Dhɛwɛ- Biiblʋ ˈtmʋn ˈdhe ˈɲnʋnkpaoˈ -e ɲmau ɔˈ i ˈpeɛn- ɛnˈ dɩ ˈdhi -ɛ?

ˈƝnʋnkpaoˈ -e ɲmau ɔˈ i ˈpeɛn- ɛnˈ dɩ aˈ ˈtmʋan ˈbhleɛ ɲʋn -duuˈˈ aˈ dɩn. Biiblʋ a ˈtmʋn ɛnˈ dɩ ˈmɛn ˈklaa -bho ʋan sɛ nʋn ɛnˈ, ɛ nɩn ˈdhe dhɛŋwɔnjheɛ- ˈmʋn ˈˈdhe ʋanˈ -ziiɛ -jieˈˈ -ke. -Ka ɛɛˈ dɩ aˈ ˈtmʋan ˈyea -aʋ sʋn bho po ɛ ˈkamɔn- ʋan nʋn ɛnˈ dɩ ˈtmʋn sʋn. Dhɛ nɩan ˈo -mɛn -nɩn Zoova -mɔn nʋn -aʋ, ɔ jhibho- dhɛ nɩan -aaˈ dhɛjɛɛn ˈmɛn. -Ka -a ˈyea nʋn ˈˈdhe dhɩ -aa nʋan ˈyea ˈdhe ɔ ˈˈjhri ˈdhei -nmɔn -e dhɛ ˈyea -aʋ sʋn bho po ˈˈdhe -a ˈyea -bɔyaˈˈ sea ˈˈtianˈ ˈbhle ˈjhe ɛ, ɔɔ tɔɔɩn -aʋ ˈmɛn.

1. Ka Zoova a ˈjhe ˈɲnʋnkpaoˈ -e ɲmau ɔˈ i ˈpeɛn- -ɛn?

ˈƝnʋnkpaoˈ -e ɲmau ɔˈ i ˈpeɛn- -nɩɛn- Zoova aˈ -baanˈ-. Ɔɔ ˈbɔn ˈɲnʋnkpaoˈ -e ɲmau- ˈˈtiia ˈˈbhli ʋbʋ- ˈye i ˈpɛn ˈˈdhe -ʋʋ ˈyeɛ ˈmʋnan ˈdhi ˈjhee-. Ɛ se ˈˈɲnuun ˈghwlʋɛ ɛˈ ˈsʋ ɛɛˈ dɩ ʋa ˈpɛn in -nɩn, ʋa nʋɛnˈ -wɛeˈ ʋʋ ˈye bha aˈ dɩkman- -to. Ɛɛˈ dɩ Ɲɔnsoa aˈ Ghwlu ˈnaan: “-Manˈ ˈɲnɔn -ˈjhea ˈdhe -manˈ -goaˈˈ nɔnˈˈ ɔn, ʋn -nɩn nʋn ˈmʋnan.” (Proverbes 5:18, 19) Zoova a ˈbɔn ˈɲnɔn -e -kʋan ˈye ˈo bha ˈˈbun in kpʋn, ɛɛ muɛn -nʋn ʋʋ ˈse ˈe ˈɲnɩnzanˈ- ˈdhi ˈkpa i.​—Zro Hébreux 13:4.

2. ˈƝnʋnkpaoˈ -e ɲmau ɔˈ i ˈpeɛn- -wɛ -ɛɛˈ nʋn Ɲɔnsoa ˈtʋn -ɛn?

Biiblʋ ˈnaan “ɲʋn -an ˈjhea -jhaiˈˈ [...] ˈse ˈe Ɲɔnsoa aˈ ˈBheɔglɔ ˈdhi -pa i.” (1 Corinthiens 6:9, 10) Ghwlu nɩan ˈˈjhaijheɛ- ɛ, ˈdhe glɛkɩghwlu ˈdhi ɛ, ɛ pɔɔneia. Ghwlu -ˈnʋn ˈdha (1) i ˈpeɛn-a -ɛɛ nʋan ˈbho ˈɲnʋnkpaoˈ -e ɲmau- sea dhɛjeɛpo- ˈɲnɩn, (2) ˈɲnʋnkpaeˈ aˈ ˈsʋ aˈ i ˈpeɛn-, ɲmai- aˈ ˈsʋ aˈ i ˈpeɛn-, (3) ɲʋn -nɩn nmiin an ˈpean in. -Bho -a “-tɛɛn -jhaijheɛ bho” ɛˈ, -aa muɛn ˈdhe Zoova ˈˈjhriɛ ˈdhei -nmɔn ˈˈdhe -aa muɛn ˈbho dhɛjɛɛn ˈjhee-.​—1 Thessaloniciens 4:3.

KPA DHƐ I ˈŊWƆƐN ƝAN

3. Ple -jhaijheɛ- -e dhɩnʋnsʋn- -nɩn ɛn kpa -jie dhueˈ ˈˈjhibhaˈ

ˈƝnʋnkpaoˈ dhueˈ -ʋan- ˈbɔan ˈjɛɛn- -ʋn -nɩn Zozɛʋ ˈyea i ˈpɛn ɛn, ɔ plʋ ˈˈjhibhaˈ Zro Genèse 39:1-12, -ˈmɛn aʋ ˈtmʋn ideedɩ- nɩn anˈ dɩ:

• -Ɛ ˈˈtun Zozɛʋ ˈˈdhe ɔ ple -ɛ?​—-Ŋmʋn ˈdhe ˈˈjhri -mɩɩnˈˈ 9 ˈdhi.

• ˈBhoo- -gwlɩˈˈ ˈdhee, dhɛ Zozɛʋ za ˈo ɔ nʋan, ɛ ˈsrɛˈˈ ˈmɛn? Dhɛɛdɩ- -ɛ?

VIDEO: Ple ˈɲnɩnzanˈ- ˈˈjhibhaˈ (5:06)

Zoova a ˈbɔn -a ˈye -jhaijheɛ -e dhɩnʋnsʋn -nɩn ɛn kpa -jie- dhueˈ bho -tɛɛn. Zro 1 Corinthiens 6:18, -ˈmɛn aʋ ˈtmʋn ideedɩ- nɩn anˈ dɩ:

• Dhɩwɛ- ˈbhɛɛ -ɩn ˈye ɲɔn ˈtʋn ˈˈdhe ɔ ˈye ˈe ˈɲnɩnzanˈ- -nʋʋɛn ˈdhi ˈkpa -a?

• -Kawɛ -ˈbhɛɛ -ˈye nʋn ˈˈdhe -ˈye ˈɲnɩnzanˈ- -nʋʋɛn bho -tɛɛn?

4. -ˈBhɛɛ -ˈye -jhaijheɛ -e dhɩnʋnsʋn- -nɩn ɛn kpa -jie- dhueˈ ˈˈjhibhaˈ ple

VIDEO: Zro Biiblʋ ˈdhii ˈˈdhe -ˈye ˈɲnɩnzanˈ- -nʋɛn bho vɔn (3:02)

• -Aaˈ ˈdhoudhi -ɔɔˈ dɩ ˈtmʋan ˈdhe video nɔn ˈdhi ɛ, ɔ ˈjheɛ ˈˈkpei -ka ɔɔˈ tɔˈinaansʋn -e dhɩnʋnsʋn ˈbhɛɛa ɩn ˈyeɛ nʋn ɔ ˈyea ˈe ˈɲnɩnzanˈ- -nʋʋɛn ˈdhi ˈkpa a, dhɛwɛ- ɔ nʋn -ɛn?

Kletiɛn -ˈˈwe kpʋn ˈo Zoova ˈbun in ɛn, ʋa poɛ ˈe ˈkpɩ ˈmɛn -ke ʋʋ ˈye tɔˈinaansʋn- gwɛai ˈbhle. -Kawɛ -ˈbhɛɛ -ˈye nʋn ˈˈdhe -ˈye -jhaijheɛ -e dhɩnʋnsʋn- -nɩn ɛn kpa -jie- dhueˈ aˈ tɔˈ i -naan dɩ bho ˈbhɔ -ɔ? Zro Philippiens 4:8, -ˈmɛn aʋ ˈtmʋn ideedɩ- nɩn anˈ dɩ:

• Dhɩwɛ- -a ˈye tɔˈ ˈˈkpe i -naan?

• -Bho -a kpʋn ˈe Biiblʋ ˈdhiizroɛ- -e Ɲɔnsoa aˈ dhbho ɔˈ nʋanˈ ˈˈjhri ɛˈ, -kawɛ ɩn ˈbhɛɛ ɩn ˈye -aʋ sʋn bho po ˈˈdhe -a ˈse ˈe i ˈdɩndhɩ ˈdhi ˈkpa i -ɛ?

5. Zoova aˈ ˈtee a poɛ -aʋ sʋn bho

VIDEO: -Aaˈ nʋn dhɩ ˈdhe tɔˈ i zela- ˈmʋn (9:31)

• Ka ɲmau- -jhu ˈˈzaan- -ˈnɔn nʋn ɔnˈ ˈˈjɛ ˈbho ˈɲnɩnzanˈ- anˈ -jieˈˈ -po sʋn -ɛn?​—-Ŋmʋn ˈdhe Proverbes 7:8, 9 ˈdhi.

• -Bho -a -ŋmʋn dhɛ ˈtmʋan ˈdhe Proverbes 7:23, 26 ˈdhi jha aˈ, ˈɲnɩnzanˈ- -nʋʋɛn ˈbhɛɛˈ ɛ ˈye ɲɔn dɩ klaeˈˈ bho -jha. -ˈMɛn -bho -aaˈ kplɩn -gwɛi ɛˈ, ˈkledɩ- -wɛ -aa tɛɛn bho -ɛ?

• -Bho -aa sa dhɩ aˈ klɛɛ nɩan ˈɲnɩnzanˈ- -nʋʋɛn- ˈzɔn bho tɛɛn ɛnˈ, dhɛɛdɩ- ɛ ˈbhɛɛˈ ɛ ˈyeɛ nʋn -a ˈye ˈkmʋn sea ˈˈtianˈ ˈbhle aˈ trɔnˈ dhi -ɛ?

ˈBho ɲʋn -ˈnʋʋn -gwlɩˈˈ ɛ, dhɛ Biiblʋ ˈnaan ɲmai- -nɩn ɲmai a ˈpean in -aeˈˈ ˈɲnʋnkpaeˈ -nɩn ˈɲnʋnkpaeˈ a ˈpean in an nʋɛn dhɛsaʋn ɛn, ɛ nɩn ʋaˈ ˈmʋnɲɩɛn-. Ɛ se tɔˈdɩ -nɩn, dhɛ nɩan ˈo -mɛn -nɩn Zoova -nɩɛn- ɲʋndɩkman- anˈ Ɲɔnsoa ˈˈdhe ɔɔ ˈbɔn ɲʋn anˈ klɛɛ ˈye ˈkmʋn sea ˈˈtianˈ ˈbhle aˈ trɔnˈ dhi. -Bho -a ˈye ˈkmʋn -ˈnʋn ˈjhe ɛ, -a ˈye ɔɔˈ ˈsrɩn ŋwɔn ˈjhe. Zro 1 Corinthiens 6:9-11, -ˈmɛn aʋ ˈtmʋn ideedɩ- nɩn anˈ dɩ:

• Ɲmai- -e ɲmai aˈ i ˈpeɛn- -aeˈˈ ˈɲnʋnkpaeˈ -e ˈɲnʋnkpaeˈ aˈ i ˈpeɛn- ɛnˈ ˈsʋ -nɩn dhɛsaʋn ˈdhe Ɲɔnsoa ˈˈjhri ˈdhe?

-Bho -a ˈye ˈe Ɲɔnsoa ˈˈjhriɛ ˈdhei -nmɔn ɔnˈ, -aaˈ klɛɛ ˈye dhɩ -ˈnɩɩn ˈˈɩ zian- ˈdhe -aaˈ ˈkmʋn ˈdhi. Ɛɛˈ nʋanˈ -kɔndɩ? Zro Psaume 19:8, 11, -ˈmɛn aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhee, ˈsrɩn Zoova toa ˈo ˈdhe kplɩn ɲʋn ˈyea ˈbhle aˈ dɩ ˈdhi ɛ, ɩanˈ ɲwɔn ˈjheɛ kmanˈˈ? Dhɛɛdɩ- -man ˈdha kaˈ -a?

DHƐWƐ- ˈCƖAN-?

ˈƝnʋnkpaoˈ -e ɲmau poa dhɛ -jiɛˈ ɛˈ i ˈpeɛn -nɩɛn- Zoova aˈ -baanˈ- ʋʋ ˈye trɔnˈ ˈdhi ˈjhee-.

Dhɛwɛ- -ˈŋwɔn in -ɛn?

• Dhɛwɛ- Biiblʋ a ˈdhaa -jhaijheɛ -ɛ?

• Dhɛwɛ- ˈye -aʋ sʋn bho po ˈˈdhe -a ˈye -jhaijheɛ- -e dhɩnʋnsʋn- -nɩn ɛn kpa -jie- dhueˈ bho -tɛɛn?

• -Bho -aa sa Zoova aˈ ˈsrɩn ŋwɔn ˈjhe ɛˈ, ˈjɛɛn -wɛ -aaˈjhee ˈbho -ɛ?

ˈBƆN DHƖ -ˈNƖƖN ANˈ I ˈŊWƆAN IN

Dhɛɛdɩ- Ɲɔnsoa a ˈbɔan ɲmau- -e ˈɲnʋnkpaoˈ ˈyea dhɛ -jiɛˈ -po ke tɛnˈˈ -wɛeˈ ʋʋ ˈyea -da dhueˈ i -de ɛ, ɛmɛn- -aa mun ˈcɩan-.

“Vivre en couple sans être mariés: Qu’en dit la Bible?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

-Ka Biiblʋ a ˈjhea ɲmai -e ɲmai aˈ i ˈpeɛn- -aeˈˈ ˈɲnʋnkpaeˈ -e ˈɲnʋnkpaeˈ aˈ i ˈpeɛn- ɛn, dhɛɛdɩ- ɛ se ɲʋn -an nʋɛn ɛnˈ ˈmʋnɲɩɛn -nɩn -ɛn?

“L’homosexualité: est-ce mal?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

-Ka ˈtee Ɲɔnsoa toa ˈo ˈdhe ˈɲnʋnkpaoˈ -e ɲmau ɔˈ i ˈpeɛn- ɛnˈ dɩ ˈdhi nɩan -aaˈ ˈjɛɛn ɛnˈ dɩ ɛ, ɛmɛn- -man mun ˈcɩan-.

“Les relations buccogénitales sont-elles vraiment des relations sexuelles?” (Dɩ ˈghwlʋa ˈo ɛntɛɛnɛtɩ ˈˈkpe ɛ)

ˈDhe -bo -ɔ ˈˈdhru nɩan “Ils ont respecté ma dignité” ˈdhi ɛ, ˈˈjhu dhueˈ -nɩn ɲmai a ˈpean in ɛn, dhɛ poɔ sʋn bho -wɛeˈ ɔ zian- ɔɔˈ ˈkmʋn ˈˈɩn ˈˈdhe ɔ nmɔan ˈdhe Ɲɔnsoa ˈˈjhriɛ ˈdhei ɛ, ɛmɛn- -man mun ˈjhe-.

“La Bible transforme des vies” (La Tour de Garde, 1er avril 2011)