋɛn Zoova ˈtʋn. -Wɛeˈ ɔ cɛn ghwlu ɔ ˈnaan ɔ ˈse ˈˈnin -klaaˈˈ -dhbhaa i -dheeˈ ka -wɛeˈ ɛ ˈye ɲiɔn i -za. Ghwlu ɔ ˈcɛan -ˈnʋn ɛn, -ka ɔ ˈseʋ bho ˈˈmae- dhi ɛ, ɛmɛn- dɩ ɔ nʋɛn ˈˈnin ɛn ˈdhbha bhliˈ ˈdhe jhaʋn ˈdhi. Ɛ nɩn ɛɛˈ -jɛn kɔan ɲan. -ˈJhe ˈˈnin ˈmɛn ɛ ye bhliˈ dhbhaˈ -kpɔ dhueˈ ˈdhe jhaʋn ˈdhi?

Zoova -ghwluɛ ˈe Noe -e ɔɔˈ ˈˈgbuzɔncɛ bho ɔ ˈnaan ʋʋ ˈghwlʋ ˈˈɲnuun -duuˈˈ ˈˈdhe ʋʋ ˈˈjhi da ˈbhlʋa ˈˈkpe.