Evangelio Juankwe
15 “Ti abokän uvakrie metre aune ti Rün abokän uva nökaka. 2 Uvakide tibätä ngwä ñan nemen tä tikekä jökrä aune meden ngwäta nemen ye jökrä tä mutu tikekä mikakäre mrebe ne kwe ngwä rabadre bäri. 3 Tikwe kukwe niebare munye ye köböire munta mrebe. 4 Nemen jankunu keteitibe tibe aune ti rabai jankunu keteitibe munbe. Uvakide ngwä ñan raba nemen ja töbiti, ñakare aune tädre neketaninkä kräbätä, ye erere arato mun ñan täi jankunu keteitibe tibe ngwane, mun ñan raba kukwe kwin nuainne. 5 Ti abokän uvakrie aune mun abokän uvakide. Nire tä jankunu keteitibe tibe aune tita keteitibe ben ye ngwäta nemen krubäte, ñobätä ñan aune mun tädre mento tibätä ngwane, mun ngwä ñan raba nemen jire. 6 Nire ñaka nemen jankunu keteitibe tibe ye tikakata uvakide ye kwrere aune tä bä ngrötökä. Uvakide ye ükakröta, kitata ñukwäte aune tä nukwe. 7 Mun täi jankunu keteitibe tibe aune mun ti kukwei mikai täte jankunu ngwane, munkwe drekwa kärä, aune rabai munkwe. 8 Käre munkwe kukwe kwin nuaindre krubäte* aune mun ja tötikaka tikwe bämikadre munkwe ye tä ti Rün käikitekä. 9 Ti Rün tä ti tarere ye erere tita mun tarere. Nemen keteitibe tibe ne kwe tikwe mun taredre jankunu. 10 Ti Rünkwe kukwe biani nuaindre tita mike täte aune tä ti tarere jankunu ye erere, tikwe kukwe biani nuaindre ye munkwe mikai täte ngwane, tikwe mun taredi jankunu.
11 Käta juto tibätä ye erere kä rabadre juto munbätä aune kä rabadre juto täte munbätä, yekäre tita kukwe ne niere munye. 12 Tita kukwe ne bien nuaindre munye, ye abokän munkwe ja taredre kwärikwäri tita mun tarere ye erere. 13 Nire tä ja nire jakwe bien ja ketamuko kwe ütiäre, ni yebrä ni tarekä kri. 14 Tita dre nuainmana ye munta nuainne ngwane, mun ja ketamuko tikwe. 15 Ti ñan mun mikai tuin jai ni klabore erere mada, ñobätä ñan aune ni klabore ie bäkänkä tä dre nuainne ye ñan gare. Ti mun kädeke ja ketamuko, ñobätä ñan aune ti Rünkwe dre niebare juruabare tie ye jökrä tikwe tänbare munye. 16 Mun ñaka ti dianinkä, ñakare aune tikwe mun dianinkä, ne kwe mun rikadre aune munkwe kukwe kwin nuaindre jankunu,* aune kukwe kwin ye rabadre kärekäre. Ye köböire munkwe dre dre kärädre ti Rün ie ti käbiti ye biain kwe munye.
17 Tita kukwe ne nuainmana munye ne kwe munkwe ja taredre kwärikwäri. 18 Nitre kä nebätä brukwä rabai mun kräke ngwane, brukwä namanina käne ti kräke ye garera munye. 19 Mun tädre ja ngwen nitre kä nebätä erere akräke, nitre kä nebätä käkwe mun taredre, ñobätä ñan aune mun rabadre niaratre erere. Akwa mun ñan ja ngwen nitre kä nebätä erere, ñakare aune tikwe mun dianinkä nitre kä nebätä ngätäite, yebätä nitre kä nebätä brukwä mun kräke. 20 Ti kukwe nieba munye ne ngwen törö jai: ni klabore ye ñan tä bäri bäkänkä yebiti ta. Niaratre tä ja mike ti rüere ngwane, ja mikai mun rüere kwetre arato. Niaratre tä ti kukwei mike täte ngwane, mun kukwei mikai täte kwetre arato. 21 Niaratre kukwe ne jökrä nuaindi munbätä ti kä ngwanbätä jabätä, ñobätä ñan aune ni ti juanka ñan gare ietre. 22 Ti ñan jatadre aune ti ñan kukwe mikadre gare ietre ngwane, niaratre ñan ngite. Akwa nengwane kukwe ñaka ietre kukwe mikakäre jabiti ngite kwetre yebätä. 23 Nire brukwä ti kräke ye brukwä ti Rün kräke arato. 24 Kukwe ñan tuabare ni madakwe ñan nuainbare, ye tikwe ñan nuaindre niaratre okwäbiti akräke, niaratre ñan ngite. Akwa nengwane niaratre tä ti tuin aune brukwä ti kräke aune ti Rün kräke arato. 25 Akwa kukwe ne namani bare ne kwe kukweta tikani Lei kwetrebätä ne rabadre bare: ‘Kukwe ñan nämäne ietre akwa niaratre ja brukwä mikani ti kräke’. 26 Mun dimikaka kite ti Rünkri, ye abokän üai deme tä kukwe metre mike gare, aune kite ti Rünkri tikwe juain ye rükai ngwane, ye käkwe kukwe mikai gare ti diäre. 27 Mun rabadre kukwe mike gare ti diäre arato, ñobätä ñan aune ti jatani kukwe driere yete ja käne munta tibe”.