Evangelio Lucakwe
3 Tiberio César nämäne gobrane kä 15 te ye näire, Poncio Pilato nämäne gobrane Judea, Herodes* nämäne gobrane distrito* Galilea, aune eteba kwe Filipo nämäne gobrane kä nemenkä Iturea aune Traconítide, Lisanias nämäne gobrane distrito Abilene, 2 aune sacerdote ütiäte Anás aune Caifás näire, Juan, Zacarías ngobo, yei Ngöbökwe kukwe mikani gare kä ngwarbe nötare yekänti.
3 Yebätä ngite kitadre ta nitrebiti yekäre rabadre ja ngökö ñöte, ja töi kwitani kwetre ye bämikakäre, ye Juan nikani driere kä jökrä Jordán yekäntita. 4 Ni Ngöbö kukwei niekä Isaías täräibätä kukweta tikani ye erere namani bare: “Ni iti ngwänänkwe ruin kä ngwarbe nötare känti: ‘¡Ji mikanintubu Jehovakwe* ye mike juto! Ji ükete metre niara kräke. 5 Kä jökrä ngurune ye mikadre kiare, aune ngutuä bätä ngudre ye mikadre kiare, ji tolene ye mikadre metre aune ji käme ye mikadre kiare. 6 Ño Ngöbökwe ni mikai kwäre ye nitre jökrä käkwe tuadi’”.
7 Aisete nitre kwatí namani kite Juan känti ja ngökakäre ñöte, ye ie Juan nikani niere: “Ichaoto* ngäbäli, ¿Ngöbökwe kukwe ükaite yebätä nire gitiamanani munye? 8 Käne munkwe ja töi kwitani ye munkwe bämika kukwe nuainta* munkwe yebiti. Mun ñan rika kukwe ne niere kukwe mikakäre jabiti: ‘Nun abokän Abrahán mräkä’. Ñobätä ñan aune tita niere munye, jä oto nokokri Ngöbö raba Abrahán mräkä denkä. 9 Ne madakäre, ü nibira juto kri ngätri ken, aisete kri meden ngwä ñan nemen kwin ye tikaikä aune kitai ñukwäte”.
10 Aune nitre kwatí namani ngwentari ie: “Aune, ¿nun rabadre dre nuainne?”. 11 Juan namani niere ietre: “Nirekwe dänta ötöbu, ye rabadre bien ötöiti nirekwe dän ñakare yei. Aune nirekwe mrö tärä, rabadre ye erere nuainne arato”. 12 Nitre impuesto ütiä käräkä ye arato nükani ja ngökö ñöte aune ngwanintari kwetre ie: “Dirikä, ¿nun rabadre dre nuainne?”. 13 Niarakwe niebare ietre: “Munkwe ñan impuesto ütiä kärä ükaninte yebiti bäri”. 14 Nitre rükä nikani ngwentari ie arato: “¿Nun rabadre dre nuainne?”. Niara namani niere ietre: “Munkwe ñan ngwian dianka ja dibiti nitre kän, aune ñan nitre kitai ngise kukwe ngwarbebätä, ñakare aune ütiä bianta nuäi munye ye raba debe mun kräke”.
15 Nitre nämäne Kristo ngübare ngäbiti aisete Juan ye Kristo ara ya, ye nitre jökrä namani ngwentari jai. 16 Kukwe ye mikakäre gare metre ta Juankwe niebare nitre jökrä ie: “Ti abokän tä mun ngökö ñöte, akwa ni kite ye bäri dite tikrä aune ti ñan raba jire correa sandaliabätä metete ie. Niarakwe mun bautizai üai demebiti aune ñukwäbiti. 17 Jondron juananka* ye tä kisete, kä känti* jondron ngokwä munuanta ye mikakäre mrebe täte, trigo ngokwä ükakrökäre aune mikakäre gwi. Akwa krä* ye abokän kukwai kwe ñukwä ñan nötöte yebiti”.
18 Arato kukwe keta kabre mada niebare kwe nitre ie mäträkärebätä aune nikani kukwe kwin driere jankunu ietre. 19 Akwa Herodes gobranka distrito Galilea, ye ie Juan nämäne ñäke ñobätä ñan aune ja mäkäninte kwe Herodías, eteba kwe muko yebe aune kukwe jökrä käme nuainbare kwe yebätä. 20 Aune kukwe blo mada nuainbare kwe, Juan kitani ngite kwe.
21 Ne madakäre, nitre ngökani ñöte jökrä ye bitikäre, Jesús ngökani ñöte arato. Nämäne orare ngwane, kä kwin ngetrani 22 aune üai deme jutuabare* kite bititubu ütü kwrere, aune kä kwinbätä ni kukwei ngitianinkä käkwe niebare: “Mä ti Ngobo tare tikwe. Tita mä kain ngäbiti”.
23 Kä nämäne 30 Jesubiti ngwane, jatani Ngöbö kukwei driere. Nie nämäne nitrekwe, niara ye abokän,
José ngobo,
Helí ngobo,
24 Matat ngobo,
Leví ngobo,
Melquí ngobo,
Janaí ngobo,
José ngobo,
25 Matatías ngobo,
Amós ngobo,
Nahúm ngobo,
Eslí ngobo,
Nagái ngobo,
26 Maat ngobo,
Matatías ngobo,
Semeín ngobo,
Josec ngobo,
Jodá ngobo,
27 Joanán ngobo,
Resá ngobo,
Zorobabel ngobo,
Sealtiel ngobo,
Nerí ngobo,
28 Melquí ngobo,
Adí ngobo,
Cosam ngobo,
Elmadam ngobo,
Er ngobo,
29 Jesús ngobo,
Eliezer ngobo,
Jorim ngobo,
Matat ngobo,
Leví ngobo,
30 Simeón ngobo,
Judas ngobo,
José ngobo,
Jonam ngobo,
Eliaquim ngobo,
31 Meleá ngobo,
Mená ngobo,
Matatá ngobo,
Natán ngobo,
David ngobo,
32 Jesé ngobo,
Obed ngobo,
Boaz ngobo,
Salmón ngobo,
Nahsón ngobo,
33 Aminadab ngobo,
Arní ngobo,
Hezrón ngobo,
Pérez ngobo,
Judá ngobo,
34 Jacob ngobo,
Isaac ngobo,
Abrahán ngobo,
Taré ngobo,
Nacor ngobo,
35 Serug ngobo,
Reú ngobo,
Péleg ngobo,
Éber ngobo,
Selá ngobo,
36 Cainán ngobo,
Arpaksad ngobo,
Sem ngobo,
Noé ngobo,
Lamec ngobo,
37 Matusalén ngobo,
Enoc ngobo,
Jared ngobo,
Mahalaleel ngobo,
Cainán ngobo,
38 Enós ngobo,
Set ngobo,
Adán ngobo,
Ngöbö monsoi.