Evangelio Juankwe
3 Nitre fariseo ye ngätäite ni nämäne iti abokän kädeka nämäne Nicodemo, niara abokän gobranka nitre judiokwe. 2 Niara nikani deu Jesús känti aune niebare kwe ie: “Dirikä,* mä dirikä juani Ngöbökwe ye gare nunye, ñobätä ñan aune Ngöbö ñaka ni iti ben ngwane, ñaka raba kukwe ñan tuabare nuainta mäkwe ye nuainne jire”. 3 Jesukwe niebare ie: “Ti niere erametre mäi, ni ñan därereta bobukäre* ngwane, ñan raba Gobran Ngöbökwe tuin”. 4 Nicodemokwe niebare ie: “¿Ni niena umbre ne raba därereta ño? Ñan raba nikenta meyebätä aune därereta bobukäre, ¿ñan ererea?”. 5 Jesukwe niebare ie: “Ti niere erametre mäi, ni ñaka ja bautizare ñöbiti aune üai deme ñan nemenbiti aune ñan därere ngwane, ñan raba niken Gobran Ngöbökwe yete. 6 Nire därebare ja ngätäre ye ja ngätäre, aune nire därebare Ngöbö diebiti ye Ngöbö monsoi. 7 ‘Mun däredreta bobukäre’ tita niere mäi ye käkwe ñan mä töi mikadre niä. 8 Murie tö gösöai medenkwäre ye erere tä ngösöi; ngö ruin munye, akwa kite medenkri aune niken medenkwäre ñan gare munye. Ye erere nemen bare ni jökrä därebare Ngöbö diebiti yebätä”.
9 Ye ngwane Nicodemo käkwe ngwanintari ie: “¿Ñokänti kukwe jökrä ye raba nemen bare?”. 10 Jesukwe niebare ie: “¿Mä dirikä Israelkwe aune kukwe ne ñan gare mäi? 11 Ti niere erametre mäi, dre gare nunye aune dre tuata nunkwe ye nunta mike gare, akwa dre mikata gare nunkwe ye mun ñan kain ngäbiti. 12 Jondron kä tibienbätäbätä tita blite munbe yebiti ta mun ñan mike era jai, ¿se ño jondron kä kwinbätäbätä tikwe blitadre munbe munkwe mikadre era jai? 13 Ni kä tibienbätä ñan tärä nemen jire iti kä kwinbiti, akwa Ni Kä Nebätä Monsoi ye aibe kä kwinbätä jatani kä tibienbätä. 14 Aune kä ngwarbe nötare känti Moisekwe icha* kaninkä kwin, ye erere Ni Kä Nebätä Monsoi rabadre kaninkä kwin, 15 ne kwe ni jökrä tödekadrebiti yekwe ja nire kärekäre rabadre.
16 Ñobätä ñan aune Ngöbökwe ni kä tibienbätä* tarebare krubäte yebätä Monso ngöräbe* kwe juani kwe, ne kwe ni jökrä käkwe tödekadrebiti ye ñaka gadrete, ñakare aune ja nire kärekäre rabadre kwetre. 17 Ñobätä ñan aune Ngöbökwe ñaka Monso kwe juani kä tibienbätä kukwe ükatekäre ni kä tibienbätä ben, ñakare aune ni kä tibienbätä rabadre kwäre niara köböire. 18 Nire tä tödekebiti yebe ñan kukwe ükaite. Nire ñaka tödekebiti yebe kukwe ükaninante, ñobätä ñan aune ñaka tödekabare Monso ngöräbe Ngöbökwe yebiti.* 19 Kukwe ne ererebätä kukwe ükaite, ye abokän käträ nükani kä tibienbätä aune nitrekwe käträ taredre näre kä iko tarebare kwetre, ñobätä ñan aune kukwe nuain nämäne kwetre ye käme. 20 Ñobätä ñan aune nire tä kukwe käme nuainne ye brukwä käträ kräke aune ñaka niken käträte ne kwe kukwe nuainta kwe ye ñaka gadre. 21 Akwa nire tä kukwe erametre nuainne ye tä niken käträte, ne kwe Ngöbö töita ño ye ererebätä tä kukwe nuainne jutuadre mrebe yekäre”.
22 Ye bitikäre, Jesús nikani nitre ja tötikaka kwe ben kä juta Judea känti, yete namani nitre ja tötikaka kwe ben köbö kabre te aune nämäne nitre ngökö ñöte. 23 Akwa Juan nämäne ni ngökö ñöte arato kä Enón, Salim ken, ñobätä ñan aune ñö nämäne ere yete. Nitre nämäne kite aune ja ngökö ñöte. 24 Ye ngwane Juan kita jämi ngite.
25 Ye ngwane nitre ja tötikaka Juankwe nämäne ja kwete ni judío iti ben ja mikadre mrebe yebätä. 26 Ye bitikäre nikanintre aune niebare kwetre Juan ie: “Dirikä,* mike ñärärä, ni iti nämä mäbe Jordán kwäräkri abokänbätä mäkwe kukwe mikani gare, ye tä ni ngökö ñöte aune nitre jökrä nibi niken ben”. 27 Juankwe niebare ietre: “Ngöbö ñaka jondron bien ni iti ie ngwane, ñan raba nemen jire kwe. 28 ‘Ti abokän ñaka Kristo, ñakare aune ti juani niara käne’ tikwe nieba ye gare munye. 29 Ni brare ja mäkätekä ye abokän meri ja mäkätekä bäkänkä. Akwa ja ketamuko ni brare ja mäkätekä yekwe tä känime ni ja mäkätekä ken aune kukwe ruin ie ngwane, käita nemen juto krubätebätä. Aisete nengwane kä juto tä täte tibätä. 30 Nitre ja tötikaka jatadre bäri kwe, ti abokän kwe nitre ja tötikaka jatadre nekä”.
31 Ni kite kä kwinta yekri ye tä ni jökräbiti ta. Ni kä tibienbätä ye tä kä tibienbätä aune tä blite jondron kä tibienbätä yebätä. Ni kite kä kwinbätä yekri ye tä ni jökräbiti ta. 32 Aune dre tuabare kwe bätä dre kukwe nuabare kwe tä mike gare, akwa kukwe mikata gare kwe ye ni jire iti tä kain ngäbiti. 33 Kukwe mikata gare kwe ye nire tä kain ngäbiti yebiti tä mike gare* Ngöbö abokän kukwe metre niekä. 34 Ñobätä ñan aune nire juani Ngöbökwe ye tä Ngöbö kukwei niere, ñan ñobätä aune Ngöböta üai deme bien töi mantiamebiti.* 35 Ni Rün kä kwinbiti tä Monso kwe tarere aune jondron jökrä mikani kwe niara kisete. 36 Nire tä tödeke Ngöbö Monsoibiti yekwe ja nire kärekäre rabai, akwa nire ñaka käkwe Ngöbö Monsoi mikai täte yekwe ja nire ñaka rabai, ñakare aune Ngöbö täi rubun jankunu ben.