Evangelio Juankwe

10 “Ti niere metre munye, kä ketaninkä* oveja kräke ye jukweite ta nire ñaka niken, ñakare aune tä niken kibiti ta kä teri, ni ye abokän oveja goikä. 2 Akwa nire tä niken jukwete ta kä teri, ni ye abokän oveja ngübaka. 3 Ni ye ie kraka jukwebätä tä jukwe tike, aune niara kukwei ruin oveja ie. Ni oveja ngübaka tä oveja kwe kä ño ño ye ererebiti tä oveja kärere aune tä niken ngwena küken. 4 Tä oveja kwe ye den jökrä küken, biti tä niken oveja känenkri. Aune niara kukwei gare oveja ie yebätä tä niken jiebiti. 5 Oveja kwe ñaka niken jire ni menteni jiebiti, ñakare aune tä ngitiebätä, ñobätä ñan aune nitre menteni kukwei ñan gare ie”. 6 Jesukwe kukwe ne bämikani kukwe mikakäre gare ietre, akwa nin nükani gare ietre.

7 Aisete Jesukwe niebareta ietre: “Ti niere metre munye, ti abokän jukwe oveja kräke. 8 Ni jökrä ja bianka ti ara ye ni gokä, aune kukwei ñaka ruin oveja ie. 9 Ti abokän jukwe, nire näin te ta ye rabai kwäre. Raba niken ngwä aune nikenta küken, aune mikä kwain ie. 10 Ni gokä ye tä kite jerekäbe gokäre, ni murie ketakäre aune jondron juankäre ngwarbe. Ti abokän jatani ne kwe ja nire rabadre kärekäre munkwe. 11 Ti abokän ni oveja ngübaka bäri kwin, aune ni oveja ngübaka bäri kwin tä ja nire kwe bien oveja ütiäre. 12 Ni sribikä,* abokän ñaka oveja ngübaka aune bäkänkä yebätä, nukro rubun* tä kite tuin ie ngwane, tä oveja mikete kaibe aune ngitie. Ye ngwane nukro rubun ie oveja tä nakain aune tä juentari jene jene. 13 Ni sribikä ye tä ngitie, ñobätä ñan aune tä sribire ngwian aibe ganainkäre aune ñaka oveja töibikaire. 14 Ti abokän ni oveja ngübaka bäri kwin. Oveja tikwe gare tie aune ti gare oveja tikwe ie, 15 ti gare ti Rün ie aune ti Rün gare tie ye erere. Aune tita ja nire jakwe bien oveja ütiäre.

16 Aune oveja mada tärä tikwe, abokän ñaka tä ne ngätäite. Ye ti jatai ngwena arato, aune ti kukwe nuai kwe. Oveja ye rabai keteitibe aune ni oveja ngübaka itibe rabai kwe. 17 Tita ja nire jakwe bien yebätä ti Rün tä ti tarere, biti ja nire rabaita tikwe. 18 Ni jire iti tä ja nire denkä tikän, ñakare aune tita bien ja töi jeñebiti. Ja die biani tie ja nire jakwe biankäre aune rabadreta tikwe yekäre. Ti Rünkwe kukwe ye nuain mananbare tie”.

19 Jesukwe kukwe niebare yebätä nitre judío ie ja kukwei ñan namani nükebitita. 20 Niaratre kwatí namani niere: “Chokalitabätä, kä ngwarbe dokwäbiti. ¿Ñobätä munta niara kukwe nuin?”. 21 Mada abokän namani niere: “Ni itibätä chokalita ngwane, ñan raba kukwe ye erere niere. Ni iti okwäte kä drüne ye ie chokali ñan raba kä mike tuin, ¿ñan ererea?”.

22 Köbö ye näire Templo Mikaninta Mrebe Fiestai käi ngwan nämäne juto jabätä Jerusalén. Aune kä ñan moren kä ye näire, 23 aune templote Ji dikakakäre Salomonkwe, abokänbiti ju ganinkä, yekäntita Jesús nämäne dikekä. 24 Ye ngwane nitre judío ngätäni bäre ta aune namani niere ie: “¿Nemen ñongwane mäkwe nun töi mikai ngwarbe kwäräkwärä? Mä Kristo ngwane, niere metre ta”. 25 Jesukwe niebare ietre: “Tikwe niebarera, akwa ñan era mun kräke. Sribi keta kabre nuainta tikwe ti Rün käbiti ne tä kukwe mike gare tibätä. 26 Akwa mun ñan oveja tikwe yebätä mun ñan mike era jai. 27 Ti kukwei ruin oveja tikwe ie, oveja tikwe gare tie aune tä näin ti jiebiti. 28 Tikwe ja nire kärekäre biain ie, ñaka gaite jire aune ni jire iti käkwe diainkä ti kisete. 29 Ti Rünkwe oveja mikani ti kisete ye bäri ütiäte jondron jökrä yebiti ta, aune oveja tä ti Rün kisete ye ni jire iti raba denkä kän. 30 Ti aune ti Rün nunta keteitibe”.

31 Mada bati, nitre judío käkwe jä diani kisete Jesús täkäkäre. 32 Ye ngwane Jesukwe niebare ietre: “Kukwe kwin keta kabre kite ti Rünkri tikwe nuainbarera mun okwäbiti. ¿Kukwe ye meden köböite mun tönibi ti täkäi jäbiti?”. 33 Nitre judiokwe niebare ie: “Kukwe kwin nuainta mäkwe ye ñan aibätä nun bike mä täke jäbiti, ñakare aune kukwe blo krubäte* niebätä. Mä abokän ni kä tibienbätä, akwa mä ara tä ja mike ngöböre”. 34 Jesukwe niebare ietre: “¿Ñan tä tikani Lei munkwebätä ‘Tikwe nieba: “Mun ngöböre”’? 35 Ye ngwane, nitre rüere Ngöbö Kukwei nämäne kukwe mike gare ye Ngöbökwe kädekani ‘ngöbö’, aune Ngöbö Kukwei ye kwita ñan raba jire. 36 Ti abokän dianinkä ti Rünkwe aune ti juani kwe kä tibienbätä, akwa yebiti ta, jerekäbe ‘ti abokän Ngöbö Monsoi’ tita niere, ¿yebätä ‘ti kukwe blo krubäte niekä’ nieta munkwe? 37 Ti ñan tä sribi ti Rünkwe nuainne ngwane, mun ñan ti mika era jai. 38 Akwa tita sribi ye nuainne ngwane, tita dre niere ye mun ñan mika era jai, akwa sribi nuainta tikwe yebätä munkwe tödeka. Ye köböire ti Rünta keteitibe tibe aune tita keteitibe ti Rünbe ye rabai gare kärekäre munye”. 39 Mada bati, niaratre tö namani Jesús kai ngite, akwa ñan nakani ietre.

40 Kena Juan nämäne ni ngökö ñöte Jordán kwäräkri yekänti Jesús nikaninta, aune namani yete. 41 Nitre kwatí nikani känti aune namani niere: “Kukwe ñan tuabare ye Juan ñan nuainbare jire keteiti, akwa kukwe jökrä niebare kwe ni nebätä ye era bäkänä”. 42 Aune nitre kwatí yete käkwe tödekabare Jesubiti.