Nʋɛn ghwluiŋwɔɔɛn ˈye ˈe ɲɔnsoagbu ˈdhi -nɩn

-Bho -a -nɩn -aaˈ ˈdhoudhi ɲmai -e ˈdhoudhi -ɲnʋnkpaeˈ -nɩn -da dhueˈ ɛˈ, dɩ nɩan ˈo ˈbheɔ Davidɩ -gwlɩˈˈ -dhe ɛ, ɩmɩn -nɩn ˈbho -aʋ -gwlɩˈˈ -ke. Ɔ ˈnaan: “Aʋ -ŋmʋn -ka ɛ nmɔan ˈˈjhrii ˈˈdhe ɛ ˈbhlea ˈmʋnan -bho ˈdhoudhi -ˈˈwe -nɩn -da dhueˈ ˈˈdhe ʋa sa ghwlu ˈi ˈŋwɔɔn ɔnˈ!” (Psaume 133:1) -Aaˈ ghwluiŋwɔɔɛn- ˈse ˈo ˈˈjhai ˈdan. -Aaˈ klɛɛ poɛ ˈe ˈkpɩ -aa yea ɛɛˈ dɩ ˈˈdu.

1. Dhɛwɛ- ɲʋn an ˈjhe ˈˈkpe i ˈdhe Ɲɔnsoa aˈ ˈcɛ ˈˈklun -ɛn?

-Bho mun ˈˈdhruigbooɛ ˈmʋn ˈdhe ˈbhlʋa ˈsrʋ ˈdhi ɛˈ, -ˈbhɛɛ ˈse ghwlu ɲʋn an poa i ˈŋwɔn in, ˈklaa ˈse ˈdhebhai- -nɩn in ˈdhʋbʋ ˈˈklun. Dhɛɛdɩ- -ɛ? Dhɛ nɩan ˈo -mɛn -nɩn Biiblʋ nɩan dhueˈ -e ɲɔnsoasɛɩ nɩan dhueˈ -mɩn -aa klɛɛ ˈcɩan ˈdhii da ˈbhlʋa aˈ klɛɛ ˈˈkpe. ˈBho -ˈmɛn ˈdhe ɛ, -aa poɛ ˈe ˈkpɩ -aa yea bha aˈ dɩ kman. -Da -a ˈjhe -a -nɩn ɛnˈ, -aaˈ klɛɛ “ˈbhɛɛ Zoova aˈ ˈɲnɩn ˈˈɩn ˈˈdhe -aa gbɛɛɔ ˈˈjhibhaˈ ˈdhe ghwluiŋwɔɔɛn- ˈmʋn.”​—Sophonie 3:9, note.

2. Ka -ˈye ghwluiŋwɔɔɛn -ˈnɛn ɛnˈ dɩ ˈˈdu sʋn nʋn -ɛn?

“Aʋ -kman bha aˈ dɩ dhueˈ dhueˈ ˈdhe -pɛɛ ɛˈ klɛɛ ˈmʋn.” (1 Pierre 1:22) -Kawɛ -ˈbhɛɛ -ˈye ˈsrɩn -ˈnɩn ˈˈjhriɛ ˈˈdu -ɛ? -Manˈ ŋmʋn ɲʋn anˈ kplɩn saɩn- jha ˈdhe-, ˈbɔn ʋaˈ kplɩn ˈdhɔɛe i. ˈDhoudhi -ˈˈwe -ʋʋ -nɩn nɩan dhɛ dhueˈ ɛ, ɛ se ʋaˈ ˈsʋ -ˈye ˈˈdhaidhɛ ˈmʋn kpʋn -nɩn. ˈBɔn ɲʋn -nɩn sea -da dhueˈ ˈghwlʋ aˈ ˈˈdhaidhɛ i -ke. -A po ˈe ˈkpɩ -wɛeˈ dhɩsaɩn ɲʋn an ˈtmʋan ˈdhe ɲʋn -ˈnʋʋn anˈ dɩ ˈdhi ɛ, -a ˈyɩ ˈdhe -aaˈ -pɛɛ bho -za.​—Zro 1 Pierre 2:17.a

3. -Bho dɩ ˈkpa ˈbho -mɔn -e ˈdhoudhi ˈɲnɩn ɛnˈ, dhɛwɛ- -ˈye nʋn -ɛn?

-Aa ˈŋwɔɔɛn ghwlu ˈi, ˈklaa -a se ˈˈɩ gbaˈ. -Zɔn -dhee -ˈnɔɔn, -a ˈbhɛɛ -a ˈye dhɛ nʋn -ɛ ˈye -aaˈ ˈdhoudhi -glʋˈ kpʋn. Ɛɛˈ dɩ Ɲɔnsoa aˈ ghwlu a ˈtmʋʋn -abʋ ʋn ˈnaan, “-A kpa [...] bha aˈ dhɛsaʋn- ˈˈkpe ˈghwlʋɛ- ɲan dhueˈ dhueˈ,” ʋn de ˈo ʋn ˈnaan: “-Ka Zoova aˈ ˈˈjɛ ɛ ˈghwlʋa aʋaˈ dhɛsaʋn- ˈˈkpe ɛ, aʋ ˈye bha aˈ dhɛsaʋn- ˈˈkpe ˈghwlʋ.” (Zro Colossiens 3:13) -Aa nʋɛn dhɩ -duuˈˈ -ɩan- kpʋn Zoova -glʋˈ, ˈklaa ɔɔ ˈghwlʋɛ -aaˈ dhɛsaʋn ˈˈkpe. Ɔɔ ˈbɔn -ke -a ˈye -aaˈ ˈdhoudhi -ˈˈwe aˈ dhɩsaɩn- ˈˈkpe ˈghwlʋ. -Bho -a nʋn dhɛ -ɛ kpʋn ɲɔn -glʋˈ ɛˈ, -a mun ɔ -nɩn -a ˈye dɩ ˈˈkpei zela- ˈˈdhe ˈflɛ ˈye ˈo -a ˈɲnɩn ˈdhe jhi.​—Zro Matthieu 5:23, 24.b

KPA DHƐ I ˈŊWƆƐN ƝAN

4. Dhɩsaɩn -ˈŋwɔan ˈdhe ɲʋn -ˈnʋʋn anˈ dɩ ˈdhi ɛ, zɩ -pɛɛ bho

-Aa ˈbɔn -a ˈye -aaˈ ˈdhoudhi -ˈˈwe aˈ klɛɛ ɛˈ dɩkman-. Ɲɔn -nɩn -a sea dhɛ dhueˈ -nɩn ɛn, ɔɔˈ dɩkman- ˈbhɛɛˈ ɛ ˈye ˈkle -nɩn -zɔn -dhee -ˈnɔɔn ˈdhe -a bho. -ˈMɛn dhɛwɛ- ˈbhɛɛ -ɛ ˈye -aʋ sʋn bho po -ɛ? Zro Actes 10:34, 35, -ˈmɛn aʋ ˈtmʋn ideedɩ- nɩn anˈ dɩ:

• Zoova a ˈbɔn ɲʋn anˈ klɛɛ ˈyeɔ ˈˈɲɩn. -Kawɛ ɛɛˈ dhɛ tu ˈbhɛɛ ɛ ˈye ʋn sʋn bho po -wɛeˈ -ˈye ɲʋn -nɩn sea -da dhueˈ ˈghwlʋ aˈ ˈjhe sʋn ˈˈɩ zian-?

• Dhɩwɛ- se ˈˈjhriinmɔn- ɲʋn an ˈtmʋn ˈdhe ɲʋn -ˈnʋʋn anˈ dɩ ˈdhi ˈbho -manˈ kpɔ ˈdhi -ˈye ˈe ˈkpɩ po -ˈye bho -tɛɛn -ɛn?

Zro 2 Corinthiens 6:11-13, -ˈmɛn aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhee, dhɛwɛ- -ˈbhɛɛ -ˈye nʋn -wɛeˈ ˈdhoudhi -ˈˈwe -nɩn sea -da dhueˈ ˈghwlʋ -nɩn -ˈye jhbhɛɛ-?

5. -ˈGhwlʋ ɲʋn anˈ dhɛsaʋn- ˈˈkpe, ˈbɔn ˈflɛ i

-Bho Zoova aˈ nʋn -aʋ dhɛsaʋn ˈˈdhrui -mɔnˈ -dhe ɛˈ, ɔɔ ˈghwlʋɛ -aaˈ dhɩsaɩn- ˈˈkpe. Zro Psaume 86:5, -ˈmɛn aʋ ˈtmʋn ideedɩ- nɩn anˈ dɩ:

• Dhɛwɛ- -ˈŋwɔn in ˈdhe Zoova aˈ ɲʋn anˈ dhɛsaʋn ˈˈkpe ˈghwlʋɛ- ɛˈ dɩ ˈdhi -ɛ?

• Dhɛ Zoova a ˈghwlʋa ɲʋn anˈ dhɛsaʋn ˈˈkpe ɛ, dhɛɛdɩ- ɛ ˈbhle -manˈ ˈmʋnan -an?

• ˈDhe dɩwɛ- ˈdhi ghwluiŋwɔɔɛn- ˈbhɛɛ ɛ ˈye ˈkle -nɩn ˈbho -mɔn -e ɲʋn -ˈnʋʋn ˈɲnɩn -ɛn?

-Kawɛ -ˈbhɛɛ -ˈye Zoova -sraan ˈˈdhe -nɩn -manˈ ˈdhoudhi -ˈˈwe ˈye ghwlu ˈi ˈŋwɔɔn- jheejhee -ɛ? Zro Proverbes 19:11, -ˈmɛn aʋ ˈtmʋn ideedɩ- nɩn anˈ dɩ:

• -Bho ɲɔn nʋn ʋn dhɛ ˈˈdhrui -ɛ po ʋn ˈcɛn -aeˈˈ -ɛ kpʋn ʋn -glʋˈ ɛˈ, -kawɛ -ˈye nʋn -wɛeˈ ɛ ˈse ˈjɛaˈ ˈˈbhlo -za i -ɛ?

-Zɔn -ˈnɔɔn -aa nʋɛn dhɩ -ɩan- kpʋn ɲʋn -ˈnʋʋn -glʋˈ. -Bho ɛ -nɩn kaˈ a, dhɛwɛ- -a ˈye nʋn -ɛn? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: ˈFlɛ i ˈbɔɛn ɛn nʋɛn ɲʋn ˈjɛɛn ˈˈdhrui (6:01)

• -Kawɛ ˈdhoudhi -ɲnʋnkpaoˈ -ˈnʋn nʋn ˈflɛ i ˈbɔn sʋn -ɛn?

6. -A de -aaˈ ˈdhoudhi ɲmai- -e ˈdhoudhi -ɲnʋnkpaeˈ aˈ kplɩn ˈjɛɩn ˈˈjhriɛ ˈˈkpe

-Bho -aa sa -aaˈ ˈdhoudhi -ˈˈwe i ˈkpaa aˈ, -aa ˈjheɛ ʋaˈ kplɩn ˈdhɔɛe -e ʋaˈ kplɩn -saɩn ˈˈkpe i. -Kawɛ -a ˈye nʋn ˈˈdhe -a ˈye ʋaˈ kplɩn ˈdhɔɛe aˈ ˈsʋ ˈˈjhriɛ ˈˈkpe ˈnɛɛn-? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: Aʋ po aʋaˈ ˈˈjhriinmɔɛn- ˈˈkpe! (5:10)

• Dhɛwɛ- ˈbhɛɛˈ -ɛ ˈye ʋn sʋn bho po ˈˈdhe -ˈye -manˈ ˈdhoudhi -ˈˈwe aˈ kplɩn ˈjɛɩn ˈˈjhriɛ ˈˈkpe de -ɛ?

-Aaˈ kplɩn ˈjɛɩn anˈ ˈsʋ Zoova a de ˈˈjhriɛ ˈˈkpe. Zro 2 Chroniques 16:9a, -ˈmɛn aʋ ˈtmʋn ideedɩ- nɩn anˈ dɩ:

• Dhɛ jhibhi -ka, Zoova a dea -aaˈ kplɩn ˈjɛɩn anˈ ˈsʋ ˈˈjhriɛ ˈˈkpe ɛ, kɛ -nɩn ˈbhoo- -gwlɩˈˈ -ɛ?

DHƐWƐ- ˈCƖAN-?

-Bho -man sa -manˈ ˈdhoudhi ɲmai -e ˈdhoudhi -ɲnʋnkpaeˈ aˈ dhɛsaʋn ˈˈkpe ˈghwlʋ ˈˈdhe -man sa ʋaˈ dɩ kman an, ɛɛ muɛn -nʋn ghwluiŋwɔɔɛn- ˈye ˈe ɲɔnsoagbu ˈdhi -nɩn.

Dhɛwɛ -ˈŋwɔn in -ɛn?

• Dhɩsaɩn -ˈŋwɔan ˈdhe ɲʋn -ˈnʋʋn anˈ dɩ ˈdhi ɛ, ka -ˈye ɩanˈ -pɛɛ bho -za sʋn nʋn -ɛn?

• -Bho dɩ -nɩn ˈo -mɔn -e ˈdhoudhi ˈɲnɩn ɛnˈ, dhɛwɛ- -ˈye nʋn -ɛn?

• Dhɛɛdɩ- -man ˈbɔn -ˈye Zoova -sraan ˈdhe ɲʋn anˈ dhɛsaʋn- ˈˈkpe ˈghwlʋɛ- ɛˈ dɩ ˈdhi -ɛ?

ˈBƆN DHƖ -ˈNƖƖN ANˈ I ˈŊWƆAN IN

ˈˈƖpoodɩ- Zezi -jhiia i -ɩn ˈbhɛɛa -ɩn ˈyea -aʋ sʋn bho po ˈˈdhe -a ˈsea ɲʋn -ˈnʋʋn anˈ ˈɲnɩn saɩn- ˈˈsi- ɛ.

Za tu -die- nɩan ˈe -manˈ ˈˈjɛ ˈˈjhri (6:56)

ˈBho -a -gwlɩˈˈ -bho -a se dhɛ nʋn -mɔnˈ -dhe ɛˈ, -a ˈye ˈgɩn cɛn?

“Les excuses contribuent à la paix” (La Tour de Garde, 1er novembre 2002)

Dhɛ poa ɲʋn -ˈnʋʋn sʋn bho ˈˈdhe ʋʋ ˈbhɔa ɲʋn in ˈcra dɩ ɛ, -ˈjhe video nɔn in -wɛeˈ -ˈyeɛ ˈŋwɔn.

-Aaˈ tbha ˈo dhɩ ˈˈjhri a ˈjhea ˈˈkpe i -dhe -aaˈ ˈjhe ɲʋn anˈ ˈpee -dhe (5:06)

-Bho dɩ -nɩn ˈo -mɔn -e ˈdhoudhi ˈɲnɩn ɛnˈ, -ŋmʋn dhɛ -ˈyea ˈˈdoo- -ˈyea nʋn -wɛeˈ ɩn ˈsea ɲɔnsoagbu aˈ ˈflɛ ˈkɔɔ- i ɛ.

“Règle les désaccords avec amour” (La Tour de Garde, mai 2016)