Evangelio Juankwe

12 Köbö ti Pascua känenkri Jesús nükani Betania, Lázaro nämäne nüne yekänti, Lázaro ye abokän Jesukwe ganinkröta nitre ngwakare ngätäite. 2 Aune yete dere mrö sribebare kräke, Marta nämäne mrö döräire aune nitre nämäne mröre Jesube ye ngätäite Lázaro nämäne siba. 3 Ye ngwane aceite nardo* rä mane ñan mritani, ütiä kabre krubäte, bäsi litro ötare ye Mariakwe diani aune kekani kwe Jesús ngotobiti. Biti bä rötaninkä kwe ja dokwä druenbiti aune aceite rä mane ye rä ngitiani gwita. 4 Akwa, Judas Iscariote ni ja tötikaka iti kwe abokän jababare kite ngise käkwe niebare: 5 “¿Ñobätä ñan aceite rä mane ye rürübäini 300 denario* aune ngwian ye bini nitre bobre ie?”. 6 Akwa metrere nitre bobre ye ñan nämäne ütiäte kräke, ñakare aune niara ye ni gokä. Caja ngwian kitara ye niara nämäne ngübarebiti aune ngwian kita nämäne yete ye niara nämäne goire. 7 Ye ngwane, Jesukwe niebare: “Ñan nika, niara tuenmetre kukwe nuainta käre ye nuainne, ñobätä ñan aune ti doboi mika köböra. 8 Ñobätä ñan aune nitre bobre ye tä käre munbe, akwa ti abokän ñan täi käre munbe”.

9 Ye ngwane, Jesús nämäne Betania ye namani gare nitre kwatí judío ye ie ngwane, nikanintre känti, akwa ñaka niara aibe känti, ñakare aune Lázaro känti arato. Lázaro ye meden abokän Jesukwe ganinkröta nitre ngwakare ngätäite. 10 Ye ngwane sacerdote ütiäte ütiäte käkwe kukwe ükaninte Lázaro murie ketakäre arato. 11 Ñobätä ñan aune niara köböire nitre judío kwatí nämäne niken yete aune nämäne nemen tödeke Jesubiti.

12 Jändrinaine nitre kwatí nikani fiestabätä ye ie Jesús nikanina mate Jerusalén namani gare. 13 Aisete krikide* diani kwetre, nikanintre ngäbiti aune namanintre ngrente: “¡Mike kwäre nunta ribere mäi! ¡Ni kite Jehová, Rei Israel käbiti ye kräke kukwe kwin raba bare!”. 14 Burro ngäbä kwani Jesús ie ngwane, Jesús nankwanibiti, tä tikani nete ye erere: 15 “Sion ngängän, ñan kä jürä ngwan jabätä. Mike ñärärä, rei mäkwe kite täkäni burro ngäbäbiti kwin”. 16 Kenanbe kukwe ye ñan nükani gare nitre ja tötikaka kwe ie, akwa Jesús mikani ütiäte ngwane, kukwe ye nämäne tikani niarabätä aune kukwe ye erere nuainbarebätä nükani törö ietre.

17 Ne madakäre, Lázaro nämäne kä mäkäte* Jesukwe käräbare kä mrebiti aune ganinkröta kwe nitre ngwakare ngätäite, ye nitre kwatí käkwe tuabare aune dre namani bare ye niaratre nikani mike gare. 18 Jesukwe kukwe ñan tuabare ye nuainbare kukwe juruabare nitre kwatí ie, yebätä arato nikanintre ngäbiti. 19 Yebätä nitre fariseo namani niere jai kwärikwäri: “Ngwarbekäre nita ja di ngwen, ¿ye ñan tuin munye? ¡Mike ñärärä, nitre jökrä nibi niken jiebiti!”.

20 Ye ngwane, nitre nikani Ngöbö mike täte fiestabätä ye ngätäite nitre griego ruäre nämäne. 21 Felipe abokän käi Betsaida Galilea, ye ken niaratre näntebare aune ribebare kwetre ie: “Däkien,* nun tönibi Jesús tuai”. 22 Felipe nikani niere Andrés ie, aune Andrés aune Felipe nikani niere Jesús ie.

23 Akwa, Jesukwe niebare ietre: “Hora te Ni Kä Nebätä Monsoi mikadre ütiäte ye käi nüra. 24 Erametre ti niere munye, trigo nura ñaka betadrekä timo aune riadrekä* ngwane, täi jankunu nura kwrere. Akwa tä nekä* ngwane, ngwä rabai ere krubäte. 25 Nire tä ja nire tarere yekwe riaite,* akwa kä nebätä nire brukwä ja nire kwe kräke yekwe ja nire mikai kwäre nünankäre kärekäre. 26 Nire tö sribidi ti kräke ye jata ti jiebiti aune medente ti tädi yete ni sribikä tikwe tädi siba. Aune nire tä sribire ti kräke, ye kräke ti Rünkwe kukwe kwin nuaindi. 27 Nengwane, ja ruin ulire krubäte tie, ¿se ti raba dre niere? Ti Rün, hora ñaka nuäre ti kräke nebätä ti mike kwäre. Akwa kukwe ne ara kräke ti jatani kä tibienbätä. 28 Ti Rün, ja kä mike ütiäte”. Ye ngwane, ni kukwei ngitiani kä kwinbätä käkwe niebare: “Tikwe käikitaninanka aune tikwe käikitaikä”.

29 Ye juruabare nitre kwatí nämäne yete ye ie aune unsuli ngö namani ye nitre ruäre namani niere. Aune mada abokän namani niere: “Ángel blitani ben”. 30 Ye ngwane, Jesukwe niebare: “Ni kukwei ngiti ne ñaka ti dimikakäre, ñakare aune mun dimikakäre. 31 Nengwane kukwe ükateta nitre kä tibienbätä ben. Nengwane gobranka kä nebätä kitadi küken. 32 Akwa ti kaikä kwin* ngwane, ti jatai ni kwatí bätäkä ngwarbe ngwena ja kokwäre”. 33 Metrere niara murie ketai ño ye mikani gare kwe kukwe yebiti. 34 Ye ngwane, nitre kwatí käkwe niebare ie: “Kristo nünandi kärekäre nieta Leibätä ye gare nunye. ¿Se ño Ni Kä Nebätä Monsoi kaikä kwin nieta mäkwe? ¿Ni Kä Nebätä Monsoi ye abokän nire?”. 35 Aisete Jesukwe niebare ietre: “Käträ täi chi mada mun ngätäite. Käträ tä munkwe ngwane, munkwe dikaka ne kwe kä iko ñaka mun ganaindre. Nireta dikekä kä ikote ye tä niken medenkwäre ñaka gare ie. 36 Käträ tä munkwe ngwane, munta tödeke kä träbiti ye munkwe bämika, ne kwe mun rabadre käträ monsoi”.

Jesús kukwe ye niebare ye bitikäre, nikani mento aune ja ükani kwe niaratrebätä. 37 Kukwe ñan tuabare keta kabre nuainbare kwe niaratre okwäbiti, akwa yebiti ta ñan namanintre tödeke niarabiti, 38 ne kwe kukwe niebare ni Ngöbö kukwei niekä Isaiakwe ne rabadre bare: “Jehová,* ¿nikwe kukwe mikani gare nebiti nireta tödeke? ¿Aune nire ie Jehová küde mikani tuare?”. 39 Akwa ñobätä niaratre ñaka namani tödeke ye Isaiakwe niebare arato: 40 “Kä mikani drüne kwe niaratre okwäte, brukwä mikani ribi kwe, ne kwe kä ñan jutuadre ietre, kukwe ñan rükadre gare ietre ja brukwäte, ñan rikadreta Ngöbö kokwäre aune tikwe mikadreta räre”. 41 Isaiakwe kukwe ye niebare ñobätä ñan aune nämäne mikani ütiäte tuani kwe aune blitabare kwe niarabätä. 42 Akwa yebiti ta, nitre ji ngwanka judío kwatí käkwe tödekabarebiti, akwa ñan nämäne nuainne nitre kwatí okwäbiti, ñobätä ñan aune nitre fariseo jürä nämäne bätätre, ne kwe ñaka diandrekä sinagogate. 43 Ñobätä ñan aune nitrekwe niaratre kadre ngäbiti ye nämäne bäri ütiäte kräketre, Ngöbökwe niaratre kadre ngäbiti ye kräke.

44 Akwa Jesukwe niebare ja kukwei kribiti: “Nire tä tödeke tibiti ye ñaka tä tödeke ti aibebiti, ñakare aune tä tödeke ni ti juanka yebiti arato. 45 Aune nire ie ti tuin ye tä ni ti juanka ye tuin arato. 46 Ti jatani kä tibienbätä käträ erere, ne kwe ni jökrä tä tödeke tibiti ye jire iti tädre jankunu kä ikote. 47 Ne madakäre, nire tä ti kukwe nuin akwa ñaka mike täte ye kräke ti ñan tä kukwe ükete, ñobätä ñan aune ti ñan jatani kukwe ükatekäre ni kä tibienbätä kräke, ñakare aune mikakäre kwäre. 48 Nire ñaka tä ti aune ti kukwei kain ngäbiti ye kräke kukwe ükatekä tärä. Tikwe kukwe niebare ye käkwe kukwe ükaite kräke kä krüte näire. 49 Ñobätä ñan aune ti ñan tä blite ja gäbäre, ñakare aune tikwe dre niedre aune dre driedre ye ti Rün ti juanka käkwe nuain mananbare tie. 50 Aune kukwe nuain mananta kwe ye tä niken ni ngwena ja nire kärekäre kokwäre ye gare tie. Aisete kukwe jökrä nieta tikwe, ye tita niere ti Rünkwe niebare tie ye erere”.