Evangelio Mateokwe

14 Kä ye ngwane, Herodes,* gobranka kä distrito* Galileabiti yei, dre nie nämäne Jesubätä ye juruabare. 2 Aune niebare kwe nitre sribikä ütiäte kwe ie: “Ye Juan Bautista* ara, niara ganinkröta nitre ngwakare ye ngätäite, ye medenbätä die tärä kukwe ñan tuabare nuainkäre”. 3 Herodekwe Juan kani ngite aune mäkäninte kwe cadenanbiti aune kitani ngite kwe, eteba kwe Filipo muko Herodías yebätä. 4 Ñobätä ñan aune Juan nämäne niere ie: “Lei tä niere erere, mä tädre ja mäkäninte meri yebe ye ñaka kwin”. 5 Herodes tö nämäne kämikabätä akwa nitre jürä nämänebätä, ñobätä ñan aune nitre nämäne Juan ye mike tuin jai ni Ngöbö kukwei niekä erere. 6 Akwa cumpleaño Herodekwe ye käi ngwan nämäne juto jabätä, yete Herodías ngängän käkwe bailabare nitre nübaibare ye ngwärekri aune ye namani tuin kwin krubäte Herodes ie. 7 Aisete niarakwe dre käräi Herodes ie ye erere biain kwe ie, käbämikani kwatibe kwe ie. 8 Meyekwe töi mikani ja dibiti kukwe ribere aisete niebare kwe: “Juan Bautista ye dokwä ngwen tie blatote”. 9 Rei namani ulire, akwa kukwe käbämikani kwe aune nitre nübaibare ye nämäne töbätä kwe aisete bian mananbare kwe ie. 10 Juan dokwä tikaka mananbare kwe ngite käi yekänti. 11 Aune Juan dokwä jäntani blatote, aune biani monso bati merire yei aune niara nikani ngwena meye kwe ie. 12 Ye bitikäre nitre ja tötikaka Juankwe jatani aune nikani Juan ngwaka ngwena aune doboi mikani kwetre. Biti nikani mike gare Jesús ie. 13 Kukwe nakaninkä ye namani gare Jesús ie ngwane, nankwani rute aune nikani mentokwäre kä kaibe te. Akwa Jesús nikani ye namani gare nitre kwatí ie ngwane, nitre jutate nikani gürere jateta ngäbiti.

14 Nankwani timo rute ngwane, nitre kwatí jutuabare ie aune namani tuin bobre krubäte ie, aisete nitre nämäne bren ye mikaninta räre kwe. 15 Akwa kä jatanina de ngwane, nitre ja tötikaka kwe nikani kokwäre aune niebare kwetre ie: “Nita mente aune kä kitera de. Nitre kwatí ne juenta ne kwe rikadre jutate aune jondron kökadre kwetre kwetadre jai”. 16 Akwa Jesukwe niebare ietre: “Niaratre rikadreta ye ribe ñaka, mrö bien kwetadre ietre”. 17 Niaratrekwe niebare ie: “Pan kwärike aune gwa krobu aibe tä nete”. 18 Niarakwe niebare ietre: “Ngwen tie”. 19 Aune Jesukwe täkä mananbare mikäbiti nitre kwatí yei. Biti pan kwärike aune gwa krobu ye diani kwe aune nikrabare kä kwinbätä kwe käkwe orasion nuainbare. Pan ötaninbätä kwe ye bitikäre biani kwe nitre ja tötikaka kwe ie, nitre ja tötikaka kwe ye käkwe mada döräibare nitre kwatí yebiti. 20 Ni jökrä käkwe mröbare aune namanintre trine. Ye bitikäre kutuä kwä jätäbiti kubu ye kwáti pan oto namaninte ye ükaninkrö. 21 Nitre brare 5 mil näre käkwe mröbare, akwa meritre aune monsotre ye ñan täinbare. 22 Ye bätäräbe bäsi niarakwe nitre ja tötikaka kwe ye mikani niken rute, ne kwe rikadre ñöte ta kä kwäräkri aune niara abokän käkwe ja mikaninte nitre kwatí ye juenta ja jiebiti.

23 Nitre kwatí ye juaninta kwe ye bitikäre, niara nikani ngutuäbiti orakäre, kä namani iko ngwane, niara nämäne kaibe yete. 24 Ye ngwane ru ye namanina mobe ñö tekwäre, ñan namani nuäre nitre ja tötikaka Jesukwe kräke ru ngwankäre jankunu ja käne, ñobätä ñan aune ñö namani nikwitekä aune murie namani mate ribi ngäbiti yebätä. 25 Akwa kä ngwen dekä ngwane,* Jesús nikani niaratre kokwäre dikekä ñöbiti. 26 Jutuabare dikekä ñöbiti nitre ja tötikaka kwe ie ngwane, niaratre nikaninkä* aune niebare kwetre: “¡Dre kite tuin ye!”. Aune namanintre ngrente kä jüräbe kwärä. 27 Akwa bengwairebe Jesukwe niebare ietre: “¡Ja ngwen dite! Ye ti ara. Mun ñan kä jürä ngwan jabätä”. 28 Pedrokwe niebare ie: “Däkien, mä ara ngwane, ti rikadre mä kokwäre ñöbiti ye niere tie”. 29 Niarakwe niebare ie: “Jakwe”. Ye ngwane Pedro rute nankwani timo aune nikani dikekä ñöbiti Jesús kokwäre. 30 Akwa okwä namani murie namani mate dite yebätä, aisete kä jürä namanibätä aune jatani niken ñöte nguse, yebätä ngratebare kwe: “¡Däkien, ti mike kwäre!”. 31 Bengwairebe Jesukwe kise ngökani ie, nakani ie, aune niebare kwe ie: “Mäta tödeke chi krubäte, ¿ñobätä mä ñan tö ngwini tie? 32 Niaratre nankwani rute ye bitikäre murie ñan namanina mate. 33 Aune nitre nämäne rute ye namani ngodokwäbiti Jesús mikakäre ütiäte jai aune niebare kwetre ie: “Mä abokän Ngöbö Monsoi, ye era bäkänä”. 34 Aune namani kä kwäräkri ngwane, namani kä Genesaret yekänti.

35 Jesús ye nükani gare nitre brare kä yekänti ie ngwane, kukwe ye mikani gare kwetre nitre kä yekänti ie aune nitre jatani nitre bren ye jökrä ngwena ie. 36 Aune niaratre tuadremetre kwe kise mike jerekäbe dän käbätä jai, ye namani ribere kisere ie aune nire nämäne kise ketekäbätä ye jökrä nämäne nementa räre.