Evangelio Lucakwe

1 Kukwe namani bare abokän nita mike era jai arato, ye nitre kwatí käkwe ja di ngwani ükekrö aune tike, 2 nitre tuaka kenanbe ja okwä jeñebiti aune Ngöbö kukwei mikaka gare, mikani gare nie erere. 3 Ni ütiäte kri Teófilo, ti arato käkwe ja töi mikani kukwe namani bare ño ye tike jatäri mäi, ñobätä ñan aune kukwe namani bare ño ye tikwe mikani gare kwin jai kenanbe ja käne, aune kukwe era erere namani gare tie. 4 Ne kwe, jondron jökrä driebare kukwere mäi yei tö ngwan raba, rabadre gare metre mäi yekäre.

5 Herodes,* rei Judea näire, nitre sacerdote ñäkäninbiti ie Abías nie nämäne ngätäite sacerdote iti kä Zacarías nämäne. Muko kwe kite Aaronkri* abokän kädeka nämäne Elisabet. 6 Niaratre nibu nämäne ja ngwen metre Ngöbö okwäkänti aune kukwe biani nuaindre aune lei Jehovakwe* ye jökrä niaratre nämäne mike metre täte. 7 Akwa ngäbäkre ñan nämäne kwetre, ñobätä ñan aune Elisabet monsoi ñan raba nemen, aune nibutre ye namanina umbre.

8 Sacerdote ñäkäninbiti ngätäite Zacarías nämäne yei nämäne sribidre ngwane, Zacarías nämäne sacerdotere Ngöbö ngwärekri. 9 Aune kukwe ükaninte sacerdote kräke ye ererebätä, niarai kä nükani nänkäre gwä templo Jehovakwe te incienso biankäre. 10 Aune incienso biandre ye käi nükani ngwane, nitre nämäne kwatí jubäre ye jökrä nämäne orare. 11 Ye ngwane ángel Jehovakwe ja mikani tuare ie yete, ángel ye nämäne nünaninkä küde ruinkri altar incienso kukwakäre yekänti. 12 Zacarías okwä matanibätä ngwane, nikaninkä* aune kä jürä namani krubätebätä. 13 Akwa ángel käkwe niebare ie: “Ñan kä jürä ngwan jabätä Zacarías, ñobätä ñan aune dre käräta kisere mäkwe ye juruabare. Mä muko Elisabet yekwe monso brare rabai iti aune mäkwe kädeka Juan. 14 Kä rabai juto krubäte mäbätä aune däredi ye käkwe kä mikai juto nitre kwatibätä. 15 Ñobätä ñan aune rabai ütiäte kri Jehová okwäkänti. Akwa ñaka vino aune dö mada kwaka* ñai jire kwe. Jämi därere ye känenkri Ngöbökwe üai deme ye biain ie. 16 Aune Israel monsoi ye kwatí mikai kwe kiteta Jehová Ngöbö kwe kokwäre. 17 Ne madakäre, kä juto aune Elías die yebiti näin Ngöbö käne, nitre rüne ye brukwä kwitakäre monsore aune ni ñan ja mike täte ye jatadreta kukwe töbätä ni ja ngwanka metrekwe kokwäre yekäre, ne kwe juta keteiti tädre juto biare sribikäre Jehová kräke”.

18 Zacarías niebare ángel ie: “¿Kukwe ne rabai bare metre ye ñokänti raba nemen gare tie? Ñobätä ñan aune ti niena umbre aune ti muko niena umbre arato”. 19 Aune angelekwe niebare ie: “Ti kä Gabriel, tita käre nünaninkä Ngöbö ngwärekri aune ti juani blitakäre mäbe aune kukwe kwin ne mikakäre gare mäi. 20 Akwa ne kukwe nuin, mä kukwe rötai nememe köbö te kukwe ne rabai bare ngwane. Ñobätä ñan aune ti kukwe nini mäi, abokän rabai bare kä kitani näre te mä ñan miri era jai yebätä”. 21 Ye ngwane, nitre kwatí nämäne jubäre ye nämäne Zacarías ngübare, aune ñobätä namani ngrötöte krubäte templote ye ñan namani nüke gare ietre. 22 Jataninta jubäre ngwane, kukwei ñan namani ngitiekä, aune jondron ñan tuabare tuani gwä kwe templote ye gani kwetre. Namani blite kisebiti nitre ben akwa kukwei nämäne nötani. 23 Ye bitikäre, sribi deme* kwe ye köböi krütani ie ngwane, nikaninta ja gwirete.

24 Köbö nikani ruäre ta ye bitikäre muko kwe Elisabet ye namani murore,* aune sö krärike te ñan kämikaninkä gwi kwe. Namani niere: 25 “Kukwe ne Jehovakwe nuainbare ti kräke. Ja töi mikani kwe tibätä ti mikakäre kwäre jagai tikwe yebätä”.

26 Namani murore ye söi krä ti ngwane, Ngöbökwe ángel Gabriel juani Galilea juta Nazaret yete, 27 blitakäre meri bati kaibe* abokän ja kukwei kitaninkä kwe ja mäkätekäre ni brare iti kädeka nämäne José, kite David mräkäkri ye ie. Meri kaibe ye kädeka nämäne María. 28 Ángel nikani gwä, käkwe niebare ie: “Köbö kwin, meri kräke kukwe kwin krubäte mikata bare, Jehová tä mäbe”. 29 Akwa niara nikaninkä ángel kukwei käne aune kukwe niebare ie ye dre gärä nämäne ye namani mike nüke gare jai. 30 Aisete angelekwe niebare ie: “María, ñan kä jürä ngwan jabätä, ñobätä ñan aune mä käi nuäre Ngöböbätä. 31 Kukwe nuin, mä rabai murore, aune monso brare rabai mäkwe, mäkwe kädeka Jesús. 32 Niara rabai ütiäte kri aune kädekai, Ngöbö Kä Kwinbätä Monsoi. Aune Ngöbö Jehová käkwe kürä niara mräkä* Davidkwe ye biain ie. 33 Aune niarakwe gobrandi ju Jacobkwe yebiti kärekäre. Gobran kwe ye ñan mikai krüte jire”.

34 Akwa Mariakwe ngwanintari ángel ie: “¿Ti ñan nemen ni brarebe jire se ño kukwe ye raba nemen bare?”. 35 Angelekwe niebare ie: “Ngöbö Kä Kwinbiti käkwe üai deme biain mäi, aune di kwe ye rabai mäbätä. Ye medenbätä monso däredi ye kädekai deme, Ngöbö Monsoi. 36 Aune mä mräkä Elisabet, abokän nibira umbre, ye tä murore arato. Niara, abokän monsoi ñan raba nemen nie nämäne ie, ye tä murore sö krä tira. 37 Ñobätä ñan aune kukwe jökrä nieta Ngöbökwe ye ñan ribi mikakäre nemen bare kräke”. 38 Ye ngwane, Mariakwe niebare: “¡Ti sribikä Jehová kräke tä nete! Mäkwe dre nini ye erere rabadre bare tibätä”. Ye bitikäre, ángel kämikaninkäbätä aune nikaninta.

39 Kä nikani braibe ta ye bitikäre, María nikani jibiti aune nikani jötrö ngwarbe kä ngutuäre juta keteiti Judá yekänti. 40 Aune nikani gwäkäre Zacarías juete aune köbö kwin niebare kwe Elisabet ie. 41 Mariakwe köbö kwin niebare ye juruabare Elisabet ie ngwane, ye bätäräbe ngäbäkre nämäne Elisabetbätä ye käkwe ja täkätebare. Ye ngwane, üai deme namani Elisabetbätä. 42 Aune niebare kwe ja dibiti: “¡Meritre mada ngätäite mä kräke kukwe bäri kwin nuainta, aune kukwe kwin monso rabai mäkwe ye kräke! 43 ¿Se ti nire ne kwe ti Däkien meye jatadre basare tie? 44 Ñobätä ñan aune, mä köbö miri tie ye juruani tie ngwane, ngäbäkre tibätä ye käkwe ja tärite kä jutobiti. 45 Mäkwe mikani era jai yebätä kä juto mäbätä arato, ñobätä ñan aune kukwe kite Jehovakri niebare mäi ye rabai bare täte”.

46 Mariakwe niebare: “Ja nire tikwe tä Jehová käikitekä, 47 Ngöbö ti Mikaka Kwäre ye köböire kä juto krubäte ti brukwäbätä, 48 ñobätä ñan aune ja töi mikani kwe, sribikä bobre kwe nebätä. ¡Nete ja käne kä juto tibätä ye nitre jatai jatäri ye käkwe niei tibätä! 49 Ñobätä ñan aune Ngöbö Dite Kri ye käkwe kukwe ñan tuabare nuainbarera ti kräke, aune kä kwe ye deme. 50 Kärekäre tä ni niara jürä ngwanka jabätä ye mike tuin bobre jai. 51 Niara dite kri ye bämikanina kwe ja kisebiti, aune nitre brukwä bike kri ye dikaninante jene jene kwe. 52 Nitre ütiäte krikri ye dianinanka kwe kürä kwetre yebiti aune nitre bobre ye mikanina kwe kri, 53 jondron bätäkä kwin ye bianina kwe ni jondron täi nikaka ye ie aune ni jondron bäkäne ere ye juaninanta kwe kise tökare. 54 Jatani Israel ni niara mikaka täte ye dimike, aune yebiti kukwe käbämikata kwe ye törö ie ye tä bämike. 55 Abrahán aune nitre jatai Abrahankri jatäri mikai tuin bobre kwe kärekäre jai käbämikani kwe, ni mräkätre kira ie niebare kwe erere”. 56 Sö krämä te María namani känti biti María nikaninta ja gwirete.

57 Kä nikani ta ngwane, monso rabadre Elisabetkwe ye käi nükani ie, aune monso brare därebare kwe. 58 Jehovakwe mikani tuin bobre krubäte jai ye namani gare mräkätre ie aune nitre bäre ie ngwane, kä ngwani juto jabätä kwetre ben. 59 Därebare ye köböi nikani köbö kwä ta ngwane, jänikani tarei kwata tikakakäre aune kädeka jababare Zacarías, rün kwe erere. 60 Akwa meyekwe niebare: “¡Ñakare! Kädekai Juan”. 61 Niaratrekwe niebare ie: “Mä mräkätre ngätäite ni iti kä ñan jire ye erere”. 62 Aisete monso ye kädekadre ño ie rün tö namani, ye ngwanintari kisebiti rün ie. 63 Niarakwe tabla chi käräbare aune tikabare kwe: “Niara kä Juan”. Aune nitre jökrä ye töi namani ñan krütare. 64 Ye bengwairebe kada ngitiani aune tidrä nebetaninte aune nikani Ngöbö käikitekä. 65 Nitre jökrä nämäne nüne bäre ye töi namani ñan krütare,* aune kukwe ne kädrie namani kä ngutuäre Judea ye jökrä käntita. 66 Aune nire nämäne kukwe ye kukwe nuin ye nämäne üke ja brukwäte aune niere: “¿Monso chi nekwe dre nuaindi ja umbrebiti?”. Ñobätä ñan aune Jehová nämäne monso chi yebe ye nämäne gare kwin.

67 Ye ngwane, rün kwe Zacarías yebätä üai deme namani aune niebare kwe: 68 “Jehová Ngöbö Israelkwe, raba käikitaninkä ñobätä ñan aune tä juta kwe mike tuin bobre jai aune mike kwäre. 69 Ni mikaka kwäre dite kri,* kite niara mikaka täte Davidkri ye biani kwe nie, 70 ni niara kukwei niekä kira ja ngwanka metre kadabiti niebare kwe erere, 71 ni mikakäre kwäre ni rüe yebätä aune nitre jökrä brukwä ni kräke kise yebätä, 72 ni mikakäre tuin bobre jai ni mräkätre kira yebätä aune kukwe ükaninte* deme kwe ye ngwankäre törö jai, 73 kukwe käbämikani kwe ni mräkä kira Abrahán ie, 74 ye abokän, ni mikai kwäre kwe ni rüe kisete ye bitikäre, ni tuainmetre kwe sribi ütiäte deme nuainne ja kräke ñan kä jüräbe kwärä, 75 ja ngwan metre aune kukwe nuain metrebiti köbö kwatire kwatire te niara ngwärekri nita nire ngwane. 76 Aune mä, monso chi, mä kädekai Ngöbö Kä Kwinbiti kukwei niekä, ñobätä ñan aune mä näin Jehová känenkri ji kwe ükatekäre. 77 Ngite kitai ta bititre köböire rabai kwäre, ye mikakäre gare juta kwe ie, 78 Ngöbö nikwe tä ni mike tuin bobre krubäte jai yebätä. Ni tuin bobre ie yebätä, käträ kä kwinbiti jatai käta kite ngwen ye kwrere, 79 käträ mikakäre nitre tä täkäni kä ikote aune gata käi täni yebiti aune ni jie ngwankäre metre ji kä jämenkwe yebiti”.

80 Monso chi ye ririabare aune namani ünä, aune namani kä ngwarbe nötare yete, nememe köbö te ja mikani tuare kwe nitre Israel ie ngwane.