Evangelio Juankwe

21 Ye bitikäre, Jesukwe ja mikaninta tuare bobukäre nitre ja tötikaka kwe ie, ñö okwä kri Tiberíades* yekänti. Ne erere ja mikani tuare kwe. 2 Simón Pedro, Tomás abokän ie Munkin nie nämäne, Natanael juta Caná kä Galilea, Zebedeo monsoitre aune nitre ja tötikaka nibu kwe mada nämänentre näin gwairebe jabe. 3 Simón Pedro niebare ietre: “Ti niki gwa gain”. Aune niaratrekwe niebare ie: “Nun niki siba mäbe”. Aisete niaratre nikani aune nankwani rute, akwa köbö yete deu niaratre käbä ñan namani jire.

4 Kä jatani ngwen ngwane, Jesús nämäne ñö okwä kri kräbätä, akwa Jesús ñan nükani gare nitre ja tötikaka ie. 5 Aune Jesukwe niebare ietre: “Monsotre tikwe, ¿gwa ñan kwetadre jire munye ñaña?”. “Ñakare”, niebare kwetre ie. 6 Aune niarakwe niebare ietre: “Krade kite kise ruinkri ru yebätä aune mun käbä raba nemen”. Krade kitani ñöte kwetre ngwane, gwa nakani krade kwáti ietre, aune ñaka namani näkäi ietre. 7 Ye ngwane, ni ja tötikaka tare Jesukwe ye käkwe niebare Pedro ie: “¡Ye Däkien ara!”. Ye juruabare Simón Pedro ie ngwane, ja ngwä kitani kwe, ñobätä ñan aune bäsi nämäne butiere* aune nankwani ñöte. 8 Akwa nitre ja tötikaka mada ye nikani ru chi te gwa krade kwáti ye jäke jate, ñobätä ñan aune nämänentre känime ñö okwä kri ye kräbätä, bäsi 90 metro näre nemen jate.

9 Nükanintre ñö kräbätä ngwane, ñukwä nämäne bukaninte, gwa nämäne ñukwäte aune pan nämäne yete jutuabare ietre. 10 Jesukwe niebare ietre: “Gwa naka munye ye ngwen ruäre nete”. 11 Aisete Simón Pedro nankwani rute aune krade jäkäbare jatekwäre kwe. Gwa krikri nämäne krade kwáti, 153 jire. Gwa nämäne ere kradete akwa yebiti ta ñan nötaninte. 12 Jesukwe niebare ietre: “Mun jakwre mröre”.* Aune niara abokän niré, ye nitre ja tötikaka jire iti ie ja nükani törö ngwantarikäre ie, ñobätä ñan aune niara Däkien ara nämäne gare ietre. 13 Jesús nikani, pan diani kwe, aune biani kwe ietre aune ye erere nuainbare kwe gwa yebiti. 14 Jesús ganinkröta nitre ngwakare ngätäite ye bitikäre, ne bämäkäre ja mikani tuare kwe nitre ja tötikaka ie.

15 Mröbare ünä kwetre ye bitikäre, Jesukwe ngwanintari Simón Pedro ie: “Simón, Juan ngobo, ¿mäta ti tarere bäri jondron ne kräke ya?”. Niarakwe niebare ie: “Jän, Däkien, mä tare tikwe gare mäi”. Jesukwe niebare ie: “Oveja ngäbä tikwe buke”. 16 Bobukäre Jesukwe ngwanintari ie: “Simón, Juan ngobo, ¿mäta ti tarere?”. Niarakwe niebare ie: “Jän, Däkien, mä tare tikwe gare mäi”. Jesukwe niebare ie: “Mäkwe oveja ngäbä kiakia tikwe ngüba”. 17 Bämäkäre Jesukwe ngwanintari ie: “Simón, Juan ngobo, ¿ti tare mäkwe?”. Pedro nämäne Jesús tarerea ye Jesukwe ngwanintari bämä jire Pedro ie, yebätä Pedro namani ulire. Aisete Pedrokwe niebare ie: “Däkien, kukwe jökrä gare mäi, mä tare tikwe ye gare mäi”. Jesukwe niebare ie: “Oveja ngäbä kiakia tikwe ye buke. 18 Ti niere erametre mäi, mä nämäne bäri bati ngwane, mä nämäne ja ngwäkite akwle aune mä tö nämäne näin medente erere känti mä nämäne niken. Akwa mä jatai umbre ngwane, mäkwe kise ngökaite aune ni madakwe mä ngwäkitai aune mä ñan tö näin yekänti mä jänäin kwe”. 19 Pedro krütai ño abokänbiti Ngöbö käikitaikä kwe, ye Jesukwe mikani gare kukwe niebare kwe yebiti. Kukwe ye niebare kwe ie, ye bitikäre niebare kwe: “Näin jankunu ti jiebiti”.

20 Pedro nikwitaninte ja jiebiti aune ni ja tötikaka tare Jesukwe ye jatani niaratre jiebiti jutuabare ie. Ni ja tötikaka ye bä käkwe gitatebare* Jesús mäträräbätä mröbare dere kwetre ye ngwane. Niara meden käkwe ngwantaribare Jesús ie: “Däkien, ¿nirekwe mä kitai ngise?”. 21 Aisete, ni ja tötikaka ye jutuabare Pedro ie ngwane, Pedrokwe ngwanintari Jesús ie: “Däkien, ¿dre rabai bare ni nebätä?”. 22 Jesukwe niebare ie: “Niara tädre nete nememe ti jatadreta ie ti tö ngwane, ¿ye kukwe mäkwe ya? Mä abokän käkwe nän jankunu ti jiebiti”. 23 Ye medenbätä, ni ja tötikaka ye ñaka krütai jire ye kädrie namani nitre nänkä Jesús jiebiti ye ngätäite. Akwa ni ye ñaka krütai ye ñan ai Jesukwe niebare Pedro ie. Ñakare aune niebare kwe ie: “Niara tädre nete nememe ti jatadreta ie ti tö ngwane, ¿ye kukwe mäkwe ya?”.

24 Ni ja tötikaka ne ara käkwe kukwe ye mikani gare aune tikani, aune kukwe mikani gare kwe ye metre gare nie.

25 Ne madakäre, Jesukwe kukwe keta kabre mada nuainbare ye kiakia jökrä tikadre akräke, rollo keta kabre tikadre ye ñan raba nemen jökrä kä tibiente ruin tie.