Evangelio Lucakwe

12 Kä ye ngwane, nitre kwatí krubäte ja ükaninkrö, aisete namani mate ja te kwärikwäri. Ye ngwane, niara nikani käne blite nitre ja tötikaka kwe ben: “Munkwe ja ngübabiti levadura nitre fariseokwe yebätä, ye abokän ja bämika jerekäbe. 2 Jondron jökrä tä ükani deme ye rabai kä mrebiti aune dre tä tiebe ye rabai gare. 3 Aisete, kukwe jökrä niedi munkwe kä ikote ye juruai käträ ngwenbiti, aune dre niedi kaibe jai munkwe ja olote cuartote ye driedi ju dokwäbiti kwin. 4 Ne madakäre, ti niere munye, ja ketamukotre tikwe: ni iti raba mä murie kete biti ñan raba kukwe mada nuainne ye ñan jürä ngwan jabätä. 5 Nirebrä jürä ngwandre jabätä ye ti mike gare munye. Nire tä ja nire denkä biti die tärä kitakäre Gehenante* yebrä munkwe jürä ngwan jabätä. Jän, munkwe ni ye jürä ngwan jabätä ti niere munye. 6 Nukwä kia kwärike rürübäinta ngwian kubu ütiä ñakarebätä,* ¿ñan ererea? Akwa Ngöbö ñaka nukwä kia ne käi kwitekä jire kwati jabiti. 7 Mun abokän dokwä druen kratire kratire tä jökrä täinbare. Ñan kä jürä ngwan jabätä. Mun bäri ütiäte nukwä kia kabre ye kräke.

8 Ti niere munye, ni iti ja mikai tikri nitre okwäbiti ngwane, Ni Kä Nebätä Monsoi arato käkwe ja mikai niarakri angeletre Ngöbökwe ngwärekri. 9 Akwa nire ñan tä ti kain ngäbiti nitre ngwärekri ye ñaka kai ngäbiti angeletre Ngöbökwe ngwärekri. 10 Aune nirekwe ñäkäi Ni Kä Nebätä Monsoi rüere yebiti ta ngite kitai, akwa nirekwe ñäkäi blo krubäte* üai deme rüere yebiti ta ñaka ngite kitai. 11 Mun jänrika gobrantre, nitre kukwe ükatekä aune nitre kwatí ngwärekri* ngwane, munkwe dre nuaindi aune dre niedi ja kräke yebätä munkwe ñan ja töibika. 12 Ñobätä ñan aune ye ngwane, munkwe dre niei ye üai deme käkwe driedi munye”.

13 Ye ngwane ni iti nitre kwatí ngätäite käkwe niebare ie: “Dirikä, jondron ti rünkwe ye ti etebakwe ñäkädrebiti jabiti tibe ye niere ie”. 14 Niarakwe niebare ie: “Ja mräkä, ¿nirekwe ti kädekani kukwe ükatekä o jondron mun rünkwe ye ñäkäbitikäre mun nibu kräke?”. 15 Ye ngwane niebare kwe ietre: “Munkwe okwä ngiante krikri, jondron ni madakwe tua töta nemen jakwe, yebätä munkwe ja ngübabiti, ñobätä ñan aune jondronta ere nikwe, akwa jondronta ere nikwe ye ñan ai raba ja nire bien nie”. 16 Yebiti kukwe ne bämikani kwe ietre: “Kä ni iti jondron bäkäne erekwe te jondron ngwä namani ere. 17 Yebätä nikani niere jai: ‘Jondron ngwä ükarakrö käi ñan nebe tie, ¿se tikwe ja nuaindi?’. 18 Aisete niebare kwe: ‘Ti bike ne nuainne: ju jondron ngwä ükarakrö tikwe ne ti bike dikente biti tikwe mada bäri kri sribei, aune yete jondron ngwä aune jondron mada jökrä tikwe ye tikwe ükaikrö. 19 Biti tikwe niei jai: “Jondron keta kabre kwin tä ükaninkrö mäkwe kä kwatí kräke, aisete ja düke, tomana ñain aune kä ngwen juto jabätä”’. 20 Akwa Ngöbökwe niebare ie: ‘Mä tö ñaka, matare deu mä krärä reketai. ¿Aune jondron ükaninkrö mäkwe se rabai nirei?’. 21 Ye kwrere tä nemen bare ni tä jondron ütiäte ükekrö ja kräke yebätä akwa Ngöbö okwäkänti abokän ñan jondron bäkäne”.

22 Aisete niebare kwe nitre ja tötikaka kwe ie: “Ye medenbätä ti niere munye, ñan ja töibika jankunu ja nire munkwe yebätä, munkwe dre kwetai yebätä o ja ngrabare yebätä, munkwe dre kitai jabätä yebätä. 23 Ye medenbätä, ja nire ye bäri ütiäte mrö ye kräke, aune ja ngrabare ye bäri ütiäte dän ye kräke. 24 Cuervo ye mike ñärärä: ñan nura nökö aune ngwä ötö, ju jondron ngwä ükarakrö ñan kwe, akwa Ngöböta buke. ¿Akräke mun ñan bäri ütiäte nukwä ye kräke? 25 ¿Mun meden ja töibikabätä raba nüne bäri biti chi?* 26 Aisete, kukwe chi ne mun ñan raba nuainne, ¿ñobätä ja töibikadre kukwe mada yebätä? 27 Kriblü tä nirien ño ye mike ñärärä, ñan tä sribire ja dibiti aune dän dike. Akwa, ti niere munye Salomón namani ütiäte kri, akwa ñaka ja ngwäkitani kwe jire kriblü kwátibe ye erere. 28 Aisete, Ngöböta kä känsenta ngwäkite kore, matare tä aune jetebe kitata ñukwäte. ¡Mun bärira jire ngwä kitai kwe! ¡Mun tödeke chi krubäte! 29 Ye medenbätä, munkwe dre kwetai, munkwe dre ñai ye munkwe ñan känä jankunu aune munkwe ñan ja töibika krubäte. 30 Jondron ne bä jiebiti nitre juta madate* tä näin kisere, akwa jondron ne munta ribere jai, ye gare mun Rün ie. 31 Aisete bäri kwin munkwe Gobran Ngöbökwe känä jankunu aune jondron jökrä ye rabai munkwe.

32 Mun braibe,* mun ñan kä jürä ngwan jabätä, ñobätä ñan aune mun Rün tö Gobran biain munye. 33 Jondronta munkwe ye munkwe rürübäin aune nireta jondron ribere jai* ye munkwe dimika. Munkwe ngwian ngwä chi ñan niken ngwarbe sribe jai, ye abokän jondron jökrä kwin, munkwe ükaninkrö jai kä kwinbätä aune ye ñan krütai jire meden gärätä, yete ni gokä ñan nemen jire aune kebe ñan juen ngwarbe. 34 Ñobätä ñan aune jondron ütiäte mä kräke tä medente, yete mä brukwä täi arato.

35 Mun tädre juto aune ja ngwä kitani, aune ñotra jutra tädre munkwe, 36 ju bäkänkä tä ja mäkätebätä ye ñongwane kwainta aune jukwe metai kwe, ye ni* ju ngübabitikä tä ngübare ngäbiti jukwe tikakäre ie ye kwrere munkwe ja ngwan. 37 ¡Ni klaborebätä kä juto kwain mokre ju bäkänkä jataita yei ngwane! Ti niere metre munye, dän jondron nuainkäre ye kitai kwe jabätä, niaratre mikai täkäni kwe mesabätä aune rikai jondron nuainne kräke. 38 Aune nane mada jatadre hora 9 deu näre nemen kä ruäre deu o kä ruäre deu nemen 3 dekä aune niaratre ye kwandre juto ie ngwane, ¡kä juto niaratrebätä! 39 Töbike kukwe nebätä: ni gokä rükai hora nuäi ye tädre gare ju bäkänkä ie ngwane, ñan tuadremetre kwe niken gwä. 40 Mun arato tädre käre juto, ñobätä ñan aune hora nuäi te, mun ñan Ni Kä Nebätä Monsoi ngübare ngwane, rükaita”.

41 Ye ngwane Pedrokwe ngwanintari ie: “Däkien, ¿mäta kukwe bämike nun aibe kräke o ni jökrä kräke?”. 42 Aune Däkienkwe niebare ie: “¿Nire metrere ni ju ngübabitikä ja ngwanka metre aune töbätä,* abokän ju bäkänkä käkwe mikai sribikätre jakwe gwi ngübakäre, ne kwe rabadre buke kä debe näre te? 43 ¡Ni klabore yebätä kä juto, bäkänkäkwe sribi nuain mananbare ie ye erere täi nuainne ngwane! 44 Ti niere metre munye: bäkänkä käkwe mikai jondron jakwe ye jökrä ngübarebiti. 45 Akwa ni klabore ye käkwe niedre bati ja brukwäte, ‘ti bäkänkä nibi ngrötöte krubäte’ aune rikadre sribikätre ben merire aune brare ye nuainne tare, rikadre mröre, dö ñain aune dröba nike, 46 ni klabore bäkänkä ye jataita köbö te ñan ngübare yete aune hora ñan gare ie yete. Aune bäkänkä yekwe ni klabore mikai ja ngie nuin kri aune mikai kwe nitre ñan ja ngwanka metre ye ngätäite. 47 Ni klabore bäkänkä tö namani drei ye nükani gare ni klabore ie, akwa ñaka ja mikani juto kwe aune dre nuain mananbare bäkänkäkwe ie ye ñan nuainbare kwe, ni klabore yekwe ja tare nikai krubäte. 48 Akwa ni klabore ie ñan nükani gare aune kukwe käme nuainbare kwe ye ñan nuaindi tare krubäte. Metrere nire kisete sribi mikani ere yei kukwe ribei krubäte aune nire kädekani jondron erebiti yei kukwe ribei bärira.

49 Ti jatani ñukwä okwä bukekä kä tibienbätä, okwä namaninanka, ¿se dre mada ribe raba tikwe? 50 Akwa kukwe ñan nuäre* ben tä ja tuadre tie, ¡ye käkwe ti ngwain ja tare nike krubäte nememe krütai ngwane! 51 ¿Ti jatani kä jäme ngwena kä tibienbätä nütüta munkwe? Ñakare, tita niere munye. Ñakare aune ti jatani ni ñäkäbitikäre. 52 Ñobätä ñan aune nete ja käne, nitre nirike ju kwatibe te täi ja ñäkäninbiti, nimä nibu rüere aune nibu nimä rüere. 53 Ni rüne täi ngobo rüere, ngobo täi rün rüere, ni meyere täi ngängän rüere, ngängän täi meye rüere, bi täi bosi rüere, bosi täi bi rüere”.

54 Ye bitikäre blitabare kwe nitre kwatí yebe arato, niebare kwe ietre: “Mutata jübente nedrin* tä tuin munye ngwane, bengwairebe munta niere ‘Ñü bike näkäin tibien muriebe minimini’ aune ye erere tä nemen bare. 55 Aune murie mötöri* tä mate ngwane, munta niere ‘Kä rabai ngire krubäte’ aune ye erere tä nemen bare. 56 Mun ja bämikaka jerekäbe, dreta nemen bare kä tibienbätä aune kä kwinbätä nüke gare munye, ¿ño amare dre nakainkä kä ne näire ñan nüke gare munye? 57 ¿Ñobätä kukwe meden metre ye mun ñan mike nüke gare akwle jai arato? 58 Ñodre, mäta näin mä rüebe gobran kokwäre kukwe ükatekäre ngwane, mäkwe ja di ngwan kukwe ye ükatekäre ji ngrabare ben, ne kwe ñan mä jänrikadre kwe ni kukwe ükatekä ye ngwärekri aune ni kukwe ükatekä, yekwe mä mikadre ni ni kitaka ngite ye kisete aune ni ni kitaka ngite ye käkwe mä kitadre ngite. 59 Ngwian mününe chi* mäkwe ye jögrä mä ñan biain ja ütiäre ngwane, mä ñan rabai kwäre ti niere metre mäi”.