ˈCƖAANDHƐ- 02
Biiblʋ a ˈˈɲɩɛn ɲʋn -pɛɛɩtbhadhɛ-
Ɲʋn anˈ -da -duuˈˈ a ˈjheɛ ˈkledɩ- -ɩan- nʋɛn ʋa ˈˈzru, ʋa ˈˈdu zɔnˈ ˈˈdhe ʋa sea. ˈKledɩ- -wɛ -ˈjhe ˈdhe -manˈ ˈkmʋn ˈdhi -ɩan- ˈˈzruu- mʋn -ɛn? Ɛgwɛ ˈdhee- kuzɔnˈ se i -flɔn -aeˈˈ -manˈ ɲɔn ɔnˈ dɩ ˈkpa. Ɛɛˈ dɩ -man dee -manˈ ˈˈjɛ i: ‘ˈKmʋn an mun taˈˈ ˈkpa ˈmɛn ˈdhe ɲan?’ -Ka Biiblʋ a nʋan ideedɩ- -ˈnɩn anˈ ˈdhe -za sʋn ɛn, ɛɛ ˈˈduɛ ɲʋn dɩ -ˈgwlɩi.
1. -Pɛɛɩtbhadhɛ- -wɛ Biiblʋ a ˈˈɲɩn -aʋ -ɛ?
Dhɛɛdɩ- ˈkledɩ ˈˈjhia ˈnɔn ˈkmʋn ɛn, ɛ se ɛɛˈ ˈsʋ ɛˈ dɩ Biiblʋ a ˈtmʋn -nɩn, ˈklaa ʋan ˈtmʋʋn -aʋ ˈmɛn -ke -ka ˈdhe nɔnˈˈ dhɛ ˈˈzaan ˈdhi ˈkledɩ- -ˈnɩn an muan i -gwɛ. -Bɔyaˈˈ -dɩ nɩan ˈe Biiblʋ ˈdhi ɛ, ɩn ˈbhɛɛˈ ɩn ˈye ʋn “ˈkmʋn ˈdhɔɛe -e -pɛɛɩtbhadhɛ ˈˈɲɩn.” (Zro Jérémie 29:11, 12.) -Bɔyaˈˈ -dɩ -ˈnɩn -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, ɩn ˈbhɛɛˈ ɩn ˈye -aʋ -bɔyaˈˈ sea ˈˈtianˈ ˈbhle ˈˈɲɩn.
2. Biiblʋ ˈnaan ka ˈkmʋn an mun -nɩn ˈdhe ɲan -an?
Biiblʋ ˈnaan nɔnˈˈ ɔn muɛn -ɲnin -wɛeˈ “ˈmɛan ˈse i -nɩn in -ˈdheeka, ˈkwɛ ˈse i -nɩn in, zrɛ -e ipʋʋa ˈse i -nɩn in.” (Zro Révélation 21:4.) Dhɩ -ɩan- ˈˈdua ɲʋn ˈkle ˈzɩan -ɩn nɩan sedhɛbhleɛ- -e dhɩ sea ˈˈɩ ˈsrɛ -e ˈghwɛ -e ˈmɛan, ɩn ˈse i -nɩn in -ˈdheeka. Dhɛ -ɛɛˈ ghwlu Ɲɔnsoa cɛan ˈdhe Biiblʋ ˈdhi ɛ, ɛmɛn- -nɩn -glɔɲiɔn ˈbhɛɛˈ ɔ ˈye ˈkmʋn sea ˈˈtianˈ ˈbhle ˈjhe ˈdhe -bɔyaˈˈ -deɩn ˈdhi da ˈbhlʋa ˈˈkpe.
3. -Ka dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi a muan ˈo -ɲnin ɛn, -ɛ ˈbhɛɛ -ɛ ˈye ʋn sʋn bho po -wɛeˈ -ˈyeɛ -gwlɩˈˈ de -ɛ?
Ɲʋn anˈ -da -duuˈˈ a ˈbɔn ʋʋ ˈye dhɩjɛɩn ˈjhe ˈdhe ʋaˈ ˈkmʋn ˈdhi, ˈklaa -bho ɩn ˈye ˈo ɲnin ˈjɛɛn- ɛnˈ, ʋʋ sɩ jhibho-. Dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, ɩanˈ dɩ se -kaˈ -nɩn. -Bho -a ˈye dɩ Biiblʋ a ˈtmʋan -gwlɩˈˈ de ɛˈ, “-a ˈye ˈcreedhɩ ˈcɩan -kajɔɔnka.” (Actes 17:11) Dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, -bho -ˈyɩ -gwlɩˈˈ de -aeˈˈ ˈsɩ -gwlɩˈˈ -de i ɛˈ, -manˈ Biiblʋ ˈcɩan- ˈyeɛ nʋn.
KPA DHƐ I ˈŊWƆƐN ƝAN
Dhɩ ˈyea -nʋʋɛn- ˈdhe ˈkmʋn anˈ ɲan -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, ˈbɔn ɩanˈ i ˈŋwɔan in. -Ŋmʋn -ka -pɛɛɩtbhadhɛ- Biiblʋ a ˈˈɲɩan -aʋ ˈbhɛɛa ɛ ˈyea -aʋ sʋn bho po ˈzɩan an.
4. Biiblʋ ˈnaan -a ˈbhɛɛ -a ˈye ˈkmʋn sea ˈˈtianˈ ˈbhle ˈjhe ˈdhe -bɔyaˈˈ -deɩn ˈdhi
Dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, ɩanˈ -ˈnɩɩn ka. -Jɩnwɛ -ɩan- nʋn ʋn ˈtʋn -ɛn? ˈˈDhe dhɛɛdɩ- ɩn -kɔndɩ ˈdhee- ˈˈjhri ˈdhe -ɛ?
Zro Biiblʋ aˈ ˈˈjhri -ɩan- ˈtmʋan dhɩ ˈyea -nʋʋɛn- ˈdhe ˈkmʋn an ɲan dɩ ˈdhii, -ˈmɛn -za ˈe ideedɩ- nɩn:
Biiblʋ aˈ ˈˈjhri nɩn an ˈˈɲɩn ʋn -pɛɛɩtbhadhɛ ˈmɛn? ˈBhoo- -gwlɩˈˈ ˈdhee, ɩn ˈbhɛɛˈ ɩn ˈye -manˈ ˈˈgbuzɔncɛ -e -manˈ dhaiˈˈ -ˈˈwe -pɛɛɩtbhadhɛ ˈˈɲɩn -ke?
-ˈJhe -manˈ ˈˈjɛ -ka -manˈ nɩan ˈe ˈkmʋn -dhee ˈdhi -da
ƝƆN DHUEˈ KA ˈSEA... |
ƝƲN ANˈ KLƐƐ Ɛ MUAN... |
|---|---|
|
|
|
|
|
|
|
|
|
|
5. Dhɩ -ɩanˈ ghwlu Biiblʋ cɛan, ɩn ˈbhɛɛˈ ɩn ˈye -manˈ ˈkmʋn ˈˈɩn zian-
Ɲʋn -duuˈˈ ˈmɛn ˈkpɩ i -aeˈˈ ˈcɛn -ɛn nʋbʋ ˈkledɩ- -gbaa i da ˈbhlʋa ˈkpe ˈzɩan anˈ dɩ. Dhɩ aˈ klɛɛ ɲʋn -ˈnʋʋn ˈbhɛɛa ʋʋ ˈyea nʋn -wɛeˈ dhɩ ˈyea ˈˈɩ zɩan an, ɩmɩn- ʋa nʋn. -Ŋmʋn -ka ˈdhɩ -ɩanˈ ghwlu Biiblʋ cɛan an nʋan ɲʋn sʋn bho -po sʋn ˈzɩan an. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
ˈDhe video nɔn ˈdhi ɛ, dhɛwɛ- se ˈˈɩ ˈsrɛ -ɛ kpʋn Rafika -glʋˈ -dhe -ɛ?
-Bho dhɩ -a kpʋn -glʋˈ se i -gwɛ mɔn -dhe ɛˈ, ka Biiblʋ nʋn sʋn bho -po sʋn -ɛn?
-Pɛɛɩtbhadhɛ- Biiblʋ a ˈˈɲɩan -aʋ ɛ, ɛ ˈbhɛɛˈ ɛ ˈye -aʋ sʋn bho po -a ˈye -aaˈ ˈkledɩ ˈˈdhru ˈjha ˈˈdhe -a ˈse ˈkpɩ i ˈmɛn in. Zro Proverbes 17:22 -e Romains 12:12, -ˈmɛn aʋ ˈtmʋn ideedɩ- nɩn anˈ dɩ:
ˈBhoo- -gwlɩˈˈ ˈdhee, dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi ɛ, ɩn ˈbhɛɛˈ ɩn ˈye -manˈ ˈkmʋn ˈˈɩn zɩan- ˈzɩan? Dhɛɛdɩ- -man ˈdha -kaˈ -a?
ƝƲN -ˈNƲƲN ˈNAAN: “Dhɩ Biiblʋ ˈtmʋan -ɩn ˈyea -nʋʋɛn- ˈdhe ˈkmʋn anˈ ɲan se ˈbhɛɛ- ɩn ˈye ˈo ɲnin.”
ˈBhoo- -gwlɩˈˈ ˈdhee, -ka dɩ Biiblʋ ˈtmʋan nɩan tɔˈdɩ ɛ, dhɛɛdɩ- -a ˈye ɛɛˈ i ˈŋwɔan i ˈbɔn-?
DHƐWƐ- ˈCƖAN-?
Dhɛ Biiblʋ ˈnaan -aa muan -bɔyaˈˈ ˈjhe- ˈdhe ˈkmʋn anˈ ɲan an, ɛɛ nʋɛnˈ -aa yea -pɛɛɩtbhadhɛ ˈbhle ˈˈdhe ɛɛ poɛ -aʋ sʋn bho -ke -aa yea -aaˈ ˈkledɩ ˈˈdhru ˈjha.
Dhɛwɛ- -ˈŋwɔn in -ɛn?
Dhɛɛdɩ- ɛ -kɔndɩ ɲʋn ˈye dhɩ -ɩanˈ ghwlu Ɲɔnsoa cɛan jhibho- -ɛ?
Dhɛwɛ- Biiblʋ ˈtmʋn -ɛ ˈye -nʋʋɛn- ˈdhe ˈkmʋn anˈ ɲan -an?
-Bho de dhɩ -ɩanˈ ghwlu Ɲɔnsoa cɛan -gwlɩˈˈ ɛˈ, -kawɛ ɩan mun ʋn sʋn bho -po -ɛ?
ˈBƆN DHƖ -ˈNƖƖN ANˈ I ˈŊWƆAN IN
-Ka -pɛɛɩtbhadhɛ ˈbhlea ˈˈɩkmansʋn ɛn, -ˈbhɛɛˈ -ˈyeɛ ˈcɩan.
Dhɩ -ɩanˈ ghwlu Ɲɔnsoa cɛan, ɩanˈ -gwlɩˈˈ -deɛ ˈbhɛɛˈ ɛ ˈye ɲɔn sea kuzɔinflɔn sʋn bho po.
“Vivre avec une maladie chronique: la Bible est-elle utile?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Bho mɔn -e -manˈ ˈˈgbuzɔncɛ ɛ sa mizikɩ aˈ video nɔn i ˈjhe ɛˈ, -ˈmɛn aʋ ˈjhe aʋaˈ ˈˈjɛ -ka aʋaˈ nɩan ˈe -bɔyaˈˈ -deɩn ˈdhi ɛ.
ˈˈJhu dhueˈ -ɔɔ vɔan dhɩ sea ˈˈɩ ˈsrɛ bho ɛ, -kawɛ dhɩ -ɩanˈ ghwlu Ɲɔnsoa cɛan ˈdhe Biiblʋ ˈdhi nʋn ɔnˈ ˈkmʋn ˈˈɩ zian- sʋn -ɛn?
“Je ne pense plus devoir changer le monde” (La Tour de Garde, 1er juillet 2013)