Evangelio Juankwe

14 “Mun brukwä ñan raba ulire. Munta tödeke Ngöböbiti ye munkwe bämika aune munta tödeke tibiti ye munkwe bämika arato. 2 Kä tärä keta kabre nünankäre ti Rün juete. Ñan ye erere ngwane, tikwe niedre munye, ñobätä ñan aune ti näin kä ükatekäre mun kräke. 3 Ne madakäre, ti näin aune tikwe kä ükaite mun kräke ngwane, ti jataita mun tuin aune tikwe mun kai ngäbiti gwi ja ken, ne kwe ti tädre medente yekänti mun tädre siba. 4 Ti näin yekänti ji medenbiti mun rikadre ye gare munye”.

5 Tomás käkwe niebare ie: “Däkien, mä näin medente ñan gare nunye. ¿Se ji medenbiti nun rikadre raba nemen gare ño nunye?”.

6 Jesukwe niebare ie: “Ti abokän ji, kukwe metre aune ja nire. Ni jire iti raba nemen ti Rün känti, ti aibe köböire raba nemen. 7 Ti gare munye ngwane, ti Rün rabai gare munye arato. Nengwane gare munye aune mun tärä tuin”.

8 Felipekwe niebare ie: “Däkien, ni Rün kä kwinbiti mike tuare nunye, aune ye rabaira debe nun kräke”.

9 Jesukwe niebare ie: “Felipe, känära tita munbe, ¿aune ti jämi gare mäi? Nire tä ti tuin ye tä ti Rün tuin arato. ¿Se ño amare mäta niere tie, ‘ni Rün kä kwinbiti mike tuare nunye’? 10 Tita keteitibe ti Rünbe aune ti Rünta keteitibe tibe, ¿ye ñan era mä kräke? Ti töita ño ye ñan ai nieta tikwe munye, ñakare aune ti Rün, tä jankunu keteitibe tibe, abokän tä ja töi mike nemen bare.* 11 Tita keteitibe ti Rünbe aune ti Rünta keteitibe tibe tita niere munye, ye munkwe mika era jai. Mun ñan mike era jai ngwane, sribi nuainta tikwe yebiti munkwe tödeka. 12 Ti niere metre munye, nire käkwe tödekadre tibiti aune bämikadre kwe, ni ye käkwe sribi nuainta tikwe ye nuaindi arato. Aune sribi nuaindi bäri kwe, ñobätä ñan aune ti näin ti Rün kokwäre. 13 Ne madakäre, kukwe ñokwä munkwe käräi ti käbiti ye tikwe nuaindi, ne kwe ni Rün kä kwinbiti rabadre käikitaninkä Ngobo kwe köböire. 14 Munkwe dre käräi ti käbiti ngwane, tikwe nuaindi.

15 Ti tare munkwe ngwane, kukwe nuain mananta tikwe ye munkwe mikai täte. 16 Aune ti Rünkwe ni dimikaka* mada biandre munye, ne kwe tädre kärekäre munbe ye tikwe ribei kisere ie, aune biain kwe munye. 17 Aisete üai deme tä kukwe metre mike gare biain kwe munye, abokän ñan raba nemen ni kä nebätäkwe, ñobätä ñan aune ñan tuin ietre aune ñan gare ietre. Mun abokän ie gare, ñobätä ñan aune tä munbätä aune rabai munbe. 18 Ti ñaka mun tuainmetre kaibe.* Ti jataita munkänti. 19 Kä nebera braibe aune nitre kä tibienbätä ñaka ti tuai jankunu, akwa munkwe ti tuai, ñobätä ñan aune tita nüne aune munkwe nünandi. 20 Köbö ye näire, tita keteitibe ti Rünbe, munta keteitibe tibe aune tita keteitibe munbe rabai gare munye. 21 Kukwe nuain mananta tikwe ye nire tä kain ngäbiti aune tä mike täte, ni ye tä ti tarere. Aune nire tä ti tarere, ye ti Rün käkwe taredi, aune tikwe taredi aune tikwe ja mikai tuare metre ta ie”.

22 Judas, akwa ñan Iscariote, käkwe ngwantaribare ie: “Däkien, ¿dre nibi bare? ¿Ñobätä mäkwe ja mikai tuare metre ta nunye aune ñaka ni kä nebätä ie?”.

23 Jesukwe niebare ie: “Nire tä ti tarere, ye käkwe ti kukwei mikai täte. Aune ti Rün käkwe taredi, aune nun nibu jatai ni yekänti aune nunkwe nünain ben. 24 Nire ñaka ti tarere ye ñaka ti kukwei mike täte. Dre dre kukwe nuata munkwe ye ñan ti kukwei, ñakare aune ti Rün ti juanka ye kukwei.

25 Ti täbe munbe ngwane tita kukwe ne niere munye. 26 Akwa ti käbiti, ti Rünkwe üai deme juain ye käkwe mun dimikai, aune kukwe jökrä driei kwe munye aune tikwe dre niebare munye ye jökrä ngwain törö kwe munye. 27 Kä jäme ye ti mikete munye, ti kä jäme jakwe bien munye. Ti ñan tä bien munye ni kä nebätä tä bien ye erere. Munkwe ñan ja töibika aune kä jürä ngwan ja brukwäte. 28 ‘Ti näin aune ti jataita munkänti’ tikwe nini juruani munye. Ti tare munkwe ngwane, ti näin ti Rün känti ye käi rabai juto munbätä, ñobätä ñan aune ti Rün ye bäri kri ti kräke. 29 Kukwe ne rabadre bare känenkri tita niere munye, ne kwe rabadre bare ngwane, munkwe mikadre era jai. 30 Ti ñan blitai krubäte mada munbe, ñobätä ñan aune gobranka kä nebätä kite, akwa niara die ñaka jire tibiti. 31 Akwa ti Rünkwe kukwe nuain mananbare tie ye erere tita nuainne, ne kwe tita ti Rün tarere rabadre gare nitre kä tibienbätä ie. Nüke krö, ani kämikekä nete”.