Evangelio Lucakwe

21 Ye ngwane, Jesús nikrabare aune nitre jondron bäkäne ye nämäne ngwian kwetre kite caja ngwian kitara yete jutuabare ie. 2 Ye ngwane meri bobre kän muko krütani tuani kwe ngwian mününe chi kubu* ütiäte ñakare kite cajate. 3 Aune niebare kwe: “Ti niere metre munye, meri kän muko krütani bobre, ne käkwe ngwian kiti bäri ere nitre jökrä mada ye kräke. 4 Ñobätä ñan aune nitre jökrä ye ie, dreta nemente ye tä bien, akwa niara abokän bobre käkwe dreta nünankrä ie ye jökrä bini kwe”.

5 Ye bitikäre, jä bängrabe bängrabe aune jondron biani Ngöböi yebiti templo nämäne dätebare bä nuäre, yebätä nitre ruäre nämäne blite ngwane, 6 niebare kwe: “Köbö rükai ngwane, jä jökrä tuin nete munye, ye jökrä dikainte aune jire kwati rabai ükaninte jabiti”. 7 Ye ngwane niaratrekwe ngwanintari ie: “Dirikä, ¿ñongwane metrere kukwe ye rabai bare aune kukwe ye köböra nemen bare ye dre käkwe bämikai?”. 8 Niarakwe niebare ietre: “Munkwe ja ngwan mokre. Ñan ja ngökamana, ñobätä ñan aune nitre kwatí jatai ti käbiti aune rabaitre niere, ‘Ye ti ara’ o ‘Kä kitani ye nibira känime’. Munkwe ñan niaratre kukwei mika era jai. 9 Ne madakäre, rü rabai nakainkä aune nitre rabai kä ngwen nokwre kädrie mun olote ngwane, mun ñan rekwetaka. Ñobätä ñan aune kukwe ye tä rakadrekä käne, akwa kä krüte ñan rükai bengwairebe”.

10 Ye ngwane niebare kwe ietre: “Nitre käkwe rüdi nitre mada rüere aune juta* käkwe rüdi juta mada rüere. 11 Dobo krikri rabai mate aune kä jene jene känti mrö nika aune bren tare keta kabre nika rabai. Aune jondron jürä ngwan bä jabätä tuai nitrekwe aune jondron ñan tuabare krikri rabai nakainkä kä kwinbätä.

12 Akwa kukwe ye jämi nakainkä känenkri, mun kai ngite aune ja mikai mun rüere. Mun jänäin sinagogate kukwe ükatekäre munbe aune mun kitai ngite. Aune ti kä ngwanbätä jabätä* mun jänäin reitre aune nitre gobranka ngwärekri. 13 Ye köböire munta tödeke tibiti munkwe mikai gare. 14 Ye medenbätä, munkwe ja töi mika kwatibe* ñaka töbike käne dre niei munkwe ja kräke yebätä, 15 ñobätä ñan aune tikwe mun mikai töbätä aune munkwe dre niedre yebätä tikwe mun dimikai, ye köböire mun rüe jökrä gwairebe ie kukwe ñan kwain jire niekäre mun rüere. 16 Ne madakäre, mun rün, mun meye, mun etebatre, mun ngwaitre, mun mräkä aune ja ketamuko munkwe käkwe mun kitai ngise. Aune mun ruäre murie ketai. 17 Aune ti kä ngwanbätä jabätä, nitre jökrä brukwä rabadi mun kräke. 18 Akwa yebiti ta mun dokwä druen ñaka riaite jire krati. 19 Munkwe kä ngwain nüke jai yebiti munkwe ja nire jakwe mikai kwäre.

20 Ne madakäre, nitre rükä kwatí jutua nünentubu Jerusalén bäre munye ngwane, juta ye gadrete käi nibira ja ken ye rabadre gare munye. 21 Ye ngwane nire täi Judea, ye gitia ngutuä kokwäre, nire täi Jerusalén yete ye rika mento aune nire täi juta ye bäre ñan rika juta yete. 22 Ñobätä ñan aune kukwe ükaite kä ye näire, ne kwe kukwe jökrä tä tikani ye rabadre bare. 23 ¡Meritre täi murore o täi monsotre mike kianbätä kä ye ngwane, ye bobre jakän! Ñobätä ñan aune ja tare nikai kri kä nekänti aune juta ye mikai ja ngie nuin. 24 Aune nitre murie ketai espada* tu grinebiti aune jänäin ngite juta keta kabre känti. Aune juta keta kabre* rätäi Jerusalenbiti nememe kä kitani juta keta kabre* kräke ye krütadre ngwane.

25 Arato kukwe ñan tuabare rabai bare ñänä, sö aune muke yete. Aune kä tibienbätä abokän juta keta kabre känti ja tare nikai krubäte, mren rabai rubun aune ngö rabai krubäre yebätä dre nuaindre kwetre ñan rabai gare ietre. 26 Jondron rabai nakainkä kä tibienbätä ye köböite kä jürä rabai nitrebätä aune rabai ja töibikaire krubäte yebätä kä rabai nötöte bititre, ñobätä ñan aune di kri kä kwinbätä ye ngrükaite. 27 Ye ngwane Ni Kä Nebätä Monsoi ye jutuai ietre kite mutabiti di kri yebiti aune bä nuäre kri. 28 Akwa kukwe ne jatai nakainkä ngwane, mun rüka krö aune dokwä gaka kwin, ñobätä ñan aune mun mikadre kwäre ye nebera känime”.

29 Ye bitikäre kukwe ne bämikani kwe ietre: “Higokrie aune kri mada ye jökrä mike ñärärä. 30 Mu tä nemen ngwane, tuin munye aune kä moren tärä nemen no ye tärä nemen gare munye. 31 Ye erere arato, kukwe ne jutua munye ngwane, Gobran Ngöbökwe nibira no ye rabadre gare munye. 32 Nitre kä ne näire jämi nekä jökrä ye känenkri, kukwe ye rabai bare jökrä ye ti mike gare metre munye. 33 Kä kwin aune kä tibien ye riaikä, akwa ti kukwei ye täi kärekäre.*

34 Akwa mun ja brukwä ngübabiti, ne kwe ñan mun tuadremetre kwe nemen nainte krubäte mröbätä ere, tomana ñabätä ere, aune ja töibikabätä ja nire jakwe aibe jiebiti, aune bátibe köbö ye ie mun rakadre jäme, 35 kö okwä erere. Ñobätä ñan aune köbö ye rükai nitre nünanka kä jökräbiti tibien yebiti. 36 Ye medenbätä, munkwe ja ngwan ngwäte aune kukwe jökrä tä rakadrekä yebätä mun rabadre kwäre, aune mun rabadre nünaninkä Ni Kä Nebätä Monsoi ngwärekri ye käre munkwe ribedre kisere”.

37 Aisete rare Jesús nämäne dirire templote, akwa deu nämäne kämikekä yete aune nämäne niken ja düke ngutuä kädekata ngutuä Olivos yekänti. 38 Aune dekä ngwarbe nitre jökrä nämäne niken templote niara kukwe nuakäre.